រសៀលថ្ងៃទី២៦ ខែតុលា លោក Li Keqiang នាយករដ្ឋមន្ត្រីចិនបានអញ្ជើញចូលរួមកិច្ចប្រជុំកំពូលចិន-អាស៊ានលើកទី២៤នៅវិមានសភាប្រជាជនចិន ។ កិច្ចប្រជុំលើកនេះមានវត្តមានរបស់ព្រះចៅស៊ុលតង់Haji Hassanal Bolkiahនៃប្រទេសប្រ៊ុយណេដែលជាប្រធានផ្លាស់វេននៃសមាគមអាស៊ាន និងអ្នកដឹកនាំនៃប្រទេសកម្ពុជា ឥណ្ឌូណេស៊ី ឡាវ ម៉ាឡេស៊ី ហ្វីលីពីន សិង្ហបុរី ថៃនិងវៀតណាម ។ លោក Li Keqiang និងព្រះចៅស៊ុលតង់Haji Hassanal Bolkiah បានធ្វើជាសហអធិបតីក្នុងកិច្ចប្រជុំលើកនេះ ។ កិច្ចប្រជុំលើកនេះបានប្រារព្វធ្វើតាមប្រព័ន្ធវីដេអូ ។
ថ្លែងក្នុងកិច្ចប្រជុំ លោក Li Keqiang បានគូសបញ្ជាក់ថា ប្រទេសចិនដើរតាមផ្លូវអភិវឌ្ឍន៍ដោយសន្តិភាពយ៉ាងម៉ឺងមាត់មិនងាករេ ។ ការរក្សាសន្តិភាពនៅសមុទ្រចិនខាងត្បូង វាសមស្របនឹងផលប្រយោជន៍រួមរបស់ប្រទេសចិននិងប្រទេសអាស៊ាន ។ ឆ្នាំក្រោយជាខួបទី២០ នៃការចុះហត្ថលេខាលើ «សេចកី្តប្រកាសប្រតិបតិ្តនៃបណ្តាភាគីសមុទ្រចិនខាងត្បូង» ប្រទេសចិនរីករាយរួមសហការជាមួយប្រទេសអាស៊ាន ចាត់ទុកឆ្នាំក្រោយជាកាលានុវត្តភាពមួយ ក្នុងន័យពង្រីកកិច្ចសហប្រតិបតិ្តការតាមសមុទ្រ ពន្លឿនដំណើរធ្វើការពិគ្រោះពិភាក្សាគ្នា ដើម្បីឈានដល់ “ក្រមប្រតិបតិ្តសមុទ្រចិនខាងត្បូង”ក្នុងពេលឆាប់ៗ ។
លោក Li Keqiang បានលើកឡើងថា ប្រទេសចិនចាត់ទុកអាស៊ានជាទិសដៅអាទិភាពនៃកិច្ចការទូតរបស់ខ្លួន ជានិច្ចកាលបានផ្តល់ការគាំទ្រដល់កិច្ចកសាងសហគមន៍អាស៊ានយ៉ាងមុតមាំ ផ្តល់ការគាំទ្រដល់តួនាទីជាស្នូលរបស់សមាគមអាស៊ានក្នុងរចនាសម័្ពន្ធក្នុងតំបន់យ៉ាងមុតមាំ ក៏ដូចជាផ្តល់ការគាំទ្រដល់អាស៊ានឱ្យដើរតួនាទីកាន់តែធំក្នុងកិច្ចការតំបន់និងអន្តរជាតិយ៉ាងមុតមាំ ។ ប្រទេសចិនរីករាយរួមសហការជាមួយអាស៊ាន ដើម្បី រៀបចំកិច្ចប្រជុំកំពូលរំលឹកខួបទី៣០ នៃការបង្កើតទំនាក់ទំនងសន្ទនារវាចិននិងអាស៊ាន ។
ដោយឡែក អ្នកដឹកនាំនៃប្រទេសអាស៊ានដែលមានវត្តមានក្នុងកិច្ចប្រជុំបានថ្លែងថា ប្រទេសអាស៊ានរីករាយរួមសហការជាមួយប្រទេសចិន ក្នុងន័យអនុវត្តដោយគ្រប់ជ្រុងជ្រោយនិងមានប្រសិទ្ធភាពនូវ «សេចកី្តប្រកាសប្រតិបតិ្តនៃបណ្តាភាគីសមុទ្រចិនខាងត្បូង» ដើម្បីឈានដល់ “ក្រមប្រតិបតិ្តសមុទ្រចិនខាងត្បូង”ដែលមានខ្លឹមសារជាក់ស្តែងនិងមានប្រសិទ្ធភាពក្នុងពេលឆាប់ៗ ។រំពឹងថា កិច្ចព្រមព្រៀងស្តីពី RCEP អាចចូលជាធរមានក្នុងពេលឆាប់ៗ ក៏ដូចជារួមសហការជាមួយប្រទេសចិន រៀបចំកិច្ចប្រជុំកំពូលរំលឹកខួបទី៣០ នៃការបង្កើតទំនាក់ទំនងសន្ទនាទ្វេភាគីរវាចិននិងអាស៊ាន ៕
