ថ្ងៃទី ៣០ ខែឧសភា លោក Wang Yi សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីក្រសួងការបរទេសចិននិង លោក Jerome WALCOTT រដ្ឋមន្ត្រីក្រសួងការបរទេសនិងពាណិជ្ជកម្មអន្តរជាតិបាបាដូសបានផ្ញើលិខិតជូនគ្នាទៅវិញទៅមក ដើម្បីអបអរខួប៤៥ឆ្នាំនៃការបង្កើតទំនាក់ទំនងការទូតរវាងប្រទេសទាំងពីរ។
លោក Wang Yi បានថ្លែងក្នុងសារលិខិតថា បាបាដូសជាមិត្តល្អនិងដៃគូល្អរបស់ចិននៅតំបន់ការ៉ាប៊ីន។ រយៈពេល ៤៥ ឆ្នាំបន្ទាប់ពីបានបង្កើតទំនាក់ការទូត ចិននិងបាបាដូសបានលើកកម្ពស់ការទំនុកចិត្តនយោបាយជាបន្តបន្ទាប់ កិច្ចសហប្រតិបត្តិការទទួលបានផ្លែផ្កាជាច្រើន ហើយក្នុងកិច្ចការសំខាន់ៗទាំងអន្តរជាតិនិងក្នុងតំបន់ក៏បានរក្សាការប្រាស្រ័យទាក់ទងគ្នាដ៏ញឹកញាប់ផងដែរ។ ភាគីចិនមានឆន្ទៈបន្តរួមគ្នាបង្កើតអនាគតកាន់តែល្អប្រសើរសម្រាប់ទំនាក់ទំនងចិន-បាបាដូស។
លោកJerome WALCOTT បានថ្លែងក្នុងសារលិខិតថា ៤៥ឆ្នាំកន្លងមក ប្រទេសទាំងពីរបានធ្វើកិច្ចសហប្រតិបត្តិការយ៉ាងស្និទ្ធស្នាលទាំងផ្នែកទ្វេភាគី ក្នុងតំបន់និងអន្តរជាតិ ហើយទទួលបានសមិទ្ធផលដ៏លេចធ្លោ។ ភាគីបាបាដូសសូមវាយតម្លៃខ្ពស់ចំពោះប្រទេសចិនដែលបានរួមចំណែកដ៏អស្ចារ្យក្នុងការបង្កើនកិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងជំងឺឆ្លង៕