ថ្ងៃទី ២០ ខែឧសភា អ្នកនាំពាក្យក្រសួងការបរទេសចិនបានឆ្លើយសំណួររបស់អ្នកការសែតអំពីការដែលកិច្ចប្រជុំកំពូលក្រុមប្រទេសG7 ក្រុងហ៊ីរ៉ូស៊ីម៉ាបានឃោសនាបំប៉ោងបញ្ហាពិភាក្សាទាក់ទិននឹងចិន។
អ្នកកាសែតបានសួរថា តាមការផ្សាយព័ត៌មាន កិច្ចប្រជុំកំពូលក្រុមប្រទេសG7 ក្រុងហ៊ីរ៉ូស៊ីម៉ាបានចេញផ្សាយឯកសារមួយចំនួនបូករួមទាំងសេចក្តីថ្លែងការណ៍រួម ដែលបានឃោសនាបំប៉ោងបញ្ហាពិភាក្សាពាក់ព័ន្ធនឹងប្រទេសចិន បាននិយាយឆ្ការដៃឆ្ការជើងចំពោះសភាពការណ៍ច្រកសមុទ្រតៃវ៉ាន់ និងសមុទ្រចិនខាងកើត , សមុទ្រចិនខាងត្បូង , តំបន់ហុងកុង , តំបន់ Xinjiang និងតំបន់ Xizang ក៏ដូចជាកម្លាំងនុយក្លេអ៊ែររបស់ចិន ដោយបានអះអាងថាប្រឆាំងការកែប្រែសភាពការណ៍បច្ចុប្បន្នដោយឯកតោភាគី លើសពីនេះទៀតបាននិយាយបញ្ឆិតបញ្ឆៀងថាចិនបានធ្វើ “ ការគំរាមកំហែងខាងសេដ្ឋកិច្ច ” ។ តើភាគីចិនវាយតម្លៃយ៉ាងណាចំពោះការនេះ?
អ្នកនាំពាក្យបានឆ្លើយតបថា ក្រុមប្រទេស G7 បានអះអាងពីការ “ បោះជំហានទៅកាន់ពិភពលោកដែលមានសន្តិភាព ស្ថិរភាព និងភាពរុងរឿង ” ខណៈពេលបានធ្វើការរារាំងសន្តិភាពអន្តរជាតិ បំផ្លាញស្ថិរភាពក្នុងតំបន់ និងដាក់កំហិតលើការអភិវឌ្ឍរបស់ប្រទេសដទៃ ដែលជាទង្វើដែលមិនគោរពពាក្យសច្ចៈលើផ្ទៃអន្តរជាតិ។ ក្រុមប្រទេស G7 មិនអើពើក្តីកង្វល់ដ៏ខ្លាំងក្លារបស់ភាគីចិនទេ បែរជាទទូចលេងឧបាយកលនយោបាយចំពោះបញ្ហាពិភាក្សាដែលទាក់ទិននឹងចិន ក្នុងគោលបំណងលាបពណ៏ចិន, វាយប្រហារចិន, ចូលជ្រៀតជ្រែកយ៉ាងកម្រោលចំពោះកិច្ចការផ្ទៃក្នុងរបស់ចិន។ ភាគីចិនបង្ហាញនូវការមិនពេញចិត្តដ៏ខ្លាំងនិងការប្រឆាំងដ៏ម៉ឺងម៉ាត់ចំពោះការនេះ ហើយបានលើកការតវ៉ាដ៏ម៉ឺងម៉ាត់ចំពោះភាគីពាក់ព័ន្ធនៃកិច្ចប្រជុំកំពូលក្រុមប្រទេសG7ទាំងអស់ ក្នុងនោះបូករួមទាំងជប៉ុនដែលជាម្ចាស់ផ្ទះនៃកិច្ចប្រជុំកំពូល៕