"ប្រទេសចិនមានក្តីសោមនស្សរីករាយដែលបានមើលឃើញសហរដ្ឋអាមេរិកប្រកបដោយជំនឿចិត្តលើខ្លួនឯង ភាពបើកទូលាយ វិបុលភាពនិងការអភិវឌ្ឍ ហើយរំពឹងថា សហរដ្ឋអាមេរិកក៏នឹងប្រើក្រសែភ្នែកដ៏វិជ្ជមានទៅមើលការអភិវឌ្ឍរបស់ប្រទេសចិនផងដែរ" ។ កាលពីថ្ងៃទី ២៦ ខែមេសា លោក Xi Jinping ប្រធានរដ្ឋចិនបានបង្ហាញអាកប្បកិរិយាដូចពោលខាងលើនៅពេលជួបពិភាក្សាការងារជាមួយលោក Antony Blinken រដ្ឋមន្ត្រីការបរទេសអាមេរិកដែលបានបំពេញទស្សនកិច្ចនៅប្រទេសចិន ។ ក្នុងកិច្ចជំនួបលើកនេះ ភាគីសហរដ្ឋអាមេរិកបានរំលឹកឡើងវិញពីកិច្ចសន្យាផ្នែកនយោបាយជាច្រើនចំពោះប្រទេសចិន ហើយរំពឹងថា នឹងរក្សាការប្រាស្រ័យទាក់ទងជាមួយប្រទេសចិន អនុវត្តយ៉ាងផ្ចិតផ្ចង់នូវគំនិតឯកភាពរួមដែលប្រមុខរដ្ឋនៃប្រទេសទាំងពីរបានឈានដល់នៅក្រុងសាន់ហ្វ្រាន់ស៊ីស្កូ ដើម្បីជំរុញឱ្យទំនាក់ទំនងរវាងសហរដ្ឋអាមេរិកនិងប្រទេសចិនទទួលបានការអភិវឌ្ឍប្រកបដោយស្ថិរភាព ។
ចាប់តាំងពីកិច្ចជំនួបរវាងប្រមុខរដ្ឋចិននិងអាមេរិកនៅក្រុងសាន់ហ្វ្រាន់ស៊ីស្កូកាលពីខែវិច្ឆិកា ឆ្នាំ ២០២៣កន្លងមក ទំនាក់ទំនងរវាងចិននិងអាមេរិកបានបញ្ឈប់ការធ្លាក់ចុះនិងឆ្ពោះទៅរកស្ថិរភាពជាទូទៅ ដោយឡែកភាគីទាំងពីរបានធ្វើកិច្ចសន្ទនានិងកិច្ចសហប្រតិបត្តិការមួយចំនួនក្នុងវិស័យកិច្ចការទូត សេដ្ឋកិច្ចនិងពាណិជ្ជកម្ម ការអនុវត្តច្បាប់ កសិកម្មនិងកងទ័ពទាំងពីរជាដើម ។ ដំណើរទស្សនកិច្ចរបស់លោក Antony Blinken នៅប្រទេសចិនលើកនេះបានបន្តនិន្នាការនៃការប្រាស្រ័យទាក់ទងជាន់ខ្ពស់រវាងប្រទេសទាំងពីរ ។ ក្នុងអំឡុងដំណើរទស្សនកិច្ចលើកនេះ ភាគីទាំងពីរបានឈានដល់គំនិតឯកភាពរួម ៥ ចំណុច ក្នុងនោះបូករួមទាំងការបន្តធ្វើការប្រាស្រ័យទាក់ទងរវាងកងទ័ពទាំងពីរ ជំរុញថែមមួយកម្រិតទៀតនូវកិច្ចសហប្រតិបត្តិការរវាងចិននិងអាមេរិកក្នុងវិស័យប្រយុទ្ធប្រឆាំងគ្រឿងញៀន បម្រែបម្រួលអាកាសធាតុនិងភាពវៃឆ្លាតសិប្បនិម្មិត ក៏ដូចជាពង្រីកការផ្លាស់ប្តូររវាងប្រជាជននិងប្រជាជនជាដើម ប្រការទាំងនេះបានបង្ហាញឱ្យឃើញថា ភាគីទាំងពីរសុទ្ធតែមានឆន្ទៈរក្សាការសន្ទនា គ្រប់គ្រងការខ្វែងគំនិតនិងជំរុញកិច្ចសហប្រតិបត្តិការដើម្បីពន្លឿនការអនុវត្តគំនិតឯកភាពរួមនៅក្រុងសាន់ហ្វ្រាន់ស៊ីស្កូរវាងប្រមុខរដ្ឋនៃប្រទេសទាំងពីរ ។
ព្រមពេលជាមួយគ្នានេះ យើងក៏ត្រូវមើលឃើញដែរថា ទោះបីជាទំនាក់ទំនងរវាងចិននិងអាមេរិកមានការកែសម្រួលក៏ដោយ ប៉ុន្តែកត្តាអវិជ្ជមានក៏បានកើនឡើងផងដែរ ។ ពីការឃោសនាបំប៉ោងជាញឹកញាប់នូវអ្វីដែលហៅថា "អតិរេកសមត្ថភាពផលិតកម្ម"របស់ឧស្សាហកម្មថាមពលថ្មីនៃប្រទេសចិនរហូតដល់ការអនុម័តលើសេចក្តីព្រាងច្បាប់ស្តីពីការផ្តល់ជំនួយដល់បរទេសដែលពាក់ព័ន្ធនឹងតំបន់ចិនតៃវ៉ាន់ ពីការមួលបង្កាច់លើបញ្ហាសិទ្ធិមនុស្សនៅតំបន់ស៊ីនជាំងរហូតដល់ការបង្កើតជា"ក្រុមសម្ព័ន្ធតូច"ដើម្បីទប់ស្កាត់ការអភិវឌ្ឍរបស់ប្រទេសចិននៅអាស៊ីប៉ាស៊ីហ្វិក ទង្វើជាបន្តបន្ទាប់របស់អាមេរិកបែបនេះបាននាំមកនូវផលប៉ះពាល់អវិជ្ជមានយ៉ាងធ្ងន់ធ្ងរដល់ទំនាក់ទំនងរវាងចិននិងអាមេរិក ។
