សកម្មភាពឃោសនាបោះឆ្នោតជ្រើសរើសប្រធានាធិបតីសហរដ្ឋអាមេរិកកាលពីឆ្នាំ 2016 របស់លោក ដូណាល់ ត្រាំ បានធ្វើឱ្យគេចាប់អារម្មយ៉ាងខ្លាំង មូលហេតុមួយចំនួនគឺ លោកបានមាក់ងាយវិទ្យាសាស្ត្រជាសាធារណៈ លោកសង្ស័យនឹងការប្រើថ្នាំវ៉ាក់សាំង បានអះអាងថាការបម្រែបម្រួលនៃអាកាសធាតុជា«កលល្បិច»ផលិតដោយប្រទេសចិន។
មនុស្សជាច្រើនបានសម្គាល់ថា បន្ទាប់ពីឡើងកាន់មុខតំណែង លោកនឹងមិនគិតតែផលប្រយោជន៍នយោបាយផ្ទាល់ខ្លួន បន្តមាក់ងាយមតិយោបល់និងបទពិសោធន៍វិទ្យាសាស្ត្ររបស់អ្នកជំនាញការនោះទេ។ ក៏ប៉ុន្តែ វិបត្តិជំងឺកូវីដ-19 នាពេលបច្ចុប្បន្នបានបង្ហាញថា ពួកគេបានគិតខុសហើយ។
ពេលកន្លងទៅនេះ រដ្ឋាភិបាលលោក ត្រាំ បានដកលោក Rick Bright អ្នកជំនាញកំពូលផ្នែកវីរុសនៃអាមេរិកចេញពីមុខតំណែង ។ ប្រការនេះបានធ្វើឱ្យមជ្ឈដ្ឋានវិទ្យាសាស្ត្រទាំងអស់ភ្ញាក់ផ្អើលយ៉ាងខ្លាំង។ ដោយសារលោក Rick Bright កំពុងមមាញឹកនឹងការដឹកនាំក្រុមការងារស្រាវជ្រាវផលិតវ៉ាក់សាំងជំងឺកូវីដ-19 ដោយសារលោកបានបដិសេធជួយផ្សព្វផ្សាយវិធីសាស្ត្រនិងថ្នាំព្យាបាលជំងឺកូវីដ-19 ដែលលោកត្រាំសម្គាល់ថាអាចផ្លាស់ប្តូរទាំងស្រុងនូវស្ថានការណ៍ប្រយុទ្ធជំងឺឆ្លងនាពេលបច្ចុប្បន្នបាន។
នេះមិនមែនជាលើកទីមួយទេ សម្រាប់លោកត្រាំបង្ហាញជាសាធារណៈ នូវអាកប្បកិរិយាមិនយកចិត្តទុកដាក់លើវិទ្យាសាស្ត្រ។ មុននេះ សូម្បីតែអង្គការសុខភាពពិភពលោកបានប្រកាសថាជំងឺកូវីដ-19 បានក្លាយជា«ភាពអាសន្នផ្នែកសុខាភិបាលសាធារណៈដែលអន្តរជាតិត្រូវផ្តោតការយកចិត្តទុកដាក់»ក្តី ក៏លោក ត្រាំ នៅតែអះអាងថាវីរុសនេះគ្មានឥទ្ធិពលអ្វីទេ រហូតដល់បានញ៉ាំងឱ្យសហរដ្ឋអាមេរិកខកខានឱកាសគន្លឹះនៃការបង្ការជំងឺឆ្លង។
លោកស្រី Nancy Messonnierប្រធានមជ្ឈមណ្ឌលជំងឺផ្លូវដង្ហើមជាតិអាមេរិកបានព្រមានជាសាធារណៈកាលពីខែកុម្ភៈ ឆ្នាំ2020 ដោយបានកំណត់ថា ជំងឺកូវីដ-19នឹងផ្ទុះរីករាលដាលជាទូទៅក្នុងប្រទេសអាមេរិក។ ក៏ប៉ុន្តែ លោក ត្រាំ បានគំរាមកំហែងថានឹងបណ្តេញលោកស្រី Messonnier ក្រោមហេតុផល «ផ្សារមូលបត្របានធ្លាក់ចុះខ្លាំង» ដោយសារពាក្យសម្តីរបស់លោកស្រីបានបង្កើតភាពភ័យខ្លាច«ដ៏មិនចាំបាច់» ដល់ប្រជាជនអាមេរិក។
លោកបណ្ឌិត Anthony Fauci អ្នកជំនាញកំពូលផ្នែកជំងឺឆ្លងរបស់អាមេរិកក៏បានច្រានចោលសម្តីរបស់លោក ត្រាំ ច្រើនលើកច្រើនសាផងដែរ។ ពេលទទួលបទសម្ភាសន៍ លោក Fauci បានថ្លែងថា បើសិនជាអាមេរិកអាចចាត់វិធានការបង្ការនៅមុនជាងនេះ នោះអាចសង្គ្រោះអាយុជីវិតមនុស្សកាន់តែច្រើន។ លោក ត្រាំ មិនពេញចិត្តយ៉ាងខ្លាំងចំពោះការនេះ បន្ទាប់មកបានចែករំលែកសារលើបណ្តាញ Twitter អំពាវនាវឱ្យបណ្តេញលោក Fauci ចេញពីការងារ។
នយោបាយនិងវិទ្យាសាស្ត្រមិនដែលគួរជារឿងបដិបក្ខគ្នាទេ។ ពេលប្រឈមនឹងវិបត្តិ អ្នកវិទ្យាសាស្ត្រចូលរួមស្វែងរកភស្តុតាងនិងលទ្ធភាពពាក់ព័ន្ធនានា ដើម្បីផ្តល់ជូនរដ្ឋាភិបាលធ្វើការសម្រេចចុងក្រោយ។ ឥស្សរជននយោបាយមិនអាចមិនអើពើពីសំណើរបស់អ្នកជំនាញ ហើយបដិសេធទទួលខុសត្រូវចំពោះផលវិបាកដែលខ្លួនបានសាងឡើងនោះទេ។ ហេតុអ្វីអាមេរិកអសមត្ថភាពក្នុងការទប់ទល់នឹងជំងឺកូវីដ-19 ? ប្រហែលគឺដោយសារប្រពៃណីតាំងពីយូរយារមកហើយរបស់សហរដ្ឋអាមេរិក ដែលពលីវិទ្យាសាស្ត្រដើម្បីតែផលប្រយោជន៍នយោបាយ៕