របាយការណ៍ការងាររដ្ឋាភិបាល
——លោកលីខឺឈាងនាយករដ្ឋមន្រ្តីចិនថ្លែងក្នុងកិច្ចប្រជុំលើកទី៥នៃមហាសន្និបាតសភាតំណាងប្រជាជនទូទាំងប្រទេសចិននីតិកាលទី១៣（ខ្លឹមសារដកស្រង់）ភាគទី ១
ថ្ងៃទី៥ខែមីនាឆ្នាំ២០២១
តំណាងគ្រប់រូប៖
ឥឡូវនេះ ខ្ញុំសូមតាងនាមក្រុមប្រឹក្សាកិច្ចការរដ្ឋចិន ថ្លែងរបាយការណ៍ការងាររដ្ឋាភិបាលជូនអង្គមហាសន្និបាត ដើម្បីពិនិត្យពិភាក្សា ព្រមនិងសូមសមាជិកគ្រប់រូបនៃសភាប្រឹក្សានយោបាយប្រជាជនទូទាំងប្រទេសចិនលើកជាមតិយោបល់។
១ ការរំលឹកឡើងវិញអំពីការងារប្រចាំឆ្នាំ២០២០
មួយឆ្នាំដែលទើបកន្លងផុតទៅ ជាឆ្នាំពិសេសក្នុងប្រវត្តិសាស្ត្រប្រទេសចិនថ្មី ។ ប្រឈមនឹងការវាយប្រហារផ្ទួនៗ ដូចជាការរីករាលដាលនៃជំងឺកូវីដ១៩ និងការធ្លាក់ចុះយ៉ាងខ្លាំងនៃសេដ្ឋកិច្ចសកលជាដើម ប្រជាជនចិនគ្រប់ជនជាតិបានខិតខំប្រឹងប្រែងយ៉ាងអង់អាចក្លាហាន ក្រោមការដឹកនាំនៃមជ្ឈិមបក្សកុម្មុយនិស្តចិនដែលមានលោក ស៊ីជីនភីងជាប្រមុខស្នូល ដោយទទួលបានសមិទ្ធផលជាយុទ្ធសាស្ត្រយ៉ាងល្អប្រសើរលើការងារបង្ការនិងគ្រប់គ្រងការរីករាលដាលនៃជំងឺកូវីដ១៩ ។ ប្រទេសចិនជាអង្គភាពមានកំណើនសេដ្ឋកិច្ចវិជ្ជមានតែមួយគត់ ក្នុងចំណោមអង្គភាពសេដ្ឋកិច្ចសំខាន់ៗនៅលើពិភពលោក ព្រមទាំងទទួលជោគជ័យក្នុងយុទ្ធនាការពុះពារឧបសគ្គក្នុងការលុបបំបាត់ភាពក្រីក្រ និងទទួលបានសមិទ្ធផលជាលក្ខណៈសម្រេចក្នុងកិច្ចកសាងសង្គមដែលប្រជាជនមានជីវភាពធូរធារបង្គួរដោយគ្រប់ជ្រុងជ្រោយ ដែលប្រជាជនចិនពេញចិត្ត និងជាការកត់សម្គាល់ខ្លាំងពីសំណាក់ពិភពលោក ពោលគឺអាចចារក្នុងទំព័រប្រវតិ្តសាស្ត្រ ។ ទិសដៅអភិវឌ្ឍន៍សំខាន់ៗពេញមួយឆ្នាំសម្រេចបានដោយគាប់ប្រសើរ ការងារកំណែទម្រង់ ការបើកទូលាយនិងកិច្ចកសាងសង្គមនិយមទំនើបរបស់ប្រទេសចិនទទួលបានការវិវឌ្ឍរីកចម្រើនយ៉ាងសំខាន់ ។
ក្នុងដំណើរប្រយុទ្ធប្រឆាំងនឹងការរីករាលដាលនៃជំងឺកូវីដ១៩ដ៏លំបាកលំបិន ជានិច្ចកាលមជ្ឈិមបក្សកុម្មុយនិស្តចិនតែងបានប្រកាន់ខ្ជាប់នូវការតម្កល់ទុកប្រជាជនជាអាទិភាព តម្កល់ទុកសុវត្ថិភាពអាយុជីវិតរបស់ប្រជាជនជាអាទិភាព លោក ស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន បានដឹកនាំនិងចាត់ចែងការងារដោយផ្ទាល់ ព្រមទាំងទទួលបានការគាំទ្រពីសំណាក់ភាគីនានា ដោយពង្រឹងនិងពង្រីកសមិទ្ធផលនៃការងារបង្ការនិងគ្រប់គ្រងជំងឺឆ្លង ។
មួយឆ្នាំកន្លងទៅនេះ រដ្ឋាភិបាលចិនបានអនុវត្តសេចកី្តសម្រេចចិត្តរបស់មជ្ឈិមបក្ស ដើម្បីជំរុញនិងរៀបចំចាត់ចែងការងារបង្ការនិងគ្រប់គ្រងជំងឺឆ្លង ក៏ដូចជាការអភិវឌ្ឍសេដ្ឋកិច្ចសង្គម តាមរយៈការងារសំខាន់ៗដូចខាងក្រោម៖
ទីមួយ គ្រោងផែនការនិងអនុវត្តគោលនយោបាយម៉ាក្រូដោយគិតពិចារណាដល់តម្រូវការជាបន្ទាន់នៃតួអង្គសេដ្ឋកិច្ចសំខាន់ក្នុងទីផ្សារ ដើម្បីលំនឹងសភាពការណ៍ទូទៅនៃវិស័យសេដ្ឋកិច្ច ។
ប្រឈមនឹងការវាយប្រហារដ៏កម្រក្នុងប្រវតិ្តសាស្ត្រ រដ្ឋាភិបាលចិនបានលើកឡើងនូវភារកិច្ច “ធានា៦វិស័យ” លើមូលដ្ឋានការងារ “លំនឹង៦វិស័យ” ជាពិសេសគឺធានាឱកាសការងារ ធានាជីវភាពរស់នៅរបស់ប្រជាជន និងធានាដល់តួអង្គសេដ្ឋកិច្ចសំខាន់ៗ ដើម្បីជំរុញភាពនឹងនរនិង ទទួលបានការវិវឌ្ឍរីកចម្រើនក្នុងភាពនឹងនរ ។
