កាលពីយប់ថ្ងៃទី ៤ ខែមិថុនា លោក Li Keqiang នាយករដ្ឋមន្រ្តីចិនបានថ្លែងសុន្ទរកថានៅក្នុងកិច្ចប្រជុំកំពូលវ៉ាក់សាំងពិភពលោកតាមប្រព័ន្ធវីដេអូដោយសង្កត់ធ្ងន់ថា ប្រទេសចិនកំពុងបង្កើនការពុះពាបញ្ហាលំបាកនៃការសិក្សាស្រាវជ្រាវវិទ្យាសាស្ត្រលើវ៉ាក់សាំង ឱសថនិងថ្នាំតេស្តសម្រាប់ទប់ទល់នឹងជំងឺកូវីដ ១៩ ព្រមទាំងយកចិត្តទុកដាក់ចំពោះកិច្ចសហប្រតិបត្តិការអន្តរជាតិក្នុងការសិក្សាស្រាវជ្រាវនិងផលិតវ៉ាក់សាំង។
លោក Li Keqiang បានថែ្លងទៀតថា ឆ្លងតាមការខិតខំប្រឹងប្រែងដ៏លំបាករបស់ប្រជាជនចិន ការរីករាលដាលនៃជំងឺឆ្លងត្រូវបានគ្រប់គ្រងប្រកបដោយប្រសិទ្ធភាព។ប៉ុន្តែការរីករាលដាលនៃជំងឺឆ្លងនេះមិនទាន់បញ្ចប់នោះទេ។ប្រទេសចិននឹងបន្តផ្តល់ការគាំទ្រតាមលទ្ធភាពរបស់ខ្លួនដល់បណ្តាប្រទេសនានាដែលរងផលប៉ះពាល់ពីការរីករាលដាលនៃជំងឺនេះ ជាពិសេស ប្រទេសកំពុងអភិវឌ្ឍន៍ក្នុងការប្រយុទ្ធប្រឆាំងនឹងការរាតត្បាតនៃជំងឺឆ្លងនេះព្រមទាំងការស្តារឡើងវិញនៃការអភិវឌ្ឍសេដ្ឋកិច្ចនិងសង្គម។
លោក Li Keqiang បានលើកឡើងថា ប្រទេសចិននឹងបន្តគាំទ្រដល់អង្គការសុខភាពពិភពលោកក្នុងការដើរតួនាទីស្នូលលើការសម្របសម្រួលការសិក្សាស្រាវជ្រាវនិងផលិតវ៉ាក់សាំង ក៏ដូចជាជំរុញការធ្វើតេស្តគ្លីនិកនិងលទ្ធផលសិក្សាស្រាវជ្រាវនិងផលិតវ៉ាក់សាំងឱ្យប្រើប្រាស់នៅលើទីផ្សារក្នុងពេលឆាប់ៗដើម្បីផ្តល់នូវផលិតផលសាធារណៈជាសកលដែលប្រកបដោយសុវត្ថិភាព ប្រសិទ្ធភាពនិងគុណភាពខ្ពស់ដល់ពិភពលោក៕
