ដោយសារសហរដ្ឋអាមេរិកដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខបានបោះឆ្នោតវេតូ ដូច្នេះ ក្រុមប្រឹក្សាសន្តិសុខនៃអង្គការសហប្រជាជាតិមិនបានអនុម័តលើសេចក្តីព្រាងច្បាប់នៃសេចក្តីសម្រេចចិត្តស្តីពី “ការស្នើឱ្យមហាសន្និបាតអង្គការសហប្រជាជាតិទទួលយកប៉ាឡេស្ទីនជារដ្ឋសមាជិកផ្លូវការនៃអង្គការសហប្រជាជាតិ” ។ លោក Fu Cong តំណាងចិនប្រចាំជាអចិន្ត្រៃយ៍នៅអង្គការសហប្រជាជាតិបានថ្លែងសុន្ទរកថាដើម្បីធ្វើការបកស្រាយបន្ទាប់ពីការបោះឆ្នោតថា ភាគីចិនសម្តែងការអស់សង្ឃឹមយ៉ាងខ្លាំងចំពោះការសម្រេចចិត្តរបស់អាមេរិក ។

លោក Fu Cong បានគូសបញ្ជាក់ថា ការបង្កើតរដ្ឋឯករាជ្យជាសិទ្ធិជនជាតិដែលមិនអាចដកហូតបានរបស់ប្រជាជនប៉ាឡេស្ទីន ដែលមិនអាចសង្ស័យឬយកមកជួញដូរនោះទេ ។ ក្នុងសភាពការណ៍ដែលភាគីអ៊ីស្រាអែលបង្ហាញអាកប្បកិរិយាបដិសេធកាន់តែច្បាស់លាស់ចំពោះ “ដំណោះស្រាយរដ្ឋពីរ” ការដែលអង្គការសហប្រជាជាតិទទួលយកប៉ាឡេស្ទីនជារដ្ឋសមាជិកផ្លូវការ គឺអាចធ្វើឱ្យប៉ាឡេស្ទីនមានឋានៈស្មើគ្នានឹងអ៊ីស្រាអែល ដែលនឹងមានអំណោយផលដល់ការបង្កលក្ខណសម្បត្តិសម្រាប់ការចរចារវាងប៉ាឡេស្ទីននិងអ៊ីស្រាអែល ។

លោក Fu Cong បានថ្លែងថា យើងជឿជាក់ថា នៅថ្ងៃណាមួយ ប្រទេសប៉ាឡេស្ទីនមុខជានឹងទទួលបានសិទ្ធិស្មើគ្នានឹងរដ្ឋសមាជិកផ្សេងទៀតនៃអង្គការសហប្រជាជាតិជាមិនខាន ហើយដើម្បីឱ្យថ្ងៃនោះបានមកដល់ក្នុងពេលឆាប់ៗ ភាគីចិននឹងបន្តខិតខំប្រឹងប្រែងអស់ពីលទ្ធភាព ដើម្បីដើរតួនាទីមានលក្ខណៈស្ថាបនា ៕