ពិព័រណ៍ពាណិជ្ជកម្មសេវាកម្មចិនអន្តរជាតិឆ្នាំ២០២៤បានបើកធ្វើនៅទីក្រុងប៉េកាំងចាប់ពីថ្ងៃទី១២ដល់ថ្ងៃទី១៦ខែកញ្ញា។លោកXi Jinpingប្រធានរដ្ឋចិនបានលើកឡើងនៅក្នុងសារលិខិតអបអរសាទរថា "ពិព័រណ៍ពាណិជ្ជកម្មសេវាកម្មចិនអន្តរជាតិបានបើកធ្វើដោយជោគជ័យចំនួន១០លើកហើយ  វាគឺជាការឆ្លុះបញ្ចាំងយ៉ាងរស់រវើកនៃការអភិវឌ្ឍប្រកបដោយគុណភាពខ្ពស់នៃឧស្សាហកម្មសេវាកម្មនិងពាណិជ្ជកម្មសេវាកម្មរបស់ប្រទេសចិនដែលបានរួមចំណែកជាវិជ្ជមានដល់ការកសាងសេដ្ឋកិច្ចពិភពលោកបែបបើកចំហ"។

      នាពេលបច្ចុប្បន្ន  ពាណិជ្ជកម្មសេវាកម្មបានក្លាយជាកម្លាំងចលករដ៏សំខាន់សម្រាប់កំណើនសេដ្ឋកិច្ចពិភពលោកពីមួយថ្ងៃទៅមួយថ្ងៃ។  អង្គការពាណិជ្ជកម្មពិភពលោកបានព្យាករណ៍ថា សមាមាត្រនៃពាណិជ្ជកម្មសេវាកម្មក្នុងពាណិជ្ជកម្មអន្តរជាតិនឹងកើនឡើងពី២២ភាគរយនាពេលបច្ចុប្បន្នដល់ជាង៣៣ភាគរយនៅឆ្នាំ២០៤០។ នេះក៏ជាមូលហេតុដែលពិព័រណ៍ពាណិជ្ជកម្មសេវាកម្មលើកនេះបានទាក់ទាញប្រទេសនិងអង្គការអន្តរជាតិចំនួន៨៥មករៀបចំការតាំងពិព័រណ៌និងសហគ្រាសលំដាប់កំពូលទាំង៥០០លើពិភពលោកនិងសហគ្រាសឈានមុខចំនួនជាង៤៥០បានចូលរួមនៅកន្លែងផ្ទាល់។ក្នុងចំណោមប្រទេសទាំងនោះ ប្រទេសបារាំងបានចូលរួមក្នុងនាមជាប្រទេសកិត្តិយសជាលើកដំបូង  ។មានសហគ្រាសបារាំងជាច្រើនបានរំពឹងថានឹងពង្រឹងកិច្ចសហប្រតិបត្តិការខាងវិស័យពាណិជ្ជកម្មសេវាកម្មរវាងចិននិងបារាំងឱ្យកាន់តែស៊ីជម្រៅ។

         ការរីកចំរើនយ៉ាងផុលផុសនៃទីផ្សារឧស្សាហកម្មសេវាកម្មរបស់ប្រទេសចិន បាននាំមកនូវឱកាសអាជីវកម្មដ៏ធំធេងដល់សហគ្រាសអន្តរជាតិ។ នៅឆមាសទីមួយឆ្នាំ២០២៤  ការនាំចូលខាងឧស្សាហកម្មសេវាកម្មរបស់ប្រទេសចិនមានដល់២.១ទ្រីលានយាន់ប្រាក់ចិន កើនឡើង១៦.៤ភាគរយបើប្រៀបធៀបនឹងរយៈពេលដូចគ្នានៃឆ្នាំ២០២៣។ ក្នុងពិព័រណ៌ពាណិជ្ជកម្មសេវាកម្មលើកនេះ រដ្ឋាភិបាលចិនបានដាក់ចេញវិធានការមួយចំនួន ដែលបានបង្កើនជំនឿចិត្តរបស់សហគ្រាសបរទេសក្នុងការធ្វើអាជីវកម្មនៅប្រទេសចិន។

    កិច្ចប្រជុំពេញអង្គលើកទី៣នៃគណៈកម្មាធិការមជ្ឈិមបក្សកុម្មុយនីស្តចិនអាណត្តិទី២០បានលើកឡើងថា  ត្រូវប្រកាន់ខ្ជាប់នូវគោលនយោបាយជាតិជាមូលដ្ឋានស្តីពីការបើកចំហចំពោះក្រៅប្រទេស  ដើម្បីកសាងប្រព័ន្ធសេដ្ឋកិច្ចថ្មីបែបបើកចំហប្រកបដោយកម្រិតកាន់តែខ្ពស់ ។ ការពន្លឿនការអភិវឌ្ឍពាណិជ្ជកម្មសេវាកម្មគឺជាចំណុចដ៏សំខាន់សម្រាប់ការពង្រីកការបើកចំហចំពោះក្រៅប្រទេសប្រកបដោយកម្រិតខ្ពស់  និងបណ្តុះបណ្តាលកម្លាំងចលករថ្មីសម្រាប់ការអភិវឌ្ឍពាណិជ្ជកម្មបរទេស។ នាពេលបច្ចុប្បន្ន   ការសាកល្បងចម្រុះក្នុងការពង្រីកការបើកចំហចំពោះក្រៅប្រទេសនៃឧស្សាហកម្មសេវាកម្មប្រទេសចិនបានដាក់ចេញវិធានការសាកល្បងចំនួនជាង១៣០០ផ្នែក នៅក្នុងវិស័យអាជីវកម្មចំនួន១៣  ដូចជាបច្ចេកវិទ្យា  ទូរគមនាគមន៍ វប្បធម៌និងទេសចរណ៍និងហិរញ្ញវត្ថុជាដើម។ ពិព័រណ៍ពាណិជ្ជកម្មសេវាកម្មលើកនេះ បានធ្វើឱ្យពិភពលោកមើលឃើញនូវកម្លាំង"ថ្មី"កាន់តែច្រើន  ក៏ដូចជាមើលឃើញពីភាពរស់រវើកនិងឱកាសដ៏ធំសម្បើមរបស់ការធ្វើទំនើបកម្មតាមបែបផែនចិន៕