លោក Wang Yi រដ្ឋមន្ត្រីការបរទេសចិនបានលើកឡើងក្នុងសិក្ខាសាលាស្តីពីសភាពការណ៍អន្តរជាតិនិងការទូតចិនឆ្នាំ២០២២នាពេលថ្មីៗនេះថា មួយឆ្នាំកន្លងមក ការរួមគ្នាកសាង “ខ្សែក្រវាត់និងផ្លូវ” ប្រកបដោយគុណភាពខ្ពស់បានបង្ហាញលទ្ធផលជាផ្លែផ្កាជាញឹកញាប់។ រយៈពេល១១ខែដើមឆ្នាំនេះ ទំហំពាណិជ្ជកម្មរវាងចិននិងដៃគូសហប្រតិបត្តិការ “ខ្សែក្រវាត់និងផ្លូវ” បានកើនឡើង២០.៤% ចំនួនទៅមកនៃរទេះភ្លើងដឹកទំនិញរវាងចិននិងអឺរ៉ុបឡើងដល់កម្រិតខ្ពស់ថ្មី។ ផ្លូវដែកល្បឿនលឿនទីមួយនៃអាស៊ានបានដំណើរការសាកល្បង ផ្លូវល្បឿនលឿនទីមួយនៃកម្ពុជាបានដាក់ឱ្យដំណើរការជាផ្លូវការ ចំណែកផ្លូវដែកចិន-ឡាវបានដំណើរការមួយឆ្នាំហើយដែលទទួលបានសមិទ្ធផលគួរឱ្យកោតសរសើរ។ ប្រទេសចំនួន១៥០និងអង្គការអន្តរជាតិចំនួន៣២បានចូលរួមជាមួយមហាគ្រួសារនៃ “ខ្សែក្រវាត់និងផ្លូវ” ដែលបានបង្ហាញថា កិច្ចសហប្រតិបត្តិការសេដ្ឋកិច្ចអន្តរជាតិបានឡើងដល់កម្រិតខ្ពស់ថ្មី ដែលនឹងក្លាយជាក្បាលម៉ាស៊ីនអភិវឌ្ឍន៍ថ្មីនៃបណ្តាប្រទេស។
លោកបានបន្តថា ឆ្នាំ២០២៣ ជាខួប ១០ ឆ្នាំនៃការដែលលោកប្រធានរដ្ឋចិន Xi Jinping បានលើកឡើងពីគំនិតផ្តួចផ្តើម “ខ្សែក្រវាត់និងផ្លូវ” បណ្តាភាគីសុទ្ធតែរំពឹងទុកពីការបើកធ្វើវេទិការកំពូលលើកទី៣នៃកិច្ចសហប្រតិបត្តិការអន្តរជាតិ “ខ្សែក្រវាត់និងផ្លូវ” ដើម្បីជំរុញឱ្យ “ខ្សែក្រវាត់និងផ្លូវ” ដែលជា “ខ្សែក្រវាត់អភិវឌ្ឍន៍” និង “ផ្លូវសុភមង្គល ” ដែលផ្តល់ផលប្រយោជន៍ដល់ពិភពលោកឱ្យកាន់តែធំទូលាយ៕