លោក Li Haidong សាស្ត្រាចារ្យនៃវិទ្យាស្ថានការទូតរបស់ចិនបានវិភាគថា ទង្វើដែលនិយាយផ្សេងធ្វើផ្សឹងបែបនេះគឺជាចរិតអាក្រក់មួយរបស់រដ្ឋាភិបាលអាមេរិកក្នុងការដោះស្រាយទំនាក់ទំនងជាមួយប្រទេសចិន ។ បើមើលឱ្យកាន់តែស៊ីជម្រៅអាចឃើញថា មួយផ្នែក សហរដ្ឋអាមេរិកត្រូវការធ្វើកិច្ចសហប្រតិបត្តិការជាមួយប្រទេសចិន តែមួយផ្នែកទៀត ក៏ព្យាយាមទប់ស្កាត់ការអភិវឌ្ឍរបស់ប្រទេសចិន ប្រការនេះបង្ហាញឱ្យឃើញថា អ្នកនយោបាយមួយចំនួនរបស់អាមេរិកបាននិងកំពុងប្រកាន់ខ្ជាប់នូវទស្សនៈផលបូកសូន្យដែលបានចាត់ទុកចិនថាជា"គូប្រជែងយុទ្ធសាស្ត្រធំបំផុត"ដោយខុសឆ្គង ហើយបានធ្វើវិនិច្ឆ័យដោយខុសឆ្គងខាងយុទ្ធសាស្ត្រចំពោះគោលបំណងអភិវឌ្ឍន៍របស់ចិន ។
សូមបញ្ជាក់ថា គោលបំណងអភិវឌ្ឍន៍របស់ចិនគឺធ្វើឱ្យប្រជាជនអាចមានជីវភាពរស់នៅដ៏ល្អប្រសើរ តែមិនមែនជំនួសអាមរិកនោះទេ ។ ជាងនេះទៅទៀត ជានិច្ចកាល ប្រទេសចិនតែងតែវាយតម្លៃទំនាក់ទំនងរវាងចិននិងអាមេរិកដោយឈរលើមុំគាំពារសុខសុភមង្គលជាមូលដ្ឋានរបស់ប្រជាជននៃប្រទេសទាំងពីរ គាំពារសន្តិភាពនិងស្ថិរភាពពិភពលោក ក៏ដូចជាផ្តួចផ្តើមឱ្យគោរពគ្នាទៅវិញទៅមក រួមរស់ជាមួយគ្នាដោយសនិ្តសហវិជ្ជមាននិងធ្វើកិច្ចសហប្រតិបតិ្តការឈ្នះ-ឈ្នះ ។
ក្នុងអំឡុងពេលដំណើរទស្សនកិច្ចរបស់លោក Antony Blinken នៅប្រទេសចិនលើកនេះ ប្រទេសចិនបានដាស់តឿនម្តងទៀតឱ្យសហរដ្ឋអាមេរិកគិតពិចារណាពីទិសដៅនៃទំនាក់ទំនងចិន-អាមេរិក ហើយបានទាមទារឱ្យសហរដ្ឋអាមេរិកបញ្ឈប់បំពាក់អាវុធឱ្យតំបន់តៃវ៉ាន់ ក៏ដូចជាសង្កត់ធ្ងន់ថា សិទ្ធិនិងផលប្រយោជន៍អភិវឌ្ឍន៍របស់ប្រជាជនចិន គឺមិនអាចដកហូតបាន ។ ប្រសិនបើសហរដ្ឋអាមេរិកពិតជាចង់គ្រប់គ្រងទំនាក់ទំនងរវាងចិននិងអាមេរិកប្រកបដោយទំនួលខុសត្រូវ នោះក៏គួរតែស្តាប់ឱ្យបានច្បាស់នូវសំឡេងទាំងនេះ ហើយនឹងអនុវត្តពាក្យសន្យារបស់ខ្លួនតាមរយៈសកម្មភាពជាក់ស្តែង ។
នាពេលបច្ចុប្បន្ននេះ និន្នាការស្ថិរភាពនៃទំនាក់ទំនងរវាងចិននិងអាមេរិក គឺបានមកដោយមិនងាយទេ ហើយក៏ទទួលបានការស្វាគមន៍ពីសំណាក់គ្រប់មជ្ឈដ្ឋាននៃប្រទេសទាំងពីរនិងសហគមន៍អន្តរជាតិផងដែរ ។ ភាគីទាំងពីរគួរបន្តធ្វើកិច្ចខិតខំប្រឹងប្រែងដើម្បីជំរុញឱ្យ"ចក្ខុវិស័យក្រុងសាន់ហ្វ្រាន់ស៊ីស្កូ"ក្លាយទៅជា"ការពិត" ក៏ដូចជាជំរុញឱ្យទំនាក់ទំនងរវាងចិននិងអាមេរិកមានស្ថិរភាព មានភាពល្អប្រសើរឡើងនិងវិវឌ្ឍរីកចម្រើនទៅមុខដ៏ពិតប្រាកដ ៕
