ក្រសែភ្នែករបស់ពិភពលោកបានផ្តោតទៅរកអង្គការសហប្រតិបត្តិការសៀងហៃម្តងទៀត ប្រមុខរដ្ឋនៃរដ្ឋសមាជិកអង្គការសហប្រតិបត្តិការសៀងហៃបានជួបជុំគ្នានៅកាហ្សាក់ស្ថាន ដើម្បីធ្វើការពិភាក្សាពីបញ្ហាសន្តិសុខ និងការអភិវឌ្ឍក្នុងតំបន់។ តាមលទ្ធផលនៃការស្ទង់មតិចំពោះអ្នកលេងអ៊ីនធឺណិតនៅជុំវិញពិភពលោកដែលធ្វើឡើងដោយបណ្តាញ CGTN នៃអគ្គស្ថានីយវិទ្យុនិងទូរទស្សន៍មជ្ឈិមចិនឱ្យដឹងថា អ្នកផ្តល់បទសម្ភាសន៍បានសម្គាល់ជាទូទៅថា បន្ទាប់ពីការអភិវឌ្ឍអស់រយៈពេលជាង២០ ឆ្នាំ អង្គការសហប្រតិបត្តិការសៀងហៃបានក្លាយជារបាំងការពារសន្តិសុខក្នុងតំបន់ ស្ពាននៃកិច្ចសហប្រតិបត្តិការ ចំណងមិត្តភាព និង ជាកម្លាំងប្រកបដោយលក្ខណៈស្ថាបនា ក្នុងនោះ អ្នកផ្តល់បទសម្ភាសន៍ចំនួន ៨២,៨% រំពឹងទុកថា អង្គការសហប្រតិបត្តិការសៀងហៃ នឹងបញ្ចេញសំឡេងនៃបណ្តាប្រទេស “សកលខាងត្បូង” យ៉ាងសកម្ម និងជំរុញការបង្កើតសណ្តាប់ធ្នាប់អន្តរជាតិដែលប្រកបដោយភាពយុត្តិធម៌ និងសមហេតុផលជាងមុន ។
ជានិច្ចកាល អង្គការសហប្រតិបត្តិការសៀងហៃតែងតែប្រកាន់ខ្ជាប់នូវ "ស្មារតីសៀងហៃ" ដែល "មានទំនុកចិត្តទៅវិញទៅមក ផ្តល់ផលប្រយោជន៍ទៅវិញទៅមក សមភាព ការពិគ្រោះពិភាក្សា ការគោរពចំពោះភាពពិពិធកម្មខាងអរិយធម៌ និងការស្វែងរកការអភិវឌ្ឍរួម" ដោយបានត្រួសត្រាយផ្លូវអភិវឌ្ឍន៍នៃអង្គការអន្តរជាតិបែបថ្មីដែលរដ្ឋសមាជិកនៃអង្គការ គឺជាដៃគូប៉ុន្តែមិនចងជាបក្សសម្ព័ន្ធ ធ្វើការសន្ទនានិងមិនបង្កការប្រឈមមុខដាក់គ្នា។
នៅក្នុងការស្ទង់មតិលើកនេះ អ្នកផ្តល់បទសម្ភាសន៍ចំនួន ៩២,៧% បានឯកភាពយ៉ាងខ្លាំងចំពោះទស្សនៈនៃ "ស្មារតីសៀងហៃ" ហើយសម្គាល់ថា "ស្មារតីសៀងហៃ" គឺជាគំរូនៃទំនាក់ទំនងអន្តរជាតិបែបថ្មី ។