ថ្ងៃទី ៥ ខែវិច្ឆិកា ថ្លែងក្នុងពិធីបើកពិព័រណ៍នាំចូលចិនអន្តរជាតិលើកទី ២ លោកស៊ី ជីនភីង ប្រធានរដ្ឋចិនបានលើកឡើងថា ការបើកចំហចំពោះក្រៅប្រទេសរបស់ប្រទេសចិនជាការបើកចំហប្រកបដោយគ្រប់ទិសដៅនិងគ្រប់វិស័យ ដែលកំពុងពន្លឿនការជំរុញការបង្កើតជានិម្មាបនកម្មថ្មីសម្រាប់ការបើកចំហដោយគ្រប់ជ្រុងជ្រោយ ។
លោកបានគូសបញ្ជាក់ថា ប្រទេសចិននឹងបន្តលើកទឹកចិត្តឱ្យធ្វើការពិសោធន៍យ៉ាងក្លាហានក្នុងការកសាងតំបន់សាកល្បងពាណិជ្ជកម្មសេរី ពន្លឿនការកសាងកំពង់ផែពាណិជ្ជកម្មសេរីខេត្តហៃណាន ។ ប្រទេសចិននឹងបន្តជំរុញសមាហរណកម្មទីក្រុងប៉េកាំង-ក្រុងធានជីន-ខេត្តហឺប៉ី ការអភិវឌ្ឍនៅតំបន់ខ្សែសង្វាក់សេដ្ឋកិច្ចទន្លេយ៉ងសេ ការធ្វើសមាហរណកម្មតំបន់ដីសណ្តរទន្លេយ៉ង់សេ ក៏ដូចជាការកសាងមហាតំបន់ឈូងសមុទ្រក្វាងទុង-ហុងកុង-ម៉ាកាវ ព្រមនិងគ្រោងយុទ្ធសាស្រ្តជាតិថ្មីសម្រាប់ការអភិរក្សអេកូឡូស៊ីនៅតាមបណ្តោយទន្លេលឿង និងការអភិវឌ្ឍប្រកបដោយគុណភាពខ្ពស់ទៀតផង ៕