កាលពីថ្ងៃទី ២៩ ខែតុលា លោក Xi Jinping ប្រធានរដ្ឋចិននិងលោក Hichilema ប្រធានាធិបតីសំប៊ីបានផ្ញើសារលិខិតជូនគ្នាទៅវិញទៅមកដើម្បីអបអរសាទរខួបទី ៦០ នៃការបង្កើតទំនាក់ទំនងការទូតរវាងប្រទេសចិននិងសំប៊ី។

លោក Xi Jinping បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសទាំងពីរមានការប្រាស្រ័យទាក់ទងជាន់ខ្ពស់ជាញឹកញាប់ ការកសាងទំនុកចិត្តផ្នែកនយោបាយមានភាពស៊ីជម្រៅជាបន្តបន្ទាប់ កិច្ចសហប្រតិបត្តិការជាក់ស្តែងទទួលបានលទ្ធផលជាផ្លែផ្កា ។ ប្រទេសទាំងពីរបានគាំទ្រគ្នាទៅវិញទៅមកលើបញ្ហាពាក់ព័ន្ធនឹងផលប្រយោជន៍ស្នូល និងកង្វល់សំខាន់ៗរបស់គូភាគី និងផ្តល់ផលប្រយោជន៍ជាច្រើនដល់ប្រទេសទាំងពីរ និងប្រជាជននៃប្រទេសទាំងពីរ ។

លោក Xi Jinping បានគូសបញ្ជាក់ថា ខ្ញុំយកចិត្តទុកដាក់ខ្ពស់ចំពោះការអភិវឌ្ឍទំនាក់ទំនងរវាងចិននិងសំប៊ី ហើយមានឆន្ទៈធ្វើការជាមួយលោកប្រធានាធិបតី ដោយចាត់ទុកខួបលើកទី ៦០ នៃការបង្កើតទំនាក់ទំនងការទូតរវាងប្រទេសទាំងពីរជាឱកាសមួយ ដើម្បីផ្សព្វផ្សាយចំណងមិត្តភាពប្រពៃណី គាំទ្រគ្នាទៅវិញទៅមក ពង្រឹងកិច្ចសហប្រតិបត្តិការគ្រប់ជ្រុងជ្រោយ និងរួមគ្នាជំរុញការធ្វើទំនើបកម្មនៃប្រទេសរៀងៗខ្លួនក្នុងយុគសម័យថ្មីនិងដំណើរថ្មី បន្តពង្រឹងទំនាក់ទំនងភាពជាដៃគូសហប្រតិបត្តិការជាយុទ្ធសាស្ត្រគ្រប់ជ្រុងជ្រោយរវាងចិននិងសំប៊ី ដើម្បីកសាងសហគមន៍រួមវាសនារវាងចិននិងសំប៊ីដែលមានភាពកាន់តែស្អិតល្មួត  ៕