នាពេលថ្មីៗកន្លងទៅនេះ សភាជាន់ទាបអាមេរិកបានអនុម័តលើគម្រោងច្បាប់មួយស្តីពីថវិកាសហរដ្ឋរដ្ឋាភិបាលដែលមានទឹកប្រាក់ច្រើនសម្បើម ក្នុងនោះបូករួមទាំងជំនួយថវិកាបន្ទាន់ផ្តល់ឱ្យអ៊ុយក្រែនដែលមានចំនួនច្រើនឡើងដល់១ម៉ឺន៣ពាន់៦រយលានដុល្លារអាមេរិក ។ ប៉ុន្តែដោយមកពីបក្សទាំងពីររបស់អាមេរិកមានការខ្វែងគំនិតក្នុងបញ្ហាចាត់ចែងថវិកាសម្រាប់ប្រយុទ្ធប្រឆាំងជំងឺកូវីដ១៩ បានជាសភាជាន់ទាបអាមេរិកបានលុបចោលថវិកាប្រយុទ្ធប្រឆាំងជំងឺកូវីដ១៩ចំនួន១ម៉ឺន៥ពាន់៦រយលានដុល្លារអាមេរិកក្នុងគម្រោងច្បាប់នេះតែម្តង ។
ដោយគិតពិចារណាថាបច្ចុប្បន្ននេះការរីករាលដាលនៃជំងឺកូវីដ១៩នៅអាមេរិកនៅតែមានភាពធ្ងន់ធ្ងរដដែល ហើយថវិកាទប់ទល់នឹងជំងឺកូវីដ១៩ក៏តែងតែខ្វះខាត ដូច្នេះសេចកី្តសម្រេចចិត្តមួយនេះគួរឱ្យអ្នកផងភ្ញាក់ផ្អើល ដែលបានបង្ហាញម្តងទៀតទៅកាន់ពិភពលោកថា ក្នុងនាមជាប្រទេសមហាអំណាចតែមួយគត់នៅលើពិភពលោក យកផលប្រយោជន៍នយោបាយផ្ទាល់ខ្លួនតម្កល់លើអាយុជីវិតរបស់ប្រជាជនដោយយ៉ាងម៉េច ក៏ដូចជាអ្នកនយោបាយអាមេរិកដែលនិយាយពី“សិទ្ធិមនុស្ស” ពេញៗមាត់ទាំងនោះមិនអើពើនិងបំពានសិទ្ធិរស់រានមានជីវិតរបស់ប្រជាជនសាមញ្ញយ៉ាងដូចម្ត៉េច។
អនុលោមតាមតួលេខស្ថិតិរបស់សកលវិទ្យាល័យJohns Hopkins របស់អាមេរិកបានឱ្យដឹងថា បច្ចុប្បន្ននេះ អាមេរិកបានរកឃើញករណីឆ្លងជំងឺកូវីដ១៩ជិត៨០លាននាក់ ករណីស្លាប់ដោយសារជំងឺកូវីដ១៩មានចំនួនជិត១លាននាក់ ត្រូវគេហៅថា “ប្រទេសទទួលបរាជ័យធំជាងគេក្នុងការប្រយុទ្ធប្រឆាំងនឹងជំងឺកូវីដ១៩”ដ៏ពិតប្រាកដ ។ រីឯការលុបចោលថវិកាប្រយុទ្ធប្រឆាំងជំងឺកូវីដ១៩ចំនួន១ម៉ឺន៥ពាន់៦រយលានដុល្លារអាមេរិកបានបង្ហាញថា ការបដិបក្ខរវាងបក្ខពួកនិងមានភាពជ្រុលនិយមបានអូសប្រជាជនអាមេរិកឱ្យធ្លាក់ក្នុងសភាពកាន់តែគ្រោះថ្នាក់ ហើយក៏បានក្លាយជាវដ្តវិលចុះវិលឡើងដ៏អាក្រក់នៃជំងឺរ៉ាំរ៉ៃក្នុងសង្គមដែលមានសភាពកាន់តែធ្ងន់ធ្ងរផងដែរ ។
