រសៀលថ្ងៃទី ២៩ ខែឧសភា នៅវិមានសភាប្រជាជនក្រុងប៉េកាំង លោក Xi Jinping ប្រធានរដ្ឋចិនបានជួបពិភាក្សាការងារជាមួយលោក Abdelfattah al Sisi ប្រធានាធិបតីអេហ្ស៊ីបដែលអញ្ជើញចូលរួមពិធីបើកកិច្ចប្រជុំថ្នាក់រដ្ឋមន្រ្តីលើកទី១០នៃវេទិកាសហប្រតិបត្តិការចិន-អារ៉ាប់ និងបំពេញទស្សនកិច្ចផ្លូវរដ្ឋនៅប្រទេសចិន ។

       ថ្លែងក្នុងកិច្ចជំនួប លោក Xi Jinping បានលើកឡើងថា ឆ្នាំនេះជាខួបទី១០ នៃការបង្កើតទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិននិងអេហ្ស៊ីប ។ ១០ ឆ្នាំកន្លងមក ទំនាក់ទំនងរវាងចិននិងអេហ្ស៊ីបបានក្លាយទៅជាគំរូដ៏រស់រវើកសម្រាប់ការរួមសាមគ្គីនិងធ្វើកិច្ចសហប្រតិបតិ្តការនិងផ្តល់ផលប្រយោជន៍ដល់គ្នាទៅវិញទៅមករវាងចិននិងប្រទេសអារ៉ាប់ អាហ្វ្រិក អ៊ីស្លាមនិងប្រទេសកំពុងអភិវឌ្ឍន៍ ។

      ប្រទេសចិនផ្តួចផ្តើមឱ្យមានពហុប៉ូលភាវូបនីយកម្មដ៏ស្មើភាពនិងមានរបៀបរៀបរយ និងសកលភាវូបនីយកម្មសេដ្ឋកិច្ចដែលផ្តល់ផលប្រយោជន៍ជាទូទៅនិងប្រកបដោយបរិយាបន្ន រីករាយរួមជាមួយភាគីអេហ្ស៊ីបកសាងទំនុកចិត្តចំពោះគ្នាឱ្យកាន់តែស៊ីជម្រៅឥតឈប់ឈរ ជំរុញកិច្ចសហប្រតិបតិ្តការ រួមគ្នាគាំពារសមភាពនិងយុត្តិធម៌អន្តរជាតិ និងផលប្រយោជន៍រួមរបស់ប្រទេសកំពុងអភិវឌ្ឍន៍ ក្នុងន័យរួមចំណែកជាកម្លាំងកាយចិត្តដល់សន្តិភាព ស្ថិរភាព វឌ្ឍនភាពនិងវិបុលភាពក្នុងតំបន់និងពិភពលោក ៕