នៅថ្ងៃទី ១៨ ខែវិច្ឆិកា តាមម៉ោងក្នុងតំបន់ លោក Xi Jinping ប្រធានរដ្ឋចិនបានជួបពិភាក្សាការងារជាមួយលោក Anthony Albaneseនាយករដ្ឋមន្ត្រីអូស្ត្រាលីក្នុងអំឡុងពេលអញ្ជើញចូលរួមកិច្ចប្រជុំកំពូល G20 នៅទីក្រុង Rio de Janeiro ប្រទេសប្រេស៊ីល។

លោក Xi Jinping បានលើកឡើងថា ទំនាក់ទំនងចិន-អូស្ត្រាលីទទួលបានការអភិវឌ្ឍមួយចំនួនក្នុងរយៈពេល ១០ ឆ្នាំកន្លងមក ប៉ុន្តែក៏មានឧបសគ្គខ្លះៗដែរ។ បច្ចុប្បន្ននេះ ទំនាក់ទំនងចិន-អូស្ត្រាលីងាកទៅរកភាពល្អប្រសើរឡើងនិងរក្សាបាននូវនិន្នាការអភិវឌ្ឍន៍ ដែលនាំមកនូវផលប្រយោជន៍ជាក់ស្តែងដល់ប្រជាជននៃប្រទេសទាំងពីរ។ ខ្ញុំមានឆន្ទៈធ្វើការជាមួយលោកនាយករដ្ឋមន្រ្តី ដើម្បីជំរុញការកសាងទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយចិន-អូស្ត្រាលីឱ្យកាន់តែចាស់ទុំ មានស្ថិរភាព និងប្រកបដោយផ្លែផ្កា ដើម្បីដាក់បញ្ចូលកត្តាស្ថិរភាព និងភាពប្រាកដប្រជាបន្ថែមទៀតសម្រាប់ក្នុងតំបន់ និងពិភពលោក។

ជាការឆ្លើយតប លោក Albanese បានថ្លែងថា ទំនាក់ទំនងរវាងប្រទេសយើងទាំងពីរទទួលបានការវិវឌ្ឍកាន់តែច្រើនដែលគួរឱ្យកត់សម្គាល់  តំបន់ដែលយើងបាននិងកំពុងស្ថិតនៅក្នុងដំណាក់កាលអភិវឌ្ឍន៍លឿនបំផុតក្នុងប្រវត្តិសាស្ត្ររបស់មនុស្សជាតិ ហើយការងើបឡើងនៃប្រទេសចិនបានរួមចំណែកយ៉ាងសំខាន់ក្នុងដំណើរការនេះ ដោយលើកកម្ពស់គុណភាពជីវភាពរស់នៅរបស់ប្រជាជនរាប់ពាន់លាននាក់តាមរយៈការអភិវឌ្ឍសេដ្ឋកិច្ច៕