ថ្ងៃទី១៣ខែឧសភា នៅក្រុងប៉េកាំង លោកវ៉ាងអ៊ីសមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីការបរទេសចិនបានអញ្ជើញចូលរួមកិច្ចប្រជុំវីដេអូខុនហ្វើរីនថ្នាក់រដ្ឋមន្ត្រីការបរទេសនៃរដ្ឋសមាជិកអង្គការសហប្រតិបត្តិការសៀងហៃ។
ថ្លែងក្នុងកិច្ចប្រជុំ លោកវ៉ាងអ៊ីបានលើកឡើងថា ប្រទេសចិនសូមអំពាវនាវឱ្យរដ្ឋាភិបាលនៃបណ្តាប្រទេសនានាទុកការខ្វែងគំនិតនិងជម្លោះនៅមួយអន្លើសិន ដើម្បីប្រមូលផ្តុំកម្លាំងទប់ទល់នឹងករណីជំងឺឆ្លងក្នុងប្រទេស និងធ្វើកិច្ចសហប្រតិបត្តិការអន្តរជាតិ អ្នកន័យសង្រ្គោះអាយុជីវិតរបស់ប្រជាជន។ បណ្តាប្រទេសនានានៃអង្គការសហប្រតិបត្តិការសៀងហៃគួរអនុវត្តជាក់ស្តែងនូវសេចក្តីថ្លែងការណ៍ស្តីពីការរួមសហការគ្នាទប់ទល់នឹងជំងឺរាតត្បាតដែលអនុម័តក្នុងកិច្ចប្រជុំកំពូលក្រុងឈីងតាវឆ្នាំ២០១៨ ព្រមនិងបង្កើតយន្តការសហការគ្នាដើម្បីបង្ការនិងគ្រប់គ្រងជំងឺឆ្លងតាមតំបន់ព្រំដែនរវាងរដ្ឋសមាជិក។
បណ្តាភាគីដែលចូលរួមកិច្ចប្រជុំបានគូសបញ្ជាក់ថា សហគមន៍អន្តរជាតិគួរប្រកាន់ខ្ជាប់នូវពហុភាគីនិយម ពង្រីកតួនាទីដឹកនាំនិងសម្របសម្រួលជាប្រព័ន្ធនៃអង្គការសហប្រជាជាតិ ដើម្បីរួមសាមគ្គីគ្នាទប់ទល់នឹងជំងឺឆ្លង។ ភាគីនានាក៏បានសម្គាល់ឃើញជាឯកច្ឆន្ទថាដែរថា ត្រូវបង្កើនការសម្របសម្រួលខាងគោលនយោបាយម៉ាក្រូសេច្ឋកិច្ច ដើម្បីបង្កើតបរិយាកាសវិនយោគនិងពាណិជ្ជកម្មដែលប្រកបដោយសមភាពនិងតម្លាភាព ជំរុញការប្រាស្រ័យទាក់ទងខាងបុគ្គលនិងទំនិញ ក្នុងន័យរួមគ្នាទប់ទល់នឹងផលប៉ះពាល់ទៅលើការអភិវដ្ឍសេដ្ឋកិច្ចក្នុងតំបន់ដែលបង្កដោយជំងឺឆ្លង ។
សូមបញ្ជាក់ថា កិច្ចប្រជុំលើកនេះបានអនុម័តលើសេចក្តីថ្លែងការណ៍រដ្ឋមន្រ្តីការបរទេសនៃរដ្ឋសមាជិកអង្គការសហប្រតិបត្តិការសៀងហៃស្តីពីការទប់ទល់នឹងជំងឺកូវីដ១៩៕
