ដោយមិនអើពើនឹងការប្រឆាំងយ៉ាងខ្លាំងទាំងជាតិនិងអន្តរជាតិ ក្រុមហ៊ុនថាមពលអគ្គិសនីក្រុងតូក្យូនៃប្រទេសជប៉ុនបានចាប់ដំណើរការនូវការងារបង្ហូរទឹកសំណល់នុយក្លេអ៊ែរនៃរោងចក្រអគ្គិសនីដើរដោយថាមពលនុយក្លេអ៊ែរហ្វូគូស៊ីម៉ាទៅក្នុងសមុទ្រលើកទី ៣ កាលពីថ្ងៃទី ២ ខែវិច្ឆិកា ។ ក្រុមហ៊ុនថាមពលអគ្គិសនីក្រុងតូក្យូបានអះអាងថា កំហាប់នៃសារធាតុវិទ្យុសកម្មទ្រីទីយ៉ូម(Tritium)ក្នុងទឹកវិទ្យុសកម្មនុយក្លេអ៊ែរដែលត្រូវបានបង្ហូរទៅក្នុងសមុទ្រ គឺ សមស្របនឹងការប៉ាន់ប្រមាណ "។ យ៉ាងណាមិញ កាលពីមួយសប្តាហ៍មុន សហគ្រាសដែលមានកេរ្តិ៍ឈ្មោះអសោចនេះបានកើតហេតុការណ៍បែកខ្ចាយទឹកវិទ្យុសកមមួយលើកដែលបណ្តាលឱ្យបុគ្គលិកការងារពីរនាក់ត្រូវបានបញ្ជូនទៅមន្ទីរពេទ្យសង្រ្គោះបន្ទាន់ភ្លាម ។ ប្រការនេះបានបញ្ជាក់ថា ពាក្យសំដីរបស់ជប៉ុនដែលថា ទឹកវិទ្យុសកម្មនុយក្លេអ៊ែរ"មានសុវត្ថិភាព" គឺដាច់ខាតមិនអាចជឿជាក់បានទេ ហើយហានិភ័យក្នុងដំណើរការចាត់ចែងទឹកសំណល់នុយក្លេអ៊ែរមិនអនុញ្ញាតឱ្យមើលស្រាលនោះឡើយ ។
តាមការផ្សាយដំណឹងនៃទីភ្នាក់ងារសារព័ត៌មាន Kyodo របស់ជប៉ុនឱ្យដឹងថា កាលពីថ្ងៃទី ២៥ ខែតុលា បុគ្គលិកការងារ ៥ នាក់នៃក្រុមហ៊ុនថាមពលអគ្គិសនីក្រុងតូក្យូត្រូវបានប៉ះពាល់នឹងទឹកសំណល់ដែលមានសារធាតុវិទ្យុសកម្មខណៈពេលត្រួតពិនិត្យបំពង់បង្ហូរនៃប្រព័ន្ធប្រព្រឹត្តកម្មទឹកបែបទំនើប(ALPS)សម្រប់ធ្វើប្រព្រឹត្តកម្មទឹកវិទ្យុសកម្មនុយក្លេអ៊ែរ ។ ក្នុងចំណោមបុគ្គលិកការងារទាំងពីរនាក់ដែលត្រូវបានបញ្ជូនទៅមន្ទីរពេទ្យ ម្នាក់បានរងការបំពុលពេញខ្លួន ហើយម្នាក់ទៀតរងការបំពុលផ្នែកដៃទាំងគូនិងពាក់កណ្ដាលខ្លួនចុះក្រោម ។ ឆ្លងតាមរយៈការបន្សាបសារធាតុពុលដែលអស់រយៈពេលជាច្រើនម៉ោង បរិមាណវិទ្យុសកម្មនៅលើផ្ទៃរាងកាយរបស់ពួកគេនៅមិនទាន់បានធ្លាក់ចុះដល់មក្រោមស្តង់ដារសុវត្ថិភាពនៅឡើយទេ ។
ការសិក្សាស្រាវជ្រាវជាច្រើនបានបង្ហាញឱ្យឃើញថា ទឹកសំណល់នុយក្លេអ៊ែរនៃរោងចក្រអគ្គិសនីដើរដោយថាមពលនុយក្លេអ៊ែរហ្វូគូស៊ីម៉ាមានផ្ទុកសារធាតុវិទ្យុសកម្មនុយក្លេអ៊ែរជាង ៦០ ប្រភេទ ។ ដើម្បីធ្វើឱ្យមានភាពស្របច្បាប់នូវការបង្ហូរទឹកសំណល់ទៅក្នុងសមុទ្រ រដ្ឋាភិបាលជប៉ុននិងក្រុមហ៊ុនថាមពលអគ្គិសនីក្រុងតូក្យូបានផ្សព្វផ្សាយយ៉ាងគឃ្លើនក្នុងប៉ុន្មានឆ្នាំចុងក្រោយនេះថា សុវត្ថិភាពនៃទឹកវិទ្យុសកម្មនុយក្លេអ៊ែរដែលធ្វើប្រព្រឹត្តកម្មរួចដោយប្រព័ន្ធប្រព្រឹត្តកម្មទឹកបែបទំនើប(ALPS) គឺ ស្របតាមស្តង់ដារ ។ សូម្បីតែមន្ត្រីជាន់ខ្ពស់ជប៉ុនជាច្រើនរូបបាននិយាយពាក្យកុហកដោយចេតនាថា ទឹកវិទ្យុសកម្មនុយក្លេអ៊ែរ"អាចផឹកបាន" ។
