នៅថ្ងៃទី២២ខែវិច្ឆិកា តាមម៉ោងក្នុងតំបន់ ករណីបាញ់ប្រហារមួយបានកើតឡើងនៅផ្សារទំនើបWalmart ក្នុងទីក្រុងChesapeake រដ្ឋVirginia អាមេរិក បណ្តាលឱ្យមនុស្សស្លាប់និងរងរបួសជាច្រើននាក់។ នៅថ្ងៃទី១៩ ខែវិច្ឆិកា ករណីបាញ់ប្រហារមួយបានកើតឡើងនៅក្លឹបរាត្រីមួយ ក្នុងរដ្ឋColorado អាមេរិក ដែលបណ្តាលឱ្យមនុស្ស៥នាក់ស្លាប់និង២៥នាក់រងរបួស។ នេះក៏បានបណ្តាលឱ្យចំនួនការបាញ់ប្រហារទ្រង់ទ្រាយធំនៅអាមេរិកបានលើសពី៦រយករណី ក្នុង៣ឆ្នាំជាប់ៗគ្នា។ "ខ្ញុំបានឃើញកាំភ្លើង។ ស្នូរកាំភ្លើងបានលាន់ឮមួយជុំទៅមួយជុំ។ វាគួរឱ្យរន្ធត់ណាស់។ ពេលនោះ ខ្ញុំបានលាក់ខ្លួននៅក្រោយហើយបានឃើញបំណែកកញ្ចក់ខ្ទាតជុំវិញ គ្រាប់កាំភ្លើងបានបាញ់កំទេចដប" លោកMichael Anderson អ្នករស់រានមានជីវិតមួយរូបក្នុងករណីបាញ់ប្រហាររដ្ឋ Colorado បានរំលឹកដោយភ័យរន្ធត់។
ការបោះឆ្នោតពាក់កណ្តាលអាណត្តិរបស់អាមេរិកទើបតែបានបញ្ចប់ ហើយបញ្ហាអំពីអំពើហិង្សាដោយកាំភ្លើងបានទទួលការចាប់អារម្មណ៍យ៉ាងទូលំទូលាយ។ លោកចូ បៃឌិនប្រធានាធិបតីអាមេរិកបានថ្លែងថា គប្បីត្រូវដោះស្រាយ"ជំងឺរីករាតត្បាត"នៃអំពើហិង្សាដោយកាំភ្លើង។ ប៉ុន្តែស្នូរកាំភ្លើងម្តងៗ បានប្រាប់ប្រជាជនថា"ជំងឺរាតត្បាតបែបអាមេរិក"នេះ កាន់តែធ្ងន់ឡើងៗ។ នៅអាមេរិកសព្វថ្ងៃនេះ មិនថាមនុស្សដើរតាមផ្លូវ សិក្សានៅសាលារៀន ឬផឹកស្រាក្នុងបារក៏ដោយ ពួកគេសុទ្ធតែអាចនឹងជួបហានិភ័យបាញ់ប្រហារគ្រប់ពេលវេលា។ ការគំរាមកំហែងដល់អាយុជីវិតរបស់ប្រជាជនអាមេរិក ការប៉ះពាល់ដល់ផ្លូវចិត្តសាធារណៈជន និងការបំផ្លិចបំផ្លាញដល់សង្គមនៃអំពើហិង្សាដោយកាំភ្លើងកំពុងកាន់តែស្រួចស្រាវបន្ដិចម្ដងៗ ។
ចំនួនប្រជាជនអាមេរិកត្រូវជា៤,២ភាគរយ នៃចំនួនប្រជាជនពិភពលោក ប៉ុន្តែកាំភ្លើងស៊ីវិលត្រូវជា៤៦ភាគរយ នៃចំនួនកាំភ្លើងស៊ីវិលពិភពលោក។ ជាមួយនឹងសមាមាត្រមិនប្រក្រតីបែបនេះ អត្រាស្លាប់ដោយសារអំពើហិង្សាដោយកាំភ្លើងរបស់អាមេរិកបានលើសពីប្រទេសអភិវឌ្ឍន៍ដទៃទៀតយ៉ាងឆ្ងាយ។ ទិន្នន័យថ្មីបំផុតនៃវេបសាយ"បណ្ណសារអំពើហិង្សាដោយកាំភ្លើង"របស់អាមេរិក បានបង្ហាញឱ្យឃើញថា រហូតដល់ថ្ងៃទី២១ខែវិច្ឆិកាបានមានមនុស្សជាង៣ម៉ឺន៩ពាន់នាក់បានបាត់បង់ជីវិតដោយសារអំពើហិង្សាដោយកាំភ្លើងនៅអាមេរិកក្នុងឆ្នាំនេះរួចហើយ។
ទន្ទឹមនឹងពេលនេះ ចិត្តគំនិតរបស់ប្រជាជនអាមេរិកក៏រងផលប៉ះពាល់យ៉ាងខ្លាំងដោយអំពើហិង្សាដោយកាំភ្លើងផងដែរ។ យោងតាមកាសែត《U.S.News&WorldReport》បានឱ្យដឹងថា យ៉ាងហោចណាស់ ជាងពាក់កណ្តាលនៃករណីអត្តឃាតនៅអាមេរិកក្នុងមួយឆ្នាំសុទ្ធតែទាក់ទងទៅនឹងការប្រើប្រាស់កាំភ្លើង។
សិទ្ធិរស់រានមានជីវិត គឺជាសិទ្ធិដែលសំខាន់ជាងគេរបស់មនុស្ស។តើអំពើហឹង្សាដោយកាំភ្លើងអាចត្រូវបានទប់ស្កាត់ប្រកបដោយប្រសិទ្ធភាពឬអត់ គឺជាស្តង់ដារសំខាន់សម្រាប់សហគមន៍អន្តរជាតិក្នុងការវាស់វែងសិទ្ធិមនុស្សរបស់អាមេរិក ។ បើសិនជាចង់ឱ្យសង្គមអាមេរិកមិនឮស្នូរកាំភ្លើងជាម្តងទៀតទេ អ្នកនយោបាយអាមេរិកមិនមែនអត់មានមធ្យោបាយនោះទេ ប៉ុន្តែជាគន្លឹះសំខាន់គឺ តើពួកគេចង់ដោះស្រាយវាពិតប្រាកដឬអត់៕
