ថ្ងៃទី១៦ខែមេសា រដ្ឋបាលជាតិស្ថិតិចិនបានចេញផ្សាយទិន្នន័យសេដ្ឋកិច្ចសំខាន់ៗប្រចាំត្រីមាសទីមួយឆ្នាំ២០២៤។ សេដ្ឋកិច្ចចិនមានការចាប់ផ្តើមដ៏ល្អប្រសើរ កត្តាវិជ្ជមានមានការកើនឡើងជាច្រើន ដែលបានបង្កើតជាមូលដ្ឋានដ៏ល្អប្រសើរសម្រាប់ការសម្រេចបាននូវគោលដៅភារកិច្ចពេញមួយឆ្នាំ។
លោកZhao Tongluប្រធាននាយកដ្ឋានគណនាសេដ្ឋកិច្ចជាតិចិនបានលើកឡើងថា នៅក្នុងត្រីមាសទីមួយនៃឆ្នាំ២០២៤ គ្រប់តំបន់និងគ្រប់ក្រសួងស្ថាប័នបានប្រកាន់ខ្ជាប់នូវមូលដ្ឋានជាទូទៅនៃការងារស្វែងរកវឌ្ឍនភាពក្នុងភាពនឹងនរ ផ្តោតសំខាន់ទៅលើការពង្រីកតម្រូវការក្នុងស្រុក និងកែលម្អរចនាសម្ព័ន្ធ តម្រូវការផ្នែកផលិតកម្មកើនឡើងប្រកបដោយស្ថិរភាព ហើយការដំណើរការនៃសេដ្ឋកិច្ចសម្រេចបាននូវការចាប់ផ្តើមដ៏ល្អប្រសើរ។
លោកTang Weiweiប្រធាននាយកដ្ឋានស្ថិតិឧស្សាហកម្មបានលើកឡើងថា នៅក្នុងត្រីមាសទីមួយនៃឆ្នាំ២០២៤ ឧស្សាហកម្មផលិតកម្មបានកើនឡើងជាលំដាប់ ប្រសិទ្ធភាពរបស់សហគ្រាសបន្តកែលម្អ ការនាំចេញផលិតផលឧស្សាហកម្មបានប្រែពីការធ្លាក់ចុះទៅការកើនឡើង កម្រិតកំណើននិងការរំពឹងទុករបស់សហគ្រាសមានភាពប្រសើរឡើង គុណភាពនៃការអភិវឌ្ឍសេដ្ឋកិច្ចឧស្សាហកម្មមានភាពប្រសើរឡើងជាលំដាប់ដែលសម្រេចបាននូវការចាប់ផ្តើមដ៏ល្អប្រសើរ៕