ថ្មីៗនេះ បន្ទាប់ពីក្រុមអ្នកជំនាញខ្លាឃ្មុំផេនដារបស់ចិនធ្វើដំណើរទៅដល់សួនសត្វ Memphisនៃសហរដ្ឋអាមេរិកមក ពួកគេបានរួមសហការជាមួយក្រុមអ្នកជំនាញអាមេរិកដើម្បីបញ្ចប់ការធ្វើកោសល្យវិច័យចំពោះសពរបស់ខ្លាឃ្មុំផេនដា "Lele" ។ ការធ្វើកោសល្យវិច័យបានច្រានចោលនូវមូលហេតុទូទៅនៃការស្លាប់ដោយចៃដន្យរបស់សត្វ ដូចជាជំងឺរមួរពោះវៀន(Volvulus)ជាដើម។ ពួកគេបានសង្កេតឃើញថា វាកើតមានជំងឺបេះដូង ហេតុនេះបានធ្វើវិនិច្ឆ័យជាជំហានដំបូងថា ជំងឺនេះជាមូលហេតុនៃការស្លាប់ ប៉ុន្តែ ត្រូវធ្វើការពិនិត្យរោគសាស្ត្របន្ថែមទៀតដើម្បីបញ្ជាក់ពីមូលហេតុ ។
ព្រមជាមួយគ្នានេះ ក្រុមអ្នកជំនាញចិនក៏បានពិនិត្យសុខភាពរបស់ខ្លាឃ្មុំផេនដា “Yaya”នៅនឹងកន្លែង ព្រមទាំងបានពិនិត្យមើលរបាយការណ៍ពិនិត្យសុខភាព និងរបាយការណ៍សុខភាពប្រចាំខែផងដែរ ដោយបានវាយតម្លៃថា ក្រៅពីការជ្រុះរោមដែលបណ្តាលមកពីជំងឺស្បែក " Yaya " មានចំណង់អាហារល្អ លក្ខណៈលាមកធម្មតា និងមានទម្ងន់ថេរ ។
ប្រទេសចិននិងសហរដ្ឋអាមេរិកកំពុងធ្វើកិច្ចសម្របសម្រួលយ៉ាងសកម្ម ឆ្លងកាត់នីតិវិធីពាក់ព័ន្ធ ខិតខំប្រឹងប្រែងដើម្បីដឹកជញ្ជូនខ្លាឃ្មុំផេនដា " Yaya " ត្រឡប់ទៅប្រទេសចិនវិញឱ្យបានឆាប់ ៕