យោងតាមទិន្នន័យដែលចេញផ្សាយដោយអគ្គនាយកដ្ឋានគយចិននៅថ្ងៃទី៩ខែឧសភាបង្ហាញឱ្យឃើញថា  ការនាំចេញរបស់ប្រទេសចិនក្នុងខែមេសាមានចំនួន២.០២ទ្រីលានយន់ប្រាក់ចិនដែលកើនឡើង១៦.៨ភាគរយបើប្រៀបធៀបនឹងរយៈពេលដូចគ្នានាឆ្នាំ២០២២។ បើគិតតាមដុល្លារអាមេរិក  ល្បឿនកើនឡើងបានឈានដល់៨.៥ភាគរយ។ នៅលើមូលដ្ឋាននៃការនាំចេញយ៉ាងខ្លាំងនៅខែមីនា   ទិន្នន័យនាំចេញនៅខែមេសា បាន"លើសពីការព្យាករណ៍"ជាថ្មីម្តងទៀត។ ទីភ្នាក់ងារសារព័ត៌មានAPអាមេរិកបានអះអាងថា ទោះបីជាតម្រូវការសកលបានធ្លាក់ចុះក៏ដោយ  ក៏ប៉ុន្តែការនាំចេញរបស់ប្រទេសចិនបានបង្ហាញពីកម្លាំងចលករយ៉ាងខ្លាំងដែល"នឹកស្មានមិនដល់"។

      នៅប៉ុន្មានថ្ងៃមុន ពិព័រណ៍ទំនិញនាំចេញនាំចូលនៃប្រទេសចិន（ពិព័រណ៍Canton）លើកទី១៣៣បានបិទបញ្ចប់ ។ ទំហំតាំងពិព័រណ៍សរុប ចំនួនសហគ្រាសដែលចូលរួមក្នុងការតាំងពិព័រណ៍តាមអហ្វអនឡាញនិងចំនួនអ្នកចូលទស្សនាពិព័រណ៍Cantonលើកនេះ សុទ្ធតែបានបំបែកកំណត់ត្រាខ្ពស់ថ្មីក្នុងប្រវត្តិសាស្ត្រ។ ក្នុងរយៈពេល៤ខែដំបូងនៃឆ្នាំ២០២៣  ទំហំនាំចេញនាំចូលសរុបរបស់ប្រទេសចិនមានចំនួន១៣.៣២ទ្រីលានយន់ប្រាក់ចិន ដែលកើនឡើង៥.៨ភាគរយ បើប្រៀបធៀបនឹងរយៈពេលដូចគ្នានាឆ្នាំ២០២២។ ក្នុងនោះការនាំចេញកើនឡើង១០,៦ភាគរយ  ការនាំចូលកើនឡើង០,០២ភាគរយ។

     បើមើលពីទិន្នន័យពាណិជ្ជកម្មបរទេសនៃរយៈពេល៤ខែដំបូងឆ្នាំ២០២៣  រចនាសម្ព័ន្ធពាណិជ្ជកម្មបរទេសរបស់ប្រទេសចិនបានត្រូវកែលំអជាបន្តបន្ទាប់។ ឧទាហរណ៍ ការនាំចេញរថយន្តបានក្លាយជាកម្លាំងចលករសំខាន់មួយសម្រាប់ជំរុញការនាំចេញម្តងទៀត។ បើមើលពីតួរអង្គសំខាន់ៗក្នុងទីផ្សារ   សហគ្រាសពាណិជ្ជកម្មបរទេសឯកជនទទួលបានសមិទ្ធផលគួរឱ្យកត់សម្គាល់។ ក្នុងរយៈពេល៤ខែដំបូង  ការនាំចេញនាំចូលរបស់សហគ្រាសឯកជនបានកើនឡើង១៥.៨ភាគរយ  ខ្ពស់ជាងល្បឿនកើនឡើងជាទូទៅ   ត្រូវជា៥២.៩ភាគរយនៃទំហំសរុបនៃពាណិជ្ជកម្មបរទេសរបស់ប្រទេសចិន  បានកើនឡើង៤.៦ភាគរយបើកប្រៀបធៀបនឹងរយៈពេលដូចគ្នានៃឆ្នាំ២០២២  ដែលបន្តរក្សាឋានៈជាតួរអង្គធំជាងគេនៃពាណិជ្ជកម្មបរទេសរបស់ប្រទេសចិន។

      ហេតុអ្វីបានជាពាណិជ្ជកម្មបរទេសរបស់ប្រទេសចិនអាចត្រួសត្រាយកម្លាំងចលករយ៉ាងខ្លាំងដែល"នឹកស្មានមិនដល់"?នេះគឺមិនអាចឃ្លាតពីការបន្តជំរុញការបើកចំហប្រកបដោយកម្រិតខ្ពស់និងដាក់ចេញវិធានការលំនឹងពាណិជ្ជកម្មបរទេសជាបន្តបន្ទាប់របស់រដ្ឋាភិបាលចិននោះឡើយ។ចាប់តាំងពីដើមឆ្នាំ២០២៣មក  រដ្ឋបាលតំបន់នានាបាននាំគ្នាដាក់ចេញវិធានការសម្រាប់ជំរុញការអភិវឌ្ឍពាណិជ្ជកម្មបរទេស  ហើយសហគ្រាសចិនបាន"បង្កើតជាក្រុមទៅបរទេស" ដើម្បីប្រជែងជាមួយពេលវេលាក្នុងការទទួលបានការបញ្ជាទិញ។នៅចុងខែមេសា  រដ្ឋាភិបាលចិនបានដាក់ចេញគោលនយោបាយមួយចំនួនដែលបូករួមទាំងការជំរុញឱ្យពិព័រណ៍តាមអហ្វអនឡាញក្នុងស្រុកស្តារឡើងវិញដោយគ្រប់ជ្រុងជ្រោយ  ការរៀបចំសហគ្រាសរថយន្តនិងសហគ្រាសដឹកជញ្ជូននាវាចរណ៍  ទាក់ទងអតិថិជនដោយផ្ទាល់  និងការគាំទ្រសហគ្រាសពាណិជ្ជកម្មបរទេសឱ្យត្រួសត្រាយវិធីសាស្ត្រលក់ដូរតាមរយៈទម្រង់ថ្មីដូចជាធុរកិច្ចអេឡិចត្រូនិកឆ្លងដែនជាដើម  គោលនយោបាយទាំងនេះមានលក្ខណៈចំគោលដៅនិងភាពងាយស្រួលក្នុងការអនុវត្តយ៉ាងខ្លាំងដែលបង្កើតលំហអភិវឌ្ឍន៍ថ្មីសម្រាប់សហគ្រាសពាណិជ្ជកម្មបរទេស។

      ពេលបច្ចុប្បន្ននេះ  ឱកាសថ្មីកំពុងលេចចេញឥតឈប់ឈរ។នៅថ្ងៃទី២ខែមិថុនា"កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់"(RCEP)នឹងមានចូលជាធរមានដោយគ្រប់ជ្រុងជ្រោយនៅរដ្ឋសមាជិកចំនួន១៥  ហើយវិញ្ញាបនបត្របញ្ជាក់ប្រភពដើមទំនិញនៃRCEPត្រូវបានស្វាគមន៍ពីសហគ្រាសកាន់តែច្រើនឡើងៗ។ នេះនឹងនាំមកនូវអត្ថប្រយោជន៍កាន់តែច្រើនដល់"ទៅក្រៅប្រទេស"នៃសហគ្រាសពាណិជ្ជកម្មបរទេសរបស់ប្រទេសចិន។

     យើងជឿជាក់ថា  ស្របពេលដែលពិព័រណ៍មួយចំនួនក្នុងស្រុកបានប្រារពធ្វើ  ការប្រាស្រ័យទៅមករវាងប្រជាជនកាន់តែមានភាពងាយស្រួល  និងការឆ្នៃប្រឌិតថ្មីផ្នែកពាណិជ្ជកម្មបន្តធ្វើឱ្យស៊ីជម្រៅជាដើម   ពាណិជ្ជកម្មបរទេសរបស់ប្រទេសចិននឹង"ត្រួសត្រាយ"កម្លាំងចលករកាន់តែច្រើន  ក៏ដូចជាបញ្ជូនសញ្ញាកាន់តែខ្លាំងទៅកាន់ពិភពលោកថា សេដ្ឋកិច្ចរបស់ប្រទេសចិនកំពុងបង្កើនល្បឿនងើបឡើងវិញ៕