ថ្ងៃទី ១២ ខែឧសភា លោកZhao Lijian អ្នកនាំពាក្យក្រសួងការបរទេសចិនបានប្រកាសថា លោកវ៉ាងអ៊ី សមាជិកក្រុមប្រឹក្សាកិច្ចការរដ្ឋចិននិងជារដ្ឋមន្រ្តីក្រសួងការបរទេសចិននឹងអញ្ជើញចូលរួមកិច្ចប្រជុំតាមប្រព័ន្ធវីដេអូថ្នាក់រដ្ឋមន្រ្តីការបរទេសនៃរដ្ឋសមាជិកនៃអង្គការសហប្រតិបត្តិការសៀងហៃនៅក្រុងប៉េកាំងនៅថ្ងៃទី ១៣ ខែឧសភា។
ថ្លែងក្នុងសន្និសីទកាសែតជាប្រចាំនាថ្ងៃដដែល លោកZhao Lijian បានឧទ្ទេសនាមថា លោកវ៉