ពេលថ្មីៗនេះ មេដឹកនាំនៃប្រទេសប្រេស៊ីលនិងអាហ្សង់ទីនបានថ្លែងថា ប្រទេសទាំង២កំពុងសិក្សាស្រាវជ្រាវនិងបំផុសឱ្យចាប់ផ្តើមប្រើប្រាស់រូបិយវត្ថុរួមនៃទ្វីបអាមេរិកខាងត្បូង។ អ្នកជំនាញយល់ឃើញថា គំនិតផ្តួចផ្តើមស្តីពីការបង្កើតរូបិយវត្ថុរួមនៃទ្វីបអាមេរិកខាងត្បូង បង្ហាញពីឆន្ទៈរបស់អង្គភាពសេដ្ឋកិច្ចទ្វីបអាមេរិកឡាទីនសំខាន់ៗ ដែលចង់ស្វែងរកការជំរុញការអភិវឌ្ឍនិងរួមបញ្ចូលគ្នានៃសេដ្ឋកិច្ចនិងពាណិជ្ជកម្មក្នុងតំបន់ ជំរុញការធ្វើសមាហរណកម្មសេដ្ឋកិច្ចក្នុងតំបន់ ក៏ដូចជាកាត់បន្ថយការពឹងផ្អែកទៅលើដុល្លារអាមេរិក។
លោក Lulaប្រធានាធិបតីប្រេស៊ីល បានទៅដល់ប្រទេសអាហ្សង់ទីននៅថ្ងៃទី២២ខែមករា ដើម្បីចូលរួមកិច្ចប្រជុំកំពូលលើកទី៧នៃសហគមន៍រួមនៃប្រទេសអាមេរិកឡាទីននិងការាប៊ីនដែលបានធ្វើឡើងនៅទីក្រុង Buenos Airesរដ្ឋធានីប្រទេសអាហ្សង់ទីននៅថ្ងៃទី២៤ខែមករា។ លោកLulaបានថ្លែងថា ទំនាក់ទំនងខាងសេដ្ឋកិច្ចនិងពាណិជ្ជកម្មរវាងបណ្តាប្រទេសទ្វីបអាមេរិកឡាទីន គួរតែកាត់បន្ថយការពឹងផ្អែកទៅលើដុល្លារអាមេរិក ហើយការបង្កើតប្រព័ន្ធរូបិយវត្ថុរួមនៃទ្វីបអាមេរិកខាងត្បូង គឺ មានភាពប្រាកដប្រជា និងចាំបាច់ណាស់។
គំនិតផ្តួចផ្តើមរបស់មេដឹកនាំប្រេស៊ីលនិងអាហ្សង់ទីន ទទួលបានការឆ្លើយតបពីប្រទេសអាមេរិកឡាទីនដទៃទៀត។ អ្នកវិភាគព្យាករណ៍ថា រូបិយវត្ថុរួមនៃទ្វីបអាមេរិកខាងត្បូងដែលកំពុងស្ថិតក្នុងការពិគ្រោះពិភាក្សា នឹងមិនជំនួសរូបិយវត្ថុដែលប្រើប្រាស់ជាទូទៅនៅប្រទេសមួយចំនួន ដូចជាប្រេស៊ីលនិងអាហ្សង់ទីនជាដើមនោះទេ ប៉ុន្តែ គ្រាន់តែប្រើប្រាស់ក្នុងការកាត់បន្ថយការទូទាត់ប្រាក់ដុល្លារអាមេរិកប៉ុណ្ណោះ ដើម្បីជំរុញពាណិជ្ជកម្មនៃទ្វីបអាមេរិកខាងត្បូង៕