ក្រោមជំនួយរបស់សហគ្រាសចិន រោងល្ខោនដែលស្ថិតនៅកណ្តាលក្រុងអាប៊ូហ្សារដ្ឋធានីនីហ្សេរីយ៉ាត្រូវបានកែច្នៃទៅជាមន្ទីរពេទ្យបណ្តោះអាសន្នដែលមានមុខងារធ្វើតេស្តស តាមដានជំងឺនិងសម្រាកព្យាបាលជាដើម។ នាថ្ងៃទី១២ខែឧសភាតាមម៉ោងក្នុងតំបន់ មន្ទីរពេទ្យបណ្តោះអាសន្ននេះបានប្រារព្ធពិធីប្រគល់និងទទួល ព្រមទាំងដាក់ឱ្យប្រើប្រាស់ សមាជិកនៃក្រុមការងារពិសេសរបស់ប្រធានាធិបតីទទួលបន្តុកការងារទប់ទល់នឹងជំងឺឆ្លងរបស់នីហ្សេរីយ៉ាបានចូលរួមពិធីប្រគល់និងទទួល និងសម្តែងការកោតសរសើរចំពោះការបញ្ចប់នូវការសាងសង់យ៉ាងរហ័សនិងការបំពាក់បរិក្ខារដ៏ជឿនលឿនក្នុងមន្ទីរពេទ្យបណ្តោះអាសន្ននេះ។
តាមការឧទ្ទេសនាមឱ្យដឹងថា តបតាមសំណូមពររបស់រដ្ឋាភិបាលនីហ្សេរីយ៉ា ក្រុមហ៊ុនចិនបានចាប់ផ្តើមការងារជួយសាងសង់មន្ទីរពេទ្យបណ្តោះអាសន្នកាលពីដំណាច់ខែមីនា។ មន្ទីរពេទ្យបណ្តោះអាសន្ននេះមានគ្រែជិត ៣០០ មានគ្រែព្យាបាលអ្នកជំងឺធ្ងន់ចំនួន៦និងម៉ាស៊ីនជំនួយការដកបង្ហើមចំនួន៦គ្រឿង ក្នុងមន្ទីរពេទ្យក៏មានបន្ទប់ពិសោធន៍ធ្វើតេស្តចល័តមួយផងដែរ។ ការសាងសង់រួចរាល់នូវមន្ទីរពេទ្យបណ្តោះអាសន្នមួយនេះនឹងជួយបន្ធូរបន្ថយដោយមានប្រសិទ្ធភាពនូវសភាពការណ៍ ខ្វះខាតធនធានវេជ្ជសាស្រ្តសម្រាប់ទប់ទល់នឹងជំងឺកូវីដ១៩នៅក្រុងអាប៊ូហ្សា៕