ក្នុងឱកាសដែលលោក Xi Jinping ប្រធានរដ្ឋចិនអញ្ជើញចូលរួមកិច្ចប្រជុំកំពូលចិន-ប្រទេសអារ៉ាប់លើកដំបូង   កិច្ចប្រជុំកំពូលចិន-ក្រុមប្រឹក្សាសហប្រតិបត្តិការប្រទេសអារ៉ាប់ឈូងសមុទ្រ  ព្រមនឹងធ្វើទស្សនកិច្ចផ្លូវរដ្ឋនៅអារ៉ាប៊ីសាអូឌីត   ធនាគារគំនិតCGTNនៃអគ្គស្ថានីយវិទ្យុនិងទូរទស្សន៍មជ្ឈិមចិននិងមជ្ឈមណ្ឌលសិក្សាស្រាវជ្រាវការផ្សព្វផ្សាយអន្តរជាតិEpstein នៃសកលវិទ្យាល័យ Tsinghua ចិនបានរួមគ្នាធ្វើការស្ទង់ប្រជាមតិនៅទូទាំងពិភពលោកដែលមានអ្នកផ្តល់បទសម្ភាសន៍ចំនួន៤០០០នាក់មកពីប្រទេសចំនួន២០។ ការស្ទង់មតិបានឱ្យឃើញថា អ្នកផ្តល់បទសម្ភាសន៍ចំនួន ៩៤.២%  បានកោតសរសើរពីគុណតម្លៃរួមនៃមនុស្សជាតិអំពី “សន្តិភាព វឌ្ឍនភាព សមភាព យុត្តិធម៌ ប្រជាធិបតេយ្យ សេរីភាព” ដែលផ្តួចផ្តើមឡើងដោយប្រទេសចិន ហើយអ្នកផ្តល់បទសម្ភាសន៍ចំនួន ៨៥% កោតសរសើរចំពោះទស្សនៈ “សហគមន៍រួមវាសនានៃមនុស្សជាតិ”។

ការស្ទង់មតិបានបង្ហាញទៀតថា   អ្នកផ្តល់បទសម្ភាសន៍ចំនួន ៨៥.៦%  បានទទួលយកគំនិតផ្តួចផ្តើមសន្តិសុខសកលដែលភាគីចិនបានលើកឡើង  ដោយសម្គាល់ឃើញថា  សន្តិសុខជាបុរេលក្ខណ្ឌនៃការអភិវឌ្ឍ។  អ្នកផ្តល់បទសម្ភាសន៍ចំនួន ៨០.៨% ប្រឆាំងនឹងអនុត្តរភាព នយោបាយអាងអំណាច និងទង្វើដែលដាក់ទណ្ឌកម្មលើប្រទេសដទៃតាមតែទំនើងចិត្ត។ អ្នកផ្តល់បទសម្ភាសន៍មកពីប្រទេសកំពុងអភិវឌ្ឍន៍ចំនួន ៨០.៤% បានយល់ឃើញថា  គំនិតសង្គ្រាមត្រជាក់ និងនយោបាយអាងអំណាចជាការគំរាមកំហែងចំពោះសន្តិភាពពិភពលោកនិងធ្វើឱ្យបញ្ហាសន្តិសុខកាន់តែតានតឹង  ប្រទេសនានាត្រូវរួមគ្នាកសាងក្របខណ្ឌសន្តិសុខដែលមានតុល្យភាព ប្រកបដោយប្រសិទ្ធភាពនិងនិរន្តរភាព៕