មហាសនិ្នបាតសភាទាំងពីររបស់ប្រទេសចិនប្រចាំឆ្នាំ២០២២ ពោលគឺមហាសនិ្នបាតសភាតំណាងប្រជាជនទូទាំងប្រទេសចិននិងមហាសន្និបាតសភាប្រឹក្សានយោបាយប្រជាជនទូទាំងប្រទេសចិននឹងបើកធ្វើនៅថ្ងៃទី៥និងថ្ងៃទី៤ ខែមិនាខាងមុខនេះ ។ ជារៀងរាល់ឆ្នាំ ក្នុងមហាសន្និបាទសភាទាំងពីរ ចំណុចដែលប្រជាជនចិនយកចិត្តទុកដាក់បំផុត គឺមហាសន្និបាតសភាទាំងពីរនេះអាចនាំមកនូវផលប្រយោជន៍ជាក់ស្តែងដល់ជីវភាពរស់នៅរបស់ប្រជាជន និងអាចបង្កើនសុខមាលភាពឬអត់ ។ អ្នកដឹកនាំនៃប្រទេសចិនក៏បានគូសបញ្ជាក់ជាច្រើនលើកថា ការបង្កើនសុខមាលភាពនិងលើកកម្ពស់កម្រិតជីវភាពរស់នៅរបស់ប្រជាជនជាគោលបំណងជាសារវន្តនៃការអភិវឌ្ឍ ។
បន្ទាប់ពីប្រទេសចិនបានយកឈ្នះលើយុទ្ធនាការពុះពារឧបសគ្គក្នុងការលុបបំបាត់ភាពក្រីក្រ និងកសាងសង្គមដែលប្រជាជនមានជីវភាពធូរធារបង្គួរដោយគ្រប់ជ្រុងជ្រោយ “គម្រោងជីវភាពរស់នៅរបស់ប្រជាជន”ដ៏សំខាន់ជាជំហានក្រោយទៀតរបស់ប្រទេសចិន បានកំណត់យ៉ាងច្បាស់លាស់រួចហើយ ពោលគឺជំរុញភាពសម្បូរសប្បាយរួម ។ នេះជាភារកិច្ចដ៏លំបាកលំបិនរយៈពេលយូរមួយ ផ្លូវឆ្ពោះទៅកាន់ភាពសម្បូរសប្បាយរួម ក៏ជាផ្លូវធ្វើការតស៊ូព្យាយាមជាមួយគ្នាផងដែរ ។
បច្ចុប្បន្ននេះ ប្រទេសចិនបានកសាងសង្គមដែលប្រជាជនមានជីវភាពធូរធារបង្គួរដោយគ្រប់ជ្រុងជ្រោយរួចហើយ ឆ្នាំ២០២១ បរិមាណទូទៅនៃទំហំសេដ្ឋកិច្ចចិនបានឡើងដល់ ១៧.៧ទ្រីលានដុល្លារអាមេរិកដែលបានកាន់លំដាប់ថ្នាក់ទីពីរលើពិភពលោកដោយនឹងនរ ផលិតផលក្នុងស្រុកសរុបគឺGDPគិតជាមធ្យមក្នុងមនុស្សម្នាក់ៗនៃប្រទេសចិនសម្រេចបាន ១២០០០ដុល្លារអាមេរិក បានលើសពីកម្រិតគិតជាមធ្យមក្នុងមនុស្សម្នាក់ៗនៅលើពិភពលោក ។ ប៉ុន្តែការអភិវឌ្ឍនៃប្រទេសចិននៅតែមានបញ្ហាអតុល្យភាពនិងមិនពេញលេញយ៉ាងលេចធ្លោ ការអភិវឌ្ឍនិងប្រាក់ចំណូលរវាងទីក្រុងនិងជនបទ មានគម្លាតខ្លាំងបង្គួរ ។ នេះជាបញ្ហាប្រឈមជាទូទៅរបស់ប្រទេសកំពុងអភិវឌ្ឍន៍ជាច្រើន តើថ្នាក់ដឹកនាំចិនសង្កេតឃើញថា ត្រូវដោះស្រាយបញ្ហានេះតាមរប្រៀបណា ?
