យោងតាមទីភ្នាក់ងារសារព័ត៌មាន Fars អ៊ីរ៉ង់បានផ្សាយដំណឹងកាលពីថ្ងៃទី ១៧ ខែឧសភា ឱ្យដឹងថា ឆ្លើយតបនឹងករណីដែលអាមេរិកបានចាត់បញ្ជូនកងទ័ពជើងទឹកក្នុងបំណងរំខានការដឹកបញ្ជូនប្រេងឥន្ធនៈរបស់អ៊ីរ៉ង់ទៅកាន់វេណេស៊ុយអេឡាកាលពីពេលថ្មីៗនេះ លោក Mohammad Javad Zarif រដ្ឋមន្រ្តីក្រសួងការបរទេសអ៊ីរ៉ង់បានផ្ញើលិខិតជូនលោក António Guterres អគ្គលេខាធិការអង្គការសហប្រជាជាតិ។លិខិតនោះបានបញ្ជាក់ថា ទង្វើបង្កហេតុខុសច្បាប់និងគ្រោះថ្នាក់របស់សហរដ្ឋអាមេរិកបែបនេះ គឺជា"ទង្វើចោរប្លន់"តែម្តងនិងជាការគំរាមកំហែងដល់សន្តិភាពនិងសន្តិសុខពិភពលោក។លោកបានថែ្លងថា សហរដ្ឋអាមេរិកគួរតែបញ្ឈប់អនុត្តរភាពនិយម គោរពតាមច្បាប់អន្តរជាតិ ជាពិសេស គឺសេរីភាពនាវាចរណ៍ក្នុងដែនទឹកអន្តរជាតិ។
បន្ទាប់មក លោក Abbas Araghchi អនុរដ្ឋមន្រ្តីក្រសួងការបរទេសអ៊ីរ៉ង់បានកោះហៅឯកអគ្គរដ្ឋទូតស្វីសប្រចាំនៅទីក្រុងតេហេរ៉ង់ដែលជាតំណាងផលប្រយោជន៍អាមេរិកនៅអ៊ីរ៉ង់។លោក Abbas Araghchi បានលើកឡើងថា រាល់ការគំរាមកំហែងណាមួយពីអាមេរិកចំពោះនាវាដឹកប្រេងអ៊ីរ៉ង់នឹងប្រឈមមុខនឹងការឆ្លើយតបភ្លាមៗនិងម៉ឺងម៉ាត់ពីអ៊ីរ៉ង់៕