លោកMaZhaoxuអនុរដ្ឋមន្រ្តីក្រសួងការបរទេសចិនបានថ្លែងនៅក្រុងប៉េកាំងកាលពីថ្ងៃទី១៨ខែឧសភាថា តបតាមការអញ្ជើញ លោកស៊ីជីនភីង ប្រធានរដ្ឋចិនបានថ្លែងសុន្ទរកថាតាមប្រព័ន្ធវីដេអូក្នុងមហាសន្និបាតសុខភាពពិភពលោកដោយបានលើកឡើងនូវគំនិតផ្តួចផ្តើមដ៏សំខាន់មួយចំនួនក្នុងន័យលើកកម្ពស់ជំនឿចិត្តក្នុងការប្រយុទ្ធប្រឆាំងជំងឺឆ្លងលើពិភពលោក ជំរុញកិច្ចសហប្រតិបត្តិការអន្តរជាតិដើម្បីប្រយុទ្ធប្រឆាំងជំងឺឆ្លងនិងជាការធ្វើប្លន់គោលនៃប្រព័ន្ធអភិបាលពិភពលោកនាពេលអនាគត។
លោកស៊ីជីនភីងបានគូសបញ្ជាក់ថា ការជួយដល់ប្រទេសកំពុងអភិវឌ្ឍន៍ឱ្យពង្រឹងខ្សែការពារជំងឺឆ្លងជាភារកិច្ចសំខាន់បំផុត លោកសូមអំពាវនាវសហគមន៍អន្តរជាតិឱ្យបង្កើនការគាំទ្រផ្នែកនយោបាយនិងការផ្តល់ថវិកាចំពោះអង្គការសុខភាពពិភពលោក។ប្រទេសចិននឹងផ្តល់ជំនួយអន្តរជាតិជាទឹកប្រាក់២ពាន់លានដុល្លារអាមេរិកក្នុងរយៈពេលពីរឆ្នាំសម្រាប់គាំទ្រប្រទេសរងឥទ្ធិពលពីជំងឺឆ្លងជាពិសេសគឺប្រទេសកំពុងអភិវឌ្ឍន៍ក្នុងការប្រយុទ្ធប្រឆាំងជំងឺឆ្លងនិងស្តារសេដ្ឋកិច្ចនិងការអភិវឌ្ឍឡើងវិញ។បន្ទាប់ពីប្រទេសចិនបញ្ចប់ការស្រាវជ្រាវ ផលិតនិងប្រើប្រាស់នូវវ៉ាក់សាំងវីរុសកូវីដ១៩ នឹងដាក់ឱ្យវ៉ាក់សាំងនេះប្រើប្រាស់ជាផលិតផលសាធារណៈលើពិភពលោក។
លោកMaZhaoxuបានថ្លែងថា វិធានការទាំងនេះបង្ហាញឱ្យឃើញនូវភាពទទួលខុសត្រូវរបស់ប្រទេសចិនចំពោះកិច្ចការសុខាភិបាលសាធារណៈទូទាំងពិភពលោក។ប្រទេសចិននឹងជំរុញសហគមន៍អន្តរជាតិឱ្យរួមសាមគ្គីគ្នានិងធ្វើកិច្ចសហប្រតិបត្តិការដើម្បីយកឈ្នះលើជំងឺឆ្លងដើម្បីកសាងសហគមន៍រួមវាសនាសុខភាពមនុស្សជាតិ។