ប៉ុន្តែ តើការពិតគឺអ្វី ? យោងតាមទិន្នន័យដែលបានចេញផ្សាយដោយប្រទេសជប៉ុនកាលពីខែមីនាឆ្នាំនេះបានបង្ហាញថា ទឹកវិទ្យុសកម្មនុយក្លេអ៊ែរដែលធ្វើប្រព្រឹត្តកម្មរួចតាមរយៈប្រព័ន្ធប្រព្រឹត្តកម្មទឹកបែបទំនើប(ALPS)មានចំនួនប្រហែល ៧០ ភាគរយមិនបានឡើងដល់ស្តង់ដារបញ្ចេញ ហើយត្រូវចម្រោះសារជាថ្មីឡើងវិញ ។ តាមការផ្សាយដំណឹងឱ្យដឹងថា បន្ទាប់ពីកើតហេតុការណ៍បែកខ្ចាយទឹកវិទ្យុសកម្មលើកនេះ ក្រុមហ៊ុន TEPCO បានត្រួតពិនិត្យចំពោះឧបករណ៍វាស់សារធាតុវិទ្យុសកម្មដែលបំពាក់ទៅលើបុគ្គលិកការងារទាំងពីរនាក់ដោយបានបញ្ជាក់ថា បន្ទាប់ពីកើតហេតុការណ៍លើកនេះ កម្រិតអតិបរមាដែលពួកគេត្រូវបានប៉ះពាល់នឹងកាំរស្មី(β) គឺ ៦,៦ (mSv)ដែលខ្ពស់ជាងបន្ទាត់ប្រុងប្រយ័ត្នដែលមានកម្រិតត្រឹម ៥ (mSv) ។ នេះក៏បានបង្ហាញឱ្យឃើញពីមួយផ្នែកទៀតថា ទឹកវិទ្យុសកម្មនុយក្លេអ៊ែរនៃរោងចក្រអគ្គិសនីដើរដោយថាមពលនុយក្លេអ៊ែរហ្វូគូស៊ីម៉ាមានសារធាតុវិទ្យុសកម្មច្រើនបង្គួរ ហើយដំណើរការធ្វើប្រព្រឹត្តកម្មនឹងមានហានិភ័យយ៉ាងខ្លាំង ។
បន្ទាប់ពីកើតមានហេតុការណ៍បែកខ្ចាយទឹកវិទ្យុសកម្ម មន្ត្រីរបរនេសាទនៃហ្វូគូស៊ីម៉ាបានថ្លែងថា ពួកគេបានបាត់បង់ទំនុកចិត្តចំពោះក្រុមហ៊ុន TEPCO ។ តាមការផ្សាយដំណឹងនៃប្រព័ន្ធសារព័ត៌មានឱ្យដឹងថា បន្ទាប់ពីចូលនិវត្តន៍ មន្ត្រីជាន់ខ្ពស់របស់ជប៉ុនជាច្រើនរូបបានក្លាយជាទីប្រឹក្សារបស់ក្រុមហ៊ុន TEPCO ឯឥស្សរជនខាងឧស្សាហកម្មថាមពលនុយក្លេអ៊ែរក៏អាចចូលរួមក្នុងក្រុមការងារប្រឹក្សាយោបល់ស្តីពីគោលនយោបាយរបស់រដ្ឋាភិបាលផងដែរ ។ ប្រការទាំងនេះបានសម្រេចថា ស្ថាប័នត្រួតពិនិត្យនិងគ្រប់គ្រងរបស់ជប៉ុនបានបើកភ្នែកម្ខាងបិទភ្នែកម្ខាងចំពោះទង្វើដ៏អាក្រក់ជាច្រើនរបស់ក្រុមហ៊ុន TEPCO ។
គិតរហូតដល់បច្ចុប្បន្ននេះ ការបង្ហូរទឹកសំណល់នុយក្លេអ៊ែរទៅក្នុងសមុទ្ររបស់ប្រទេសជប៉ុនបានដំណើរការអស់រយៈពេលជាងពីរខែហើយ ។ ហេតុការណ៍ដែលកើតឡើងថ្មីបំផុតបានបង្ហាញថា ចាំបាច់ត្រូវបង្កើតយន្តការតាមដានត្រួតពិនិត្យអន្តរជាតិដែលប្រកបដោយប្រសិទ្ធភាពនិងយូរអង្វែង ។ ប្រសិនបើប្រទេសជប៉ុនពិតជាមានជំនឿចិត្តលើ"សុវត្ថិភាព"របស់ទឹកសំណល់នុយក្លេអ៊ែរ នោះ ក៏គួរតែចាត់ចែងទឹកសំណល់នុយក្លេអ៊ែរតាមទម្រង់ទំនួលខុសត្រូវនិងគាំទ្រដល់ការបង្កើតយន្តការត្រួតពិនិត្យយូរអង្វែងដែលមានបណ្តាភាគីនានាដែលត្រូវរងផលប៉ះពាល់ចូលរួមយ៉ាងពេញលេញ ៕
