ថ្ងៃទី ១៣ ខែមិថុនាជាទិវាសម្បត្តិបេតិកភ័ណ្ឌវប្បធម៌និងធម្មជាតិនៃប្រទេសចិន ភាពយន្តឯកសារ“មនុស្សប៉េកាំង៖អាថ៍កំពាំងចុងក្រោយនៃមនុស្សជាតិ” ដែលរួមគ្នាផលិតដោយចិននិងបារាំងបានប្រារព្ធធ្វើពិធីសម្ពោធបើកតាមអនឡាញនៅក្រុងប៉េកាំងនិងប៉ារីស ។
ឆ្នាំ២០២១ជាខួបទី ១០០ នៃការជីកកកាយដំណែលមនុស្សប៉េកាំងនៅតំបន់Zhoukoudian ក៏ជាឆ្នាំវប្បធម៌និងទេសចរណ៍រវាងចិននិងបារាំងដែរ ។ ដើម្បីឱ្យទស្សនិកជនចិននិងពិភពលោកស្វែងយល់ពីដំណើរសំខាន់នៃការវិវឌ្ឍន៍របស់មនុស្សជាតិបុរាណកាល និងបង្ហាញពីបុរេប្រវត្តិសាស្ត្រនៃប្រទេសចិន អគ្គស្ថានីយវិទ្យុនិងទូរទស្សន៍មជ្ឈិមចិននិងក្រុមហ៊ុនទូរទស្សន៍ជាតិបារាំងបានរួមគ្នាផលិតភាពយន្តឯកសារក្រោមចំណងជើងថា “មនុស្សប៉េកាំង៖អាថ៍កំពាំងចុងក្រោយនៃមនុស្សជាតិ” ដែលនឹងត្រូវចាក់ផ្សាយនៅខែធ្នូឆ្នាំ២០២១ ។
តាំងពីចូលឆ្នាំនេះមក ប្រមុខរដ្ឋចិននិងបារាំងបានពិភាក្សាការងារតាមទូរស័ព្ទចំនួន ៤ លើកហើយ។ កាលពីថ្ងៃទី៥ ខែមិថុនា លោកស៊ីជីនភីង ប្រធានរដ្ឋចិនបានជួបពិភាក្សាតាមទូរស័ព្ទជាមួយលោកម៉ាក្រុន ប្រធានាធិបតីបារាំងដោយកត់សម្គាល់ថា ស្ថិតចំពោះមុខការផ្ទុះរាលដាលនៃជំងឺកូវីដ១៩ ការរួមសាមគ្គីគ្នានិងកិច្ចសហប្រតិបត្តិការទើបជាកិច្ចការត្រឹមត្រូវ ។ ចិននិងបារាំងត្រូវតែបន្តគាំទ្រសហគមន៍អន្តរជាតិសាមគ្គីគ្នាប្រយុទ្ធប្រឆាំងនឹងជំងឺកូវីដ១៩ជាមួយគ្នា ។
លោកShen Haixiong អនុរដ្ឋមន្ត្រីក្រសួងឃោសនាការចិន និងជាប្រធានអគ្គស្ថានីយវិទ្យុនិងទូរទស្សន៍មជ្ឈិមចិនបានថ្លែងថា ភាពយន្តនេះបានគូសបញ្ជាក់ពីការរួមគ្នាកសាងនិងចែករំលែក វាមានសារៈសំខាន់ចំពោះប្រជាជនពិភពលោកដែលកំពុងរងផលប៉ះពាល់ពីការរីករាលដាលនៃជំងឺកូវីដ១៩ ។
លោករដ្ឋមន្ត្រីក្រសួងវប្បធម៌បារាំងបានថ្លែងថា កិច្ចសហប្រតិបត្តិការទាំងនេះធ្វើឱ្យមនុស្សទាំងឡាយមានឱកាសទៅស្វែងយល់ទំនាក់ទំនងហួសព្រំដែននៃមនុស្សជាតិកាលពីរាប់ពាន់ឆ្នាំមក ។
លោកស្រីអគ្គនាយកនៃអង្គការយូណេស្គូអង្គការសហប្រជាជាតិបានថ្លែងថា ដំណែលមនុស្សប៉េកាំងនៅZhoukoudianជាសក្ខីភាពនៃដំណើរវិវឌ្ឍន៍នៃមនុស្សជាតិនិងសង្គមមនុស្សជាតិ ភាពយន្តនេះគឺជារឿងរ៉ាវរបស់យើងទាំងអស់គ្នា ៕