ជាបឋម ក្នុងដំណាក់កាលអភិវឌ្ឍន៍ខុសៗគ្នា គួរតែអនុញ្ញាតឱ្យមនុស្សមួយចំនួនមានជីវភាពធូរធារមុនគេ ដើម្បីណែនាំនិងជំរុញឱ្យអ្នកផ្សេងមានជីវភាពធូរធារដូចគ្នា នៅទីបំផុតសម្រេចបាននូវភាពសម្បូរសប្បាយរួមរបស់ប្រជាជនទាំងមូល ។ លោក Xi Jinping ប្រធានរដ្ឋចិនបានគូសបញ្ជាក់ថា “និយាយពីការសម្រេចបាននូវភាពសម្បូរសប្បាយរួម គ្រាន់តែទន្ទឹមរង់ចាំមិនបានទេ ហើយធ្វើប្រញាប់ក៏មិនបានដែរ ” អ្វីដែលហៅថា “រង់ចាំមិនបាន” ពោលគឺការសម្រេចបាននូវភាពសម្បូរសប្បាយរួមគួរតែអនុវត្តជាក់ស្តែងដោយចែកជាដំណាក់កាលខុសៗគ្នា និងជំហានខុសៗគ្នា សន្សំនូវភាពជោគជ័យតូចៗក្លាយទៅជាភាពជោគជ័យធំ ។ អ្វីដែលហៅថា “ប្រញាប់ក៏មិនបាន” គឺមានន័យថា ការសម្រេចបាននូវភាពសម្បូរសប្បាយរួម មិនត្រូវល្មើសនឹងក្រឹត្យក្រមសេដ្ឋកិច្ចជាសត្យានុម័ត ចៀសវាងពីការលើកឡើងនូវពាក្យស្លោកនិងគោលដៅមិនសមស្របនឹងការពិតជាក់ស្តែង ។
ទីពីរ ការសម្រេចបាននូវភាពសម្បូរសប្បាយរួម គឺជាគម្រោងជាប្រព័ន្ធមួយ មិនត្រឹមតែត្រូវលើកកម្ពស់កម្រិតជីវភាពរស់នៅរបស់ប្រជាជនប៉ុណ្ណោះទេ ថែមទាំងក៏ត្រូវបំពេញតាមតម្រូវការខាងវប្បធម៌របស់ប្រជាជនដែលមានភាពសម្បូរបែប ច្រើនស្រទាប់និងច្រើនវិស័យទៀតផង ។ ក្នុងដំណាក់កាលអភិវឌ្ឍន៍ថ្មី និយាយចំពោះភាពសម្បូរសប្បាយរួម ប្រទសចិនបានលើកឡើងនូវលក្ខខណ្ឌកាន់តែខ្ពស់ ហើយបានពង្រីកទៅដល់វិស័យនានាដែលពាក់ព័ន្ធនឹងសុខមាលភាពនៃជីវភាពរស់នៅ ប្រជាជនចិនរំពឹងទុកអាចទទួលបានការអប់រំ ការព្យាបាលជំងឺ ការធានាក្នុងសង្គម លក្ខខណ្ឌស្នាក់នៅ បរិស្ថាននិងជីវភាពរស់នៅខាងវប្បធម៌កាន់តែល្អ ។ល។
ក្តីរំពឹងទុករបស់ប្រជាជន ជាទិសដៅនៃអភិបាលកិច្ច តម្រូវការរបស់ប្រជាជន ជាទិសដៅនៃកិច្ចខិតខំប្រឹងប្រែងរបស់រដ្ឋាភិបាល ។ មុននឹងមហាសន្និបាតសភាទាំងពីរបើកធ្វើ តំណាងសភាតំណាងប្រជាជន និងសមាជិកនៃសភាពប្រឹក្សានយោបាយគ្រប់ថ្នាក់បានធ្វើការសិក្សាស្រាវជ្រាវនិងពិភាក្សាយ៉ាងស៊ីជម្រៅ ក្នុងន័យលើកសំណើនិងផ្តល់មតិយោបល់អំពីបញ្ហាពិភាក្សាស្តីពីការអភិវឌ្ឍប្រកបដោយគុណភាពខ្ពស់ កិច្ចកសាងទីក្រុង សុខមាលភាពនៃជីវភាពរស់នៅរបស់ប្រជាជន ការងើបឡើងវិញនៃជនបទ និងកិច្ចកសាងអរិយធម៌អេកូឡូស៊ីជាដើម ដើម្បីរួមគ្នាស្វែងរកការអភិវឌ្ឍនៃប្រទេសជាតិ ។ តើមហាសន្និបាតសភាទាំងពីររបស់ចិនឆ្នាំនេះនឹងដាក់ចេញគោលនយោបាយនិងការរៀបចំចាត់ចែងណាខ្លះ ពិតជាធ្វើឱ្យយើងរង់ចាំខ្លាំងណាស់ ។
ដូចប្រសាសន៍របស់លោក Xi Jinping ប្រធានរដ្ឋចិនដែលបានលើកឡើងថា គោលដៅរបស់យើងមានភាពអស្ចារ្យណាស់ផង ហើយក៏មានភាពសាមញ្ញផង និយាយជារួម គឺចង់ឱ្យប្រជាជនចិនទាំងមូលសុទ្ធតែមានជីវភាពរស់នៅដ៏ល្អប្រសើរ ។ ឱ្យតែធ្វើរឿងជាក់ស្តែងមួយហើយមួយទៀត និងខិតខំប្រឹងប្រែងពីមួយឆ្នាំទៅមួយឆ្នាំ នោះប្រជាជនចិននឹងកាន់តែខិតជិតនឹងគោលដៅស្តីពីភាពសម្បូរសប្បាយរួមជាក់ជាមិនខាន ៕
