នៅថ្ងៃទី ៤ ខែវិច្ឆិកា លោក Zhao Lijian អ្នកនាំពាក្យក្រសួងការបរទេសចិនបានធ្វើជាអធិបតីក្នុងសន្និសីទសារព័ត៌មានជាប្រចាំ ។ មានអ្នកសារព័ត៌មានសួរថា យោងតាមដំណឹងឱ្យដឹងថា ស្ថានីយ Muong Sai នៃផ្លូវដែកចិន-ឡាវនៅភាគខាងជើងប្រទេសឡាវបានបើកអាជីវកម្មដឹកជញ្ជូនទំនិញនាពេលកន្លងទៅនេះ នេះជាសញ្ញាសម្គាល់ថា ស្ថានីយដឹកជញ្ជូនទំនិញតាមផ្លូវដែកចិន-ឡាវបានដាក់ឱ្យដំណើរការទាំងអស់ហើយ។ តើអ្នកនាំពាក្យមានការវាយតម្លៃអ្វីខ្លះចំពោះរឿងនេះ?
លោក Zhao Lijian បានឆ្លើយថា ស្ថានីយដឹកជញ្ជូនទំនិញទាំងអស់ដាក់ឱ្យដំណើរការនឹងជួយដល់ផ្លូវដែកចិន - ឡាវឱ្យក្លាយជាម៉ាស៊ីនពន្លឿនការតភ្ជាប់ក្នុងតំបន់ថែមទៀត ក៏ដូចជាជួយកិច្ចកសាងគំនិតផ្តួចផ្តើម“ខ្សែក្រវាត់និងផ្លូវ”ប្រកបដោយគុណភាពខ្ពស់រវាងចិននិងអាស៊ានឱ្យទទួលបានលទ្ធផលជាផ្លែផ្កាកាន់តែច្រើន ។
លោកប្រធានរដ្ឋចិនXi Jinping បានលើកឡើងថា គន្លឹះនៃការរួមគ្នាកសាង "ខ្សែក្រវាត់និងផ្លូវ" គឺការតភ្ជាប់គ្នាទៅវិញទៅមក ។ យើងរីករាយដែលបានឃើញថាមានដំណឹងល្អជាច្រើនពាក់ព័ន្ធនឹងការតភ្ជាប់គ្នារវាងប្រទេសចិននិងប្រទេសជិតខាងនាពេលថ្មីៗកន្លងទៅនេះ ។ ក្នុងអំឡុងពេលដែលលោកNguyễn Phú Trọng អគ្គលេខាធិការគណៈកម្មាធិការមជ្ឈិមបក្សកុម្មុយនីស្តវៀតណាមបំពេញទស្សនកិច្ចនៅប្រទេសចិន ប្រទេសចិននិងវៀតណាមបានឯកភាពពីការជំរុញកិច្ចពិភាក្សានិងចុះហត្ថលេខាលើផែនការសហប្រតិបត្តិការរវាងរដ្ឋាភិបាលប្រទេសទាំងពីរស្តីពីការតភ្ជាប់គំនិតផ្តួចផ្តើម"ខ្សែក្រវាត់និងផ្លូវ"និងក្របខ័ណ្ឌ“ច្រករបៀងពីរនិងរង្វង់មួយ " ។ ក្រៅពីនេះ ក្នុងសន្និសីទយន្តការកិច្ចសហប្រតិបត្តិការទ្វេភាគីរវាងចិននិងសិង្ហបុរី ចិននិងសិង្ហបុរីបានប្រកាសនូវសមិទ្ធផលដ៏សំខាន់ដែលបានឈានដល់លើវិស័យតភ្ជាប់គ្នា ហើយឯកភាពថា ធ្វើឱ្យស៊ីជម្រៅនូវការតភ្ជាប់ផ្នែកយុទ្ធសាស្រ្តថែមទៀត រួមគ្នាធ្វើកិច្ចសម្របសម្រួលដើម្បីជំរុញកិច្ចកសាងផ្លូវដឹកជញ្ជូនតាមផ្លូវគោកនិងសមុទ្រថ្មី ៕