ថ្ងៃទី១៨ខែមិថុនា លោកវ៉ាងយីសមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីការបរទេសចិនបានធ្វើជាអធិបតីក្នុងកិច្ចប្រជុំជាន់ខ្ពស់ស្តីពីកិច្ចសហប្រតិបត្តិការអន្តរជាតិ ”ខ្សែក្រវាត់និងផ្លូវ”តាមប្រព័ន្ធវីដេអូនៅក្រុងប៉េកាំង។
លោកវ៉ាងយី បានថ្លែងថាថ្វីត្បិតតែរងផលប៉ះពាល់ ពីការរីករាលដាលនៃជំងឺកូវីដ១៩និងឱនភាពសេដ្ឋកិច្ចពិភពលោកក៏ដោយ តែកិច្ចសហប្រតិបត្តិការ”ខ្សែក្រវាត់និងផ្លូវ”បាន ពុះពារឧបសគ្គដើម្បីឆ្ពោះទៅមុខហើយទទួលបានការវិវឌ្ឍរីកចម្រើនថ្មីៗមួយចំនួនទៀតផង។
ទី១ គឺសមាជិកនៃកិច្ចសហប្រតិបត្តិការត្រូវបានពង្រីកជាបន្តបន្ទាប់ ឆ្នាំមុនបានចុះហត្ថលេខាលើកិច្ចព្រមព្រៀងថ្មីស្តីពីកិច្ចសហប្រតិបត្តិការអន្តររដ្ឋាភិបាលចំនួន២៩ច្បាប់ ធ្វើឱ្យចំនួន កិច្ចព្រមព្រៀងសហប្រតិបត្តិការកើនដល់២០០ច្បាប់។
ទី២ គឺ កម្រិតកិច្ចសហប្រតិបត្តិការសេដ្ឋកិច្ចនិងពាណិជ្ជកម្មត្រូវបានលើកកម្ពស់ជាបន្តបន្ទាប់ ឆ្នាំ២០១៩ ពាណិជ្ជកម្មទំនិញសរុបរវាងចិនជាមួយដៃគូសហប្រតិបត្តិការ”ខ្សែក្រវាត់និងផ្លូវ”មានទំហំលើសពី១.៣ទ្រីលានយាន់ប្រាក់ចិន បានកើនឡើង៦%បើប្រៀបធៀបនិងរយៈពេលដូចគ្នានៃឆ្នាំ២០១៩។
ទី៣ ការតភ្ជាប់គ្នាត្រូវបានបង្រឹងជាបន្តបន្ទាប់ គម្រោងការតភ្ជាប់ថ្មីមួយចំនួនត្រូវបានអនុវត្តដោយជោគជ័យ បានផ្តល់ការគាំទ្រយ៉ាងខ្លាំងដល់បណ្តាប្រទេសនានាដើម្បីសម្រេចការអភិវឌ្ឍសេដ្ឋកិច្ចនិងស្ថិរភាពសង្គម។
ការពិតបានបញ្ជាក់ថា ជំងឺឆ្លងមិនបានកែប្រែនិន្នាការអភិវឌ្ឍន៍នៃកិច្ចសហប្រតិបត្តិការ”ខ្សែក្រវាត់និងផ្លូវ”នោះទេ បែរជាបង្ហាញពីភាពរឹងមាំនិងកម្លាំងរស់រវើកយ៉ាងខ្លាំងក្លានៃកិច្ចសហប្រតិបត្តិការ”ខ្សែក្រវាត់និងផ្លូវ”ទៅវិញ៕