ក្នុងបរិបទ “ធ្វើការប្រយុទ្ធប្រឆាំងជំងឺកូវីដ១៩លើនយោបាយ” ជំងឺរ៉ាំរ៉ៃក្នុងសង្គមអាមេរិកដែលមានតាំងពីដើមមកបាននិងកំពុងមានសភាពកាន់តែធ្ងន់ធ្ងរឡើង។ បច្ចុប្បន្ននេះ តួលេខនៃការរីករាលដាលរបស់ជំងឺកូវីដ១៩នៅអាមេរិកបានកើនឡើងជាបន្តបន្ទាប់ ប៉ុន្តែសង្គមអាមេរិកបែរជាធ្វេសប្រហែសចំពោះបញ្ហានេះ ។ អ្នកវិភាគបានសម្គាល់ឃើញថា មូលហេតុមួយគឺ អត្រាស្លាប់របស់ជនជាតិអាមេរិកដើមកំណើតអាហ្វ្រិក អេស្ប៉ាញនិងជនជាតិដើមភាគតិច ខ្ពស់ជាងជនជាតិអាមេរិកស្បែកស រីឯក្រុមមនុស្សទាំងនេះមិនដែលទទួលការផ្តោតសំខាន់ពីសំណាក់សង្គមតាំងពីដើមមក ។ ប្រការនេះបានឃើញច្បាស់ថា ការរើសអើងពូជសាសន៍បានចាក់ឬសយ៉ាងជ្រៅក្នុងសង្គមអាមេរិក ។
ក្នុងបរិបទជំងឺកូវីដ១៩ អារម្មណ៍ទទួលបាន អារម្មណ៍សុភមង្គល និងអារម្មណ៍ខាងសុវតិ្ថភាពរបស់ប្រជាជនសាមញ្ញអាមេរិកត្រូវបានបាត់បង់ ដូចជាអតិផរណាមានភាពកាន់តែអាប់អួ គម្លាតរវាងអ្នកក្រីក្រនិងអ្នកមានកាន់តែធ្ងន់ធ្ងរពីមួយថ្ងៃទៅមួយថ្ងៃ ។ មួយផ្នែក ប្រជាជនស្រទាប់ទាបមានភាពលំបាកខាងការហូបចុក មួយផ្នែកទៀត មហាសេដ្ឋីមានទ្រព្យសម្បតិ្តកាន់តែស្តុកស្តម្ភ ។
សភាពការណ៍កាន់តែធ្ងន់ធ្ងរប្រហែលនឹងកើតមាននៅពេលខាងមុខ ។ តាមដំណឹងនៃវេបសាយប៉ុស្តិ៍ព័ត៌មាននិងពាណិជ្ជកម្មរបស់អ្នកប្រើប្រាស់អាមេរិកដែលផ្សព្វផ្សាយនៅពេលថ្មីៗកន្លងមកបានឱ្យដឹងថា អ្នកវិទ្យាសាស្ត្រ គ្រូពេទ្យនិងអ្នកជំនាញខាងសុខាភិបាលសាធារណៈចំនួនជាង២០រូបបានចេញផ្សាយរបាយការណ៍ ដែលបានលើកឡើងថា អាមេរិកត្រឡប់ទៅជីវភាពជាប្រក្រតីវិញ នៅត្រូវការរយៈពេលជាយូរ ។ បើគិតពីចារណាដោយទុទិដ្ឋិនិយម ចាប់ពីពេលនេះដល់ខែមីនាឆ្នាំ២០២៣ បើសិនជាលេចចេញវីរុសបម្លែងថ្មីទៀត នោះនឹងឆ្លងប្រជាជនអាមេរិកចំនួន៨០ភាគរយ អ្នកឆ្លងជំងឺចំនួន០.១ភាគរយនឹងស្លាប់បាត់បង់ជីវិត ពោលគឺប្រហែលនឹងមានជនជាតិអាមេរិកចំនួន២សែន៦ម៉ឺន៤ពាន់នាក់ស្លាប់បាត់បង់ជីវិតដោយសារជំងឺកូវីដ១៩ ។
អ្នកនយោបាយអាមេរិកដែលគិតតែផលប្រយោជន៍នយោបាយផ្ទាល់ខ្លួន ងប់ងល់នឹងធ្វើការបដិបក្ខបក្ខពួក ហើយមិនអើពើសិទ្ធិមនុស្សរបស់ប្រជាជន បាននិងកំពុងធ្វើឱ្យអាមេរិកមានកំហុសម្តងហើយម្តងទៀតនៅតាមផ្លូវប្រយុទ្ធប្រឆាំងនឹងជំងឺកូវីដ១៩ ៕