ថ្ងៃទី ១៩ ខែមេសា  លោក Wang Wenbin  អ្នកនាំពាក្យក្រសួងការបរទេសចិនបានធ្វើជាអធិបតីក្នុងសន្និសីទកាសែតជាប្រចាំ។  មានអ្នកកាសែតសួរថា មតិសាធារណៈអន្តរជាតិបានសម្គាល់ថាសេដ្ឋកិច្ចចិននៅត្រីមាសទីមួយឆ្នាំ២០២៣ មានការចាប់ផ្តើមយ៉ាងល្អប្រសើរ   ដែលនឹងជំរុញជំនឿចិត្តនៃការស្តារសេដ្ឋកិច្ចពិភពលោក។  តើអ្នកនាំពាក្យមានការវាយតម្លៃយ៉ាងណាចំពោះរឿងនេះ?

          លោក Wang Wenbin  បានថ្លែងថា ត្រីមាសទីមួយឆ្នាំនេះផលិតផលក្នុងស្រុកសរុបរបស់ចិនបានកើនឡើង4.5% បើប្រៀបធៀបនឹងរយៈពេលដូចគ្នានាឆ្នាំទៅ  ជំនឿចិត្តនៃទីផ្សារបានត្រូវពង្រឹងយ៉ាងច្បាស់លាស់។  សេដ្ឋកិច្ចចិនបានបង្ហាញនូវនិន្នាការស្តារឡើងវិញនិងវិវឌ្ឍន៍រីកចម្រើនដ៏ល្អប្រសើរ ដែលបាននិងកំពុងផ្តល់កាលានុវត្តភាពកាន់តែច្រើនដល់ការអភិវឌ្ឍរបស់បណ្តាប្រទេសលើលោក។ នៅត្រីមាសទីមួយ ទំហំនាំចេញនាំចូលរវាងចិនជាមួយប្រទេសអាស៊ាន និងប្រទេសអាហ្វ្រិកបានកើនឡើងចំនួន16.1%និង14.1% រៀងគ្នា ។ របាយការណ៍ថ្មីបំផុតនៃអង្គការ IMF បានប៉ាន់ប្រមាណថា   នៅឆ្នាំ២០២៣សេដ្ឋកិច្ចចិននឹងរួមចំណែកលើសពី 1/3  ចំពោះកំណើនសេដ្ឋកិច្ចពិភពលោក។

       លោក Wang Wenbin  បានបន្តថា  លោកប្រធានរដ្ឋចិន Xi Jinping  បានលើកឡើងថា  គោលនយោបាយកំណែទម្រង់និងបើកទូលាយរបស់ចិនគឺជាប់លាប់នឹងមិនកែប្រែ   ហើយចិនដាច់ខាតមិនបិទទ្វារនៃការបើកទូលាយរបស់ខ្លួននោះទេ។ ប្រទេសទាំងអស់ដែលមានបំណងធ្វើកិច្ចសហប្រតិបត្តិការឈ្នះ-ឈ្នះជាមួយចិន ចិនសុទ្ធតែមានឆន្ទៈរួមគ្នាឆ្ពោះទៅមុខ  ដើម្បីជំរុញវិបុលភាពនិងការអភិវឌ្ឍរួមនៃសេដ្ឋកិច្ចពិភពលោក។  នៅពេលអនាគត  ប្រទេសចិននឹងបន្តខិតខំធ្វើការអភិវឌ្ឍប្រកបដោយគុណភាពខ្ពស់ ដើម្បីចែករំលែកសមិទ្ធផលនៃការធ្វើទំនើបកម្មតាមបែបផែនចិនជាមួយសហគមន៍អន្តរជាតិ៕