តបតាមការអញ្ជើញរបស់លោក José Pedro Aguiar－Branco ប្រធានសភាព័រទុយហ្កាល់ លោក Zhao Leji ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនទូទាំងប្រទេសចិន បានអញ្ជើញទៅបំពេញទស្សនកិច្ចផ្លូវការនៅប្រទេសព័រទុយហ្កាល់ចាប់ពីថ្ងៃទី ២១ ដល់ថ្ងៃទី ២៣ ខែវិច្ឆិកា ។ លោកបានជួបពិភាក្សាការងារដោយឡែកពីគ្នាជាមួយលោក Marcelo Rebelo de Sousa ប្រធានាធិបតីព័រទុយហ្កាល់ លោក Luís Montenegro នាយករដ្ឋមន្ត្រីព័រទុយហ្កាល់ និងលោក Aguiar-Branco ប្រធានសភាព័រទុយហ្កាល់នៅទីក្រុង Lisbon ។
ក្នុងកិច្ចជំនួបជាមួយលោក de Sousa លោក Zhao Leji បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ ក្រោមការណែនាំជាយុទ្ធសាស្ត្ររបស់ប្រមុខរដ្ឋនៃប្រទេសទាំងពីរ កិច្ចសហប្រតិបត្តិការរវាងភាគីទាំងពីរក្នុងការរួមគ្នាកសាង "ខ្សែក្រវាត់ និងផ្លូវ" ត្រូវបានពង្រឹងនិងពង្រីកជាលំដាប់ ការផ្លាស់ប្តូររវាងប្រជាជននិងប្រជាជនកាន់តែសម្បូរបែប ពោលគឺទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិននិងព័រទុយហ្កាល់មានភាពកាន់តែស៊ីជម្រៅនិងប្រាកដប្រជា។ ប្រទេសចិនសូមថ្លែងអំណរគុណចំពោះប្រទេសព័រទុយហ្កាល់ដែលបានប្រកាន់ខ្ជាប់ជានិច្ចនូវគោលការណ៍ចិនតែមួយ ហើយមានឆន្ទៈធ្វើការជាមួយប្រទេសព័រទុយហ្កាល់ដើម្បីសម្រេចបាននូវវិបុលភាពនិងវឌ្ឍនភាពរួម ដោយឈរលើមូលដ្ឋានគោរពគ្នាទៅវិញទៅមកនិងមានសមភាព សង្ឃឹមថា ព័រទុយហ្កាល់នឹងបន្តដើរតួនាទីយ៉ាងសកម្មនៅក្នុងសហភាពអឺរ៉ុប ដើម្បីបំពេញបន្ថែមថាមពលវិជ្ជមានកាន់តែច្រើនក្នុងការជំរុញការអភិវឌ្ឍទំនាក់ទំនងរវាងចិននិងសហភាពអឺរ៉ុប។
ជាការឆ្លើយតប លោក de Sousa បានបញ្ជាក់ថា ប្រទេសព័រទុយហ្កាល់មានឆន្ទៈក្នុងការបង្កើនការប្រាស្រ័យទាក់ទងជាន់ខ្ពស់ជាមួយប្រទេសចិន ធ្វើឱ្យស៊ីជម្រៅនូវការផ្លាស់ប្តូរមិត្តភាព និងពង្រឹងកិច្ចសហប្រតិបត្តិការក្នុងវិស័យពាណិជ្ជកម្ម ថាមពលថ្មី សេដ្ឋកិច្ចពណ៌ខៀវ និងសេដ្ឋកិច្ចឌីជីថលជាដើម ។ វាជារឿងមានសារៈសំខាន់ខ្លាំងណាស់ដែលអឺរ៉ុបនិងចិនបង្កើនកិច្ចសន្ទនា ហើយព័រទុយហ្កាល់មានឆន្ទៈក្នុងការដើរតួនាទីយ៉ាងសកម្មដើម្បីសម្រេចបានរឿងនេះ។
