នារសៀលថ្ងៃទី១៨ ខែវិច្ឆិកា តាមម៉ោងក្នុងតំបន់ លោក Xi Jinping ប្រធានរដ្ឋចិនបានជួបសន្ទនាជាមួយលោកស្រី Claudia Sheinbaum Pardoប្រធានាធិបតីម៉ិកស៊ិកក្នុងអំឡុងពេលចូលរួមកិច្ចប្រជុំកំពូល G20 នៅទីក្រុងរីយ៉ូ ដឺ ហ្សាណេរ៉ូ។

លោក Xi Jinping បានសម្តែងការអបអរសាទរជាថ្មីម្តងទៀតចំពោះលោកស្រី Claudia Sheinbaum Pardo ដែលបានជាប់ឆ្នោតជាប្រធានាធិបតីស្ត្រីដំបូងក្នុងប្រវត្តិសាស្ត្រម៉ិកស៊ិក។ លោក Xi Jinping បានលើកឡើងថា ប្រទេសចិន និងម៉ិកស៊ិកមានមិត្តភាពប្រពៃណីដ៏យូរអង្វែង ភាគីទាំងពីរគួរតែបង្កើនការផ្លាស់ប្តូរជាបន្តបន្ទាប់ដើម្បីថែរក្សាចំណងមិត្តភាព និងប្រើប្រាស់ឱ្យបានល្អនូវលក្ខណៈបំពេញបន្ថែមគ្នាខ្ពស់ផ្នែកសេដ្ឋកិច្ចរបស់ប្រទេសទាំងពីរ បន្តជំរុញកិច្ចសហប្រតិបត្តិការជាក់ស្តែងឥតឈប់ឈរ និងជំរុញទំនាក់ទំនងនៃប្រទេសទាំងពីរឱ្យទទួលការវិវឌ្ឍរីកចម្រើនលើកគ្រប់វិស័យក្នុងយុគសម័យថ្មី។

ជាការឆ្លើយតប លោកស្រី Claudia Sheinbaum Pard បានថ្លែងថា ម៉ិកស៊ិក និងចិនបានផ្តោតលើការគាំពារពហុភាគីនិយម ហើយម៉ិកស៊ិកមានឆន្ទៈធ្វើការជាមួយប្រទេសចិន ដើម្បីស្វែងរកសក្តានុពល និងពង្រីកកិច្ចសហប្រតិបត្តិការលើគ្រប់វិស័យ៕