កាលពីថ្ងៃទី២១ខែមិថុនាតាមម៉ោងក្នុងតំបន់ អ្វីដែលហៅថា 《សេចក្តីព្រាងច្បាប់ស្តីពីការបង្ការការបង្ខំឱ្យធ្វើពលកម្មរបស់ជនជាតិវៃអ៊ូអឺ》បានចូលជាធរមានជាផ្លូវការ ។ សេចក្តីព្រាងច្បាប់ដែលពោរពេញទៅដោយពាក្យកុហកនេះអះអាងថា នឹងហាមឃាត់ការនាំចូលផលិតផលពីភូមិភាគស្វយ័តស៊ីនជាំងប្រទេសចិន លើកលែងតែ “ផលិតផលដែលមានភស្តុតាងយ៉ាងច្បាស់លាស់អាចបញ្ជាក់ថា វាមិនមែនបង្កើតឡើងដោយសារការបង្ខំឱ្យធ្វើពលកម្ម” ។ នេះជាទង្វើថ្មីបំផុតរបស់ភាគីអាមេរិកក្នុងការមួលបង្កាច់សភាពការណ៍សិទ្ធិមនុស្សរបស់ភូមិភាគស្វយ័តស៊ីនជាំងនិងធ្វើឱ្យសិទ្ធិមនុស្សក្លាយជាអាវុធ ក្នុងគោលបំណងគាបសង្កត់ឧស្សាហកម្មដែលមានឧត្តមភាពរបស់ភូមិភាគស្វយ័តស៊ីនជាំងដូចជាកប្បាស ប៉េងប៉ោះនិងប្រព័ន្ធ PVដើរដោយថាមពលព្រះអាទិត្យជាដើម ។ ប៉ុន្តែវានឹងរកឃើញថា “ដំបងដាក់ទណ្ឌកម្ម”នេះនឹងវាយទៅលើខ្លួនឯងនៅទីចុងបំផុត ។
អ្វីដែលហៅថា ភូមិភាគស្វយ័តស៊ីនជាំងមាន “បាតុភាពបង្ខំឱ្យធ្វើពលកម្ម” គឺជាពាក្យកុហកដែលកម្លាំងប្រឆាំងនឹងប្រទេសចិនប្រឌិតទាំងស្រុង ។ តាមការពិត តើភូមិភាគស្វយ័តស៊ីនជាំងមានសភាពការណ៍ប្រកបការងារពិតប្រាកដយ៉ាងណា អ្នកនយោបាយអាមេរិកមិនយកចិត្តទុកដាក់ទាល់តែសោះ ។ ពួកគេគ្រាន់តែយកសិទ្ធិមនុស្សធ្វើជាលេស ដើម្បីប្រឌិតពាក្យកុហកមកមួលបង្កាច់ប្រទេសចិន ព្រមពេលជាមួយគ្នានេះ ឆ្លៀតឱកាសនេះគាបសង្កត់ឧត្តមភាពប្រកួតប្រជែងនៃឧស្សាហកម្មភូមិភាគស្វយ័តស៊ីនជាំង ដែលប៉ុនប៉ងច្រានចោលភូមិភាគស្វយ័តស៊ីនជាំងរហូតដល់ប្រទេសចិនទាំងមូលឱ្យចេញពីខ្សែសង្វាក់ផ្គត់ផ្គង់សកល ដើម្បីសម្រេចអ្វីដែលហៅថា “ទប់ស្កាត់ការអភិវឌ្ឍរបស់ប្រទេសចិនតាមរយៈភូមិភាគស្វយ័តស៊ីនជាំង” ។
មានការវិភាគសម្គាល់ថា បន្ទាប់ពីអនុវត្ត “សេចក្តីព្រាងច្បាប់ដែលពោរពេញទៅដោយពាក្យកុហក”នេះនឹងធ្វើឱ្យប៉ះពាល់ដល់សណ្តាប់ធ្នាប់ពាណិជ្ជកម្មអន្តរជាតិ បំផ្លាញស្ថិរភាពនៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់សកល ហើយសហគ្រាសបែបពាណិជ្ជកម្មបរទេសមួយចំនួនដែលពឹងផ្អែកលើការនាំចេញនៃភូមិភាគស្វយ័តស៊ីនជាំងប្រហែលនឹងរងផលប៉ះពាល់ពីប្រការនេះ ។ ប៉ុន្តែភាគីអាមេរិកចង់ទប់ស្កាត់ការអភិវឌ្ឍរបស់ចិនក្នុងស្រទាប់សេដ្ឋកិច្ចគឺគ្មានលទ្ធភាពនោះទេ ។ ទីផ្សារចិនដែលមានទ្រង់ទ្រាយធំនិងតម្រូវការនៃទីផ្សារពិភពលោក មុខជានឹងផ្តល់ចន្លោះអភិវឌ្ឍន៍ដល់សហគ្រាសនៃភូមិភាគស្វយ័តស៊ីនជាំងជាមិនខាន ។ សហរដ្ឋអាមេរិកតែម្នាក់ឯងបិទទ្វារ គឺមិនអាចបំផ្លាញកម្លាំងប្រកួតប្រជែងនៃផលិតផលរបស់ភូមិភាគស្វយ័តស៊ីនជាំងនោះឡើយ ។
ក្រឡេកមកមើលសហរដ្ឋអាមេរិកវិញ ប្រហែលនឹងធ្លាក់ចូលក្នុង “ភាពជាប់គាំង”ដោយសារសេចក្តីព្រាងច្បាប់នេះ ។ ប្រការទាំងនេះសុទ្ធតែនឹងត្រូវអ្នកប្រើប្រាស់អាមេរិកបង់ថ្លៃនៅទីចុងបំផុត ។ បច្ចុប្បន្ននេះ ប្រជាជនអាមេរិកកំពុងជួបប្រទះអតិផរណដ៏ខ្ពស់បំផុតក្នុងរយៈពេល៤០ឆ្នាំកន្លងទៅ ។ តាមការគណនារបស់អ្នកវិភាគនៃអង្គការ Moody's ឱ្យដឹងថា បើប្រៀបធៀបនឹងឆ្នាំមុនៗ គ្រួសារអាមេរិកគិតជាមធ្យមក្នុងមួយខែ ត្រូវបន្ថែមចំណាយប្រហែល៤៦០ដុល្លារអាមេរិកទៀត ។
អាចឃើញថា ភាគីអាមេរិកអនុវត្ត “សេចក្តីព្រាងច្បាប់ពាក់ព័ន្ធនឹងភូមិភាគស្វយ័តស៊ីនជាំងដែលពោរពេញទៅដោយពាក្យកុហកនេះនឹងបំផ្លាញដល់ផលប្រយោជន៍ទាំងខ្លួនឯងនិងប្រទេសដទៃទៀត ។ភាគីចិនមុខជានឹងចាត់វិធានកាយ៉ាងខ្លាំងជាមិនខាន ដើម្បីគាំពារយ៉ាងមុតមាំនូវសិទ្ធិនិងផលប្រយោជន៍ស្របច្បាប់របស់សហគ្រាសនិងប្រជាជនចិន ក៏ដូចជាគាំពារស្ថិរភាពនៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់សកលផងដែរ ។ អ្នកប្រឌិត “សេចក្តីព្រាងច្បាប់ដែលពោរពេញទៅដោយពាក្យកុហក”ទាំងនោះនឹងបង់ថ្លៃយ៉ាងខ្លាំងដោយសារសេចក្តីព្រាងច្បាប់នេះ ។