ថ្ងៃទី២៣ខែសីហា  លោកស្រីMao Ningអ្នកនាំពាក្យក្រសួងការបរទេសចិនបានថ្លែងថាក្នុងបញ្ហាបង្ហូរទឹកសំណល់នុយក្លេអ៊ែរនៃរោងចក្រអគ្គិសនីដើរដោយថាមពលនុយក្លេអ៊ែរFukushimaទៅក្នុងសមុទ្រ  ភាគីជប៉ុនកាន់តែមានតម្លាភាពនិងបើកចំហ  កាន់តែមានអំណោយផលដល់ការបន្ធូរបន្ថយកង្វល់របស់សហគមន៍អន្តរជាតិ។ ភាគីចិនសូមដាស់តឿនម្តងទៀតឱ្យភាគីជប៉ុនឆ្លើយតបយ៉ាងហ្មត់ចត់ចំពោះកង្វល់ក្នុងស្រុកនិងបរទេស  ហើយរ៉ាបរងទំនួលខុសត្រូវនិងកាតព្វកិច្ចរបស់ខ្លួនដោយប្រាកដប្រជា។

      លោកស្រីMao Ningបានថ្លែងថា   ប្រទេសជប៉ុនបានចាប់ផ្តើមដំណើរការបង្ហូរទឹកសំណល់នុយក្លេអ៊ែរនៃរោងចក្រអគ្គិសនីដើរដោយថាមពលនុយក្លេអ៊ែរFukushimaទៅក្នុងសមុទ្រដោយឯកតោភាគី ក្នុងសភាពការណ៍ដែលមិនបានពិគ្រោះពិភាក្សាដោយពេញលេញជាមួយប្រទេសជិតខាង  បានផ្ទេរហានិភ័យនៃការបំពុលនុយក្លេអ៊ែរទៅឱ្យពិភពលោកទាំងមូល។ ទង្វើបែបនេះគឺរំលោភលើពាក្យសន្យារបស់ខ្លួន  គ្មានទំនួលខុសត្រូវហើយក៏មិនសមស្របនឹងច្បាប់អន្តរជាតិនិងវិធីរួមរស់នៅជាមួយប្រទេសជិតខាងផងដែរ។ ភាគីចិនប្រឆាំងយ៉ាងមុតមាំចំពោះករណីនេះជាប់រហូតមក  ហើយបានសម្តែងការយកចិត្តទុកដាក់យ៉ាងខ្លាំងចំពោះភាគីជប៉ុនជាច្រើនលើកច្រើនសារ។ បណ្តាប្រទេសដែលបូករួមទាំងភាគីចិនបានចាត់វិធានការបង្ការនិងឆ្លើយតបវិញ ដើម្បីគាំពារសុវត្ថិភាពចំណីអាហារនិងសុខភាពរបស់ប្រជាជន គឺត្រឹមត្រូវ សមហេតុផលនិងចាំបាច់ទាំងស្រុង។

      លោកស្រីMao Ningបានគូសបញ្ជាក់ថា ភាគីចិនសូមដាស់តឿនភាគីជប៉ុនឱ្យសហការដោយគ្រប់ជ្រុងជ្រោយក្នុងការបង្កើតការរៀបចំចាត់ចែងអំពីការតាមដានត្រួតពិនិត្យអន្តរជាតិរយៈពេលវែងដែលប្រកបដោយឯករាជ្យភាព និងប្រសិទ្ធភាពដែលមានការចូលរួមដោយពិតប្រាកដពីភាគីមានផលប្រយោជន៍ពាក់ព័ន្ធដូចជាប្រទេសជិតខាងជាដើម៕