ថ្ងៃទី១៧ខែមិថុនា លោកLin Jian អ្នកនាំពាក្យក្រសួងការបរទេសចិនបានធ្វើជាអធិបតីក្នុងសន្និសីទកាសែតជាប្រចាំ។ អ្នកសារព័ត៌មានបានសួរសំណួរក្នុងសន្និសីទថា ក្រសួងការបរទេសហ្វីលីពីនបានចេញសេចក្តីថ្លែងការណ៍កាលពីថ្ងៃទី១៥ខែមិថុនាថា ភាគីហ្វីលីពីនបានដាក់សេចក្តីព្រាងច្បាប់ស្តីពីការកំណត់ព្រំដែនតំបន់ជាយទ្វីបក្រៅនៃសមុទ្រចិនខាងត្បូងទៅកាន់គណៈកម្មាធិការកំណត់ព្រំដែនតំបន់ជាយទ្វីបដើម្បីស្វែងរកការកំណត់សិទ្ធិផ្តាច់មុខរបស់ខ្លួនក្នុងការអភិវឌ្ឍធនធានធម្មជាតិនៅលំហសមុទ្រនេះដោយអនុលោមតាម《អនុសញ្ញាអង្គការសហប្រជាជាតិស្តីពីច្បាប់សមុទ្រ》។តើភាគីចិនមានការអត្ថាធិប្បាយយ៉ាងដូចម្តេច?
លោកLin Jianបានថ្លែងថា ប្រទេសចិននិងហ្វីលីពីនមានវិវាទក្នុងបញ្ហាទឹកដីនិងការកំណត់ព្រំដែនសមុទ្រនៅសមុទ្រចិនខាងត្បូង។ ការដែលហ្វីលីពីនលើកឡើងសេចក្តីព្រាងច្បាប់ស្តីពីការកំណត់ព្រំដែនតំបន់ជាយទ្វីបក្រៅនៃសមុទ្រចិនខាងត្បូងដោយឯកតោភាគី គឺបានរំលោភលើសិទ្ធិនិងផលប្រយោជន៍នៃអធិបតេយ្យភាពនិងសិទ្ធិគ្រប់គ្រងរបស់ប្រទេសចិន និងរំលោភលើច្បាប់អន្តរជាតិដែលបូករួមទាំង《អនុសញ្ញាអង្គការសហប្រជាជាតិស្តីពីច្បាប់សមុទ្រ》ផងដែរ ក៏ដូចជាបានរំលោភលើការកំណត់ពាក់ព័ន្ធនៃ《សេចក្តីប្រកាសប្រតិបត្តិនៃបណ្តាភាគីសមុទ្រចិនខាងត្បូង》។យោងតាមក្បួនច្បាប់ពិភាក្សានៃគណៈកម្មាធិការកំណត់ព្រំដែនតំបន់ជាយទ្វីប ប្រសិនបើសេចក្តីព្រាងច្បាប់ស្តីពីការកំណត់ព្រំដែនដែលដាក់ជូនដោយភាគីហ្វីលីពីនពាក់ព័ន្ធនឹងលំហសមុទ្រដែលមានវិវាទនោះ គណៈកម្មាធិការនេះមិនគួរយកទៅពិនិត្យពិភាក្សានិងទទួលស្គាល់ឡើយ៕