ប្រជាជនចិនត្រូវកាន់ចានបាយក្នុងដៃរបស់ខ្លួន ហើយផ្ទុកនូវស្បៀងរបស់ខ្លួន។ ពាក្យមួយឃ្លានេះដកស្រង់ចេញពីសុន្ទរកថាដែលថ្លែងដោយលោកប្រធានរដ្ឋចិន Xi Jinping ក្នុងដំណើរចុះត្រួតពិនិត្យនៅខេត្ត Heilongjiang កាលពីថ្ងៃទី ២៥ ខែកញ្ញា ឆ្នាំ ២០១៨។ ក្នុងនាមជាប្រទេសដែលមានប្រជាជនច្រើនសន្ធឹក និងប្រទេសកសិកម្មធំ សន្តិសុខស្បៀងគឺជាមូលដ្ឋានគ្រឹះសម្រាប់ធានាសន្តិសុខជាតិរបស់ប្រទេសចិន និងជាបញ្ហាយុទ្ធសាស្ត្រទូទៅដែលទាក់ទងនឹងការអភិវឌ្ឍសេដ្ឋកិច្ចជាតិ ស្ថិរភាពសង្គម និងភាពឯករាជ្យម្ចាស់រដ្ឋ។ បក្សកុម្មុយនីស្តចិនតែងតែចាត់ទុកការដោះស្រាយបញ្ហាស្បៀងអាហារជាកិច្ចការចម្បងក្នុងការគ្រប់គ្រងប្រទេស និងធានាសន្តិសុខជាតិ។

      បើស្បៀងរដូវក្តៅប្រមូលផលបានច្រើន នោះស្បៀងពេញមួយឆ្នាំក៏មានការធានាដែរ។ ពេលនេះ ខេត្ត Henan និងខេត្ត Shanxi ជាដើមបានចាប់ផ្តើមច្រូតស្រូវសាលីខណៈខេ ត្តHunan និងខេត្ត Hubei ជាដើមកំពុងមមាញឹកដាំស្រូវនិងស្ទូងសំណាប។

      នៅកសិដ្ឋាន Junken ក្នុងស្រុក Yangxin ខេត្ត Hubei ម៉ាស៊ីនស្ទូងស្រូវទំហំ ៩ អ៊ីញដែលប្រើពីមុនបានប្តូរទៅជាម៉ាស៊ីនស្ទូងស្រូវទំហំ ៧ អ៊ីញ។ បើប្រៀបធៀបជាមួយម៉ាស៊ីនស្ទូងស្រូវទំហំ ៩ អ៊ីញ គម្លាតជួរស្ទូងស្រូវត្រូវបានកាត់បន្ថយ ៥ សង់ទីម៉ែត្រ ហើយគម្លាតជួរដេកនៃសំណាបដែលស្ទូងរួចក៏ត្រូវបានកាត់បន្ថយ ៥ សង់ទីម៉ែត្រផងដែរ។ សូមកុំមើលស្រាលទំហំ ៥ សង់ទីម៉ែត្រនេះ វាអាចបង្កើនចំនួនសំណាបមូលដ្ឋានជាង ៤០០០ រន្ធក្នុងមួយស្រែ និងបង្កើនទិន្នផលពី ១០០ទៅ ១៥០ គីឡូក្រាម។

     វាលសាកល្បងម៉ាស៊ីនស្ទូងស្រូវទំហំ ៧អ៊ីញគឺជាដីស្រែស្តង់ដារខ្ពស់ដែលទើបសាងសង់ថ្មីនៅក្នុងស្រុក Yangxin ក្នុងប៉ុន្មានឆ្នាំចុងក្រោយនេះ។ តំបន់នេះបានពង្រាយ និងរួមបញ្ចូលគ្នានូវដីស្រែដែលនៅរាយប៉ាយ និងបែងចែកយ៉ាងល្អិតល្អន់ក្នុងដែនស្រុក ដើម្បីសម្រួលដល់ការធ្វើកសិកម្ម និងការគ្រប់គ្រងដោយម៉ាស៊ីន ទន្ទឹមនឹងនោះ ប្រឡាយទឹកត្រូវបានសាងសង់ឡើង ដើម្បីផ្គត់ផ្គង់ទឹកទាន់ពេលវេលាសម្រាប់ការលូតលាស់ស្រូវ។ ដោយប្រើបច្ចេកវិទ្យាថ្មីគួបផ្សំនឹងដីស្រែដែលមានស្តង់ដារខ្ពស់ ទិន្នផលក្នុងមួយmuត្រូវបានគេរំពឹងថានឹងកើនឡើង ១០% បើធៀបនឹងឆ្នាំមុន។ 

      ក្នុងរយៈពេលប៉ុន្មានឆ្នាំចុងក្រោយនេះ ទំហំផ្ទៃដីនៃការសាងសង់ដីកសិកម្មស្តង់ដារខ្ពស់ក្នុងខេត្តភាគកណ្តាលចិនមានការកើនឡើងជាលំដាប់។ ខេត្ត Henan បានអនុវត្តយ៉ាងតឹងរ៉ឹងនូវប្រព័ន្ធការពារដីដាំដុះ ដើម្បីធានាថាផ្ទៃដីសាបព្រួសមានចំនួនលើសពី ១០.៧៣ លានហិចតា  ហើយសាងសង់ជាងពាក់កណ្តាលនៃដីដាំដុះទៅជាដីកសិកម្មស្តង់ដារខ្ពស់។ ខេត្ត Hunan នឹងធ្វើឱ្យប្រសើរឡើងនូវដីស្រែស្តង់ដារខ្ពស់ចំនួន  ០.២១ លានហិចតានៅឆ្នាំនេះ ដើម្បីធានាថា ដីកសិកម្មមូលដ្ឋានអចិន្ត្រៃយ៍ចំនួន ៣២០ លានហិចតារបស់ ខេត្ត Hunan អាចប្រែក្លាយទៅជាដីកសិកម្មស្តង់ដារខ្ពស់។

      នៅមជ្ឈមណ្ឌលច្នៃប្រឌិតថ្មីឧស្សាហកម្មដាំដុះតំបន់ភ្នំ Yuelu ក្នុងទីក្រុង Changsha ខេត្ត Hunan លោក Li Le ដែលជាអ្នកស្រាវជ្រាវនៅមន្ទីរពិសោធន៍បង្កាត់ពូជកំពុងដាក់គ្រាប់ស្រូវដែលគ្មានសំបកចូលទៅក្នុងថាសគំរូ បន្ទាប់មកដាក់សំណាកនៅលើម៉ាស៊ីនស្វ័យប្រវត្តិ ដើម្បីទាញយក DNA ។ សំណាកនេះគឺជាពូជស្រូវដែលមានជាតិកាដ្យូមទាប ពីការសាកល្បងក្នុងវាលស្រែ ជាពូជដែលត្រូវបានជ្រើសរើស និងបង្កាត់ដោយមជ្ឈមណ្ឌលនេះដោយមានការផ្ទេរសិទ្ធិពីក្រុមហ៊ុនគ្រាប់ពូជ។

      គ្រាប់ពូជគឺជា "បន្ទះឈីប" នៃវិស័យកសិកម្ម។ មន្ទីរពិសោធន៍គ្រាប់ពូជ Nonggu Shennong មានទីតាំងនៅក្រុង Xinxiang ខេត្ត Henan ប្តេជ្ញាដោះស្រាយបញ្ហា "ជាប់គាំង" ក្នុងវិស័យបង្កាត់ពូជជីវសាស្រ្តរបស់ចិន។ ក្នុងឆ្នាំ ២០២៣ គម្រោងស្រាវជ្រាវវិទ្យាសាស្ត្រលើសណ្តែកដីនៅក្នុងមន្ទីរពិសោធន៍នេះបានឈ្នះពានរង្វាន់ពិសេសនៃការរីកចម្រើនវិទ្យាសាស្រ្តខេត្ត Henan ។

      លោក Ru Zhengang សាស្ត្រាចារ្យនៅសាកលវិទ្យាល័យវិទ្យាសាស្ត្រ និងបច្ចេកវិទ្យា Henan បានថ្លែងថា ប្រភេទពូជថ្មីគឺជាគន្លឹះសម្រាប់ជួយលើកកម្ពស់គុណភាព និងប្រសិទ្ធភាពនៃផលិតកម្មកសិកម្ម។ គ្រាប់ពូជទាក់ទងនឹងសិទ្ធិម្ចាស់ការនៃសន្តិសុខស្បៀង និងជីវភាពរស់នៅដ៏ល្អបវររបស់ប្រជាជន។ យើងត្រូវតែពង្រឹងការស្រាវជ្រាវលើបច្ចេកវិទ្យាគ្រាប់ពូជ និងប្រើប្រាស់គ្រាប់ពូជរបស់ចិនដើម្បីធានាសន្តិសុខស្បៀងអាហាររបស់ប្រទេសចិន។

      ក្នុងនាមជាមូលដ្ឋានផលិតស្បៀងដ៏សំខាន់នៃប្រទេសចិន តំបន់ភាគកណ្តាលចិនបានអនុវត្តសកម្មភាពលើកកំពស់សមត្ថភាពផលិតស្បៀងជុំថ្មី ដោយប្រើផ្ទៃដីដាំដុះប្រហែលមួយភាគបួនទូទាំងប្រទេស ដើម្បីផលិតស្បៀងជិតមួយភាគបីនៃទិន្នផលសរុបទូទាំងប្រទេសចិន ហើយបរិមាណផលិតស្បៀងជារៀងរាល់ឆ្នាំបានរក្សានូវ ២០០ ប៊ីលានគីឡូក្រាម។ "ឃ្លាំងស្បៀងនៃប្រទេសធំ" នឹងមានមូលដ្ឋានកាន់តែរឹងមាំ ហើយប្រជាជនចិននឹងកាន់តែមានជំនឿចិត្តក្នុងការធានា "ចានបាយ"របស់ខ្លួន៕