នៅថ្ងៃទី១៨ខែមេសា មានអ្នកសារព័ត៌មានសួរថា ពេលថ្មីៗកន្លងទៅនេះ លោក Ferdinand Romualdez Marcos ប្រធានាធិបតីហ្វីលីពីនបានថ្លែងជាច្រើនលើកថា លោកនៅតែមានចម្ងល់មួយចំនួនចំពោះ “កិច្ចសន្យាផ្ទាល់មាត់”អំពីបញ្ហាថ្មប៉ប្រះទឹក Ren'ai ដដែល ពោលគឺ តើកិច្ចសន្យានេះមានខ្លឹមសារអ្វីខ្លះ?ហេតុអ្វីបានជារដ្ឋាភិបាលហ្វីលីពីនអាណត្តិមុននិងភាគីចិនឈានដល់ “កិច្ចសន្យាសម្ងាត់”?តើអ្នកនាំពាក្យនៃស្ថានទូតចិនប្រចាំនៅហ្វីលីពីនមានការអធិប្បាយយ៉ាងណាអំពីករណីនេះ?
អ្នកនាំពាក្យនៃស្ថានទូតចិនប្រចាំនៅហ្វីលីពីនបានឆ្លើយថា ក្នុងអំឡុងពេលរដ្ឋាភិបាលហ្វីលីពីនអាណត្តិមុនកាន់អំណាច ភាគីទាំងពីរចិននិងហ្វីលីពីនបានឈានដល់ “កិច្ចសន្យាផ្ទាល់មាត់”អំពីការគ្រប់គ្រងស្ថានការណ៍ថ្មប៉ប្រះទឹក Ren'ai ។ គោលបំណងនៃ“កិច្ចសន្យាផ្ទាល់មាត់”នេះគឺគ្រប់គ្រងស្ថានការណ៍ គាំពារសន្តិភាពនិងបង្ការការប៉ះទង្គិច គឺមិនពាក់ព័ន្ធនឹងអធិបតេយ្យភាពនិងគោលជំហររៀងៗខ្លួនទេ ។ “កិច្ចសន្យាផ្ទាល់មាត់”នេះមិនមែនជាកិច្ចសន្យាសម្ងាត់ទេ ។
បន្ទាប់ពីរដ្ឋាភិបាលហ្វីលីពីនអាណត្តិនេះឡើងកាន់អំណាច ភាគីចិនបានរាយការណ៍និងពិភាក្សាអំពីកិច្ចការពាក់ព័ន្ធនឹង“កិច្ចសន្យាផ្ទាល់មាត់”នេះជាមួយថ្នាក់ដឹកនាំជាន់ខ្ពស់នៃរដ្ឋាភិបាលហ្វីលីពីន ហើយប្រកាន់ខ្ជាប់ការស្វែងរកមធ្យោបាយគ្រប់គ្រងការខ្វែងគំនិតជាមួយភាគីហ្វីលីពីនតាមរយៈកិច្ចសន្ទនានិងការពិគ្រោះពិភាក្សាជាប់រហូតមក ។ ភាគីចិនដាស់តឿនម្តងទៀតឱ្យភាគីហ្វីលីពីនគោរពតាមពាក្យសន្យានិងគំនិតឯកភាពរួម ប្រើភាពស្មោះត្រង់ បញ្ឈប់ការបង្ករឿងហេតុ ដើម្បីរួមជាមួយភាគីចិនគាំពារសន្តិភាពនិងស្ថិរភាពដែលបានមកដោយមិនងាយនៅតំបន់សមុទ្រចិនខាងត្បូង ៕