ល្ងាចថ្ងៃទី១៥ ខែកញ្ញាតាមម៉ោងក្នុងតំបន់នៅ ទីក្រុង Samarkand ប្រទេសអូបេគីស្ថាន   លោក Xi Jinping ប្រធានរដ្ឋចិននិង លោក Putin ប្រធានាធិបតីរុស្ស៊ីបានជួបសន្ទនាទ្វេភាគី ផ្លាស់ប្តូរមតិយោបល់អំពីទំនាក់ទនងចិននិងរុស្ស៊ី និងបញ្ហាក្នុងតំបន់និងអន្តរជាតិដែលយកចិត្តទុកដាក់រួមគ្នា។

      លោក Xi Jinping បានលើកឡើងថា   ចាប់ពីដើមឆ្នាំនេះមក ចិននិងរុស្ស៊ីបានរក្សាការប្រស្រ័យទាក់ទងគ្នាជាយុទ្ធសាស្ត្រប្រកបដោយប្រសិទ្ធិភាព។ ប្រទេសយើងទាំងពីរបានជំរុញកិច្ចសហប្រតិបត្តិការគ្រប់វិស័យដោយស្ថិរភាព បានសម្របសម្រួលគ្នាយ៉ាងស្និតស្នាលលើឆាកអន្តរជាតិ ដែលបានគាំពារដល់ក្រមមូលដ្ឋាននៃទំនាក់ទំនងអន្តរជាតិ។

      លោក Xi Jinping  បានគូសបញ្ជាក់ថា  ភាគីចិនមានឆន្ទៈរួមជាមួយភាគីរុស្ស៊ី គាំទ្រគ្នាយ៉ាងខ្លាំងចំពោះបញ្ហាដែលប៉ះពាល់នឹងផលប្រយោជន៍ស្នូលរវាងគ្នា  ហើយនឹងបន្តពង្រឹងកិច្ចសហប្រតិបត្តិការជាក់ស្តែងដល់ពហុវិស័យដូចជាពាណិជ្ជកម្ម កសិកម្ម ការផ្សាភ្ជាប់ការទាក់ទងគ្នាជាដើម។ ភាគីទាំងពីរត្រូវបង្កើនកិច្ចសម្របសម្រួល ជំរុញឲ្យបណ្តាភាគីពង្រឹងសាមគ្គីភាពនិងទំនុកចិត្តជាមួយគ្នា  គាំពារផលប្រយោជន៍សន្តិសុខក្នុងតំបន់ ដើម្បីគាំពារផលប្រយោជន៍រួមនៃប្រទេសកំពុងអភិវឌ្ឍន៍ទាំងមូលនិងប្រទេសទីផ្សារទើបងើបថ្មី។

       លោក Putin សូមជូនពរទុកជាមុនឱ្យសមាជបក្សកុម្មុយនីស្តចិនលើកទី២០ ទទួលបានជោគជ័យគាប់ប្រសើរ។ ទំនាក់ទំនងសម្របសម្រួលយុទ្ធសាស្ត្រគ្រប់ជ្រុងជ្រោយរវាងរុស្ស៊ីនិងចិនរឹងមាំដូចភ្នំ។ ភាគីរុស្ស៊ីគោរពគោលការណ៍ចិនតែមួយយ៉ាងម៉ឺងម៉ាត់ ថ្កោលទោសចំពោះប្រទេសណាមួយដែលបានធ្វើទង្វើបង្កហេតុដែលប៉ះពាល់ផលប្រយោជន៍ស្នូរបស់ចិន។ រុស្ស៊ីមានឆន្ទៈរួមជាមួយចិនបន្តពង្រឹងការផ្លាស់ប្តូរទ្វេភាគីនិងពហុភាគី បន្តពង្រីកកិច្ចសហប្រតិបត្តិការក្នុងវិស័យសំខាន់ៗដូចជាសេដ្ឋកិច្ច ពាណិជ្ជកម្ម ថាមពលជាដើម។

      លោក Xi Jinping បានកោតសរសើរចំពោះរុស្ស៊ីដែលបានប្រកាន់ខ្ជាប់គោលការណ៍ចិនតែមួយ ហើយបានបញ្ជាក់បន្ថែមថា តៃវ៉ាន់ជាផ្នែកមួយរបស់ចិន ភាគីចិនប្រឆាំងយ៉ាងដាច់ខាតចំពោះកម្លាំងបំបាក់ចង់ឱ្យតៃវ៉ាន់ឯករាជ្យ និងការជ្រៀតជ្រែកពីខាងក្រៅ  ប្រទេសណាមួយក៏ដោយ គ្មានសិទ្ធិកាត់ក្តីចំពោះបញ្ហាតៃវ៉ាន់៕