ថ្ងៃទី៧ខែឧសភា ក្រុមសង្គមស៊ីវិលជាច្រើននៃប្រទេសកូរ៉េខាងត្បូងបានធ្វើការជួបជុំគ្នានៅទីក្រុងសេអ៊ូល ដើម្បីសម្តែងការតវ៉ាចំពោះដំណើរទស្សនកិច្ចរបស់លោកFumioKishidaនាយករដ្ឋមន្ត្រីជប៉ុននៅកូរ៉េខាងត្បូង ហើយទាមទារឱ្យរដ្ឋាភិបាលជប៉ុនធ្វើការសុំទោសដោយស្មោះអំពីបញ្ហាកេណ្ឌកម្លាំងពលកម្មដោយបង្ខំនិងមួលបង្កាច់ប្រវត្តិសាស្ត្រជាដើម។
នៅកន្លែងជួបជុំដែលស្ថិតនៅមុខទីស្តីការប្រធានាធិបតីកូរ៉េខាងត្បូង មហាជនបានលើកពាក្យស្លោក“បញ្ឈប់ការបង្កើតសម្ព័ន្ធភាពកូរ៉េខាងត្បូង អាមេរិកនិងជប៉ុន”“បញ្ឈប់ការទូតដ៏អាម៉ាស់ជាមួយជប៉ុន”“ដកផែនការបង្ហូរទឹកសំណល់នុយក្លេអ៊ែរចូលទៅក្នុងសមុទ្រវិញភ្លាម”ជាដើម ។ មហាជនបានទាមទារឱ្យរដ្ឋាភិបាលជប៉ុនធ្វើការសុំទោសនិងសងជំងឺចិត្តចំពោះការធ្វើអាណានិគមក្នុងអំឡុងពេលសង្គ្រាមលោកលើកទី២ អំពាវនាវយ៉ាងខ្លាំងក្លាឱ្យបញ្ឈប់ការពង្រីកកិច្ចសហប្រតិបត្តិការយោធារវាងភាគីទាំង៣កូរ៉េខាងត្បូងអាមេរិកនិងជប៉ុន ដើម្បីរួមគ្នាគាំពារសន្តិភាពនិងស្ថិរភាពក្នុងតំបន។
គួរបញ្ជាក់ថា នៅថ្ងៃទី៧ខែឧសភា លោកFumioKishidaនាយករដ្ឋមន្ត្រីជប៉ុនបានទៅដល់កូរ៉េខាងត្បូង ដើម្បីធ្វើទស្សនកិច្ចរយៈពេល២ថ្ងៃ។ មុនដំណើរទស្សនកិច្ចរបស់លោកFumioKishidaមួយថ្ងៃ មានពលរដ្ឋកូរ៉េខាងត្បូងប្រហែល៥ពាន់នាក់បានធ្វើការជួបជុំគ្នានៅកណ្តាលទីក្រុងក្រោមតំណក់ទឹកភ្លៀង ដើម្បីប្រឆាំងនឹងដំណើរទស្សនកិច្ចរបស់លោកFumioKishidaនៅកូរ៉េខាងត្បូង៕