លោក He Yongqian អ្នកនាំពាក្យក្រសួងពាណិជ្ជកម្មចិនបានថ្លែងនៅក្នុងសន្និសីទសារព័ត៌មានជាប្រចាំកាលពីថ្ងៃទី ២១ ខែវិច្ឆិកាថា ប្រទេសចិននឹងរួមជាមួយរដ្ឋសមាជិកនៃកិច្ចព្រមព្រៀងទំនាក់ទំនងភាពជាដៃគូសេដ្ឋកិច្ចឌីជីថល (ហៅកាត់DEPA) ដើម្បីជំរុញដំណើរការចរចា និងខិតខំសម្រេចបានលទ្ធផលជាផ្លែផ្កាក្នុងពេលឆាប់ៗ ព្រមនិងរួមគ្នាស្វែងរកសក្តានុពលនៃកិច្ចសហប្រតិបត្តិការលើវិស័យសេដ្ឋកិច្ចឌីជីថល និងជំរុញគម្រោងសហប្រតិបត្តិការជាក់លាក់ឱ្យទទួលបានសមិទ្ធផលក្នុងពេលឆាប់ៗ។

តាមការផ្សាយដំណឹងឱ្យដឹងថា កាលពីថ្ងៃទី ១៨ ខែសីហា ឆ្នាំ ២០២២ យោងតាមសេចក្តីសម្រេចរបស់គណៈកម្មាធិការចម្រុះ DEPA ក្រុមការងាររបស់ប្រទេសចិនសម្រាប់ការស្នើសុំចូលជាសមាជិកនៃDEPA ត្រូវបានបង្កើតឡើង ហើយការចរចាត្រូវបានចាប់ផ្តើមជាផ្លូវការ។ ក្រុមការងារប្រទេសចិន និងសមាជិក DEPA បានបើកធ្វើកិច្ចប្រជុំថ្នាក់រដ្ឋមន្ត្រីចំនួន ៥  លើកហើយ។

ពេលថ្លែងអំពីការវិវឌ្ឍនៃនីតិវិធីចូលរួមកិច្ចព្រមព្រៀងគ្រប់ជ្រុងជ្រោយ និងរីកចម្រើនសម្រាប់ទំនាក់ទំនងភាពជាដៃគូអន្តរប៉ាស៊ីហ្វិក (ហៅកាត់CPTPP) លោក He Yongqian បានថ្លែងថា ប្រទេសចិននឹងបន្តអនុវត្តតាមនីតិវិធីពាក់ព័ន្ធនៃកិច្ចព្រមព្រៀង CPTPP ធ្វើការទាក់ទងនិងផ្លាស់ប្តូរយ៉ាងស៊ីជម្រៅជាមួយសមាជិកទាំងអស់ សំដៅជំរុញយ៉ាងសកម្មនូវដំណើរការចូលរួមកិច្ចព្រមព្រៀង CPTPP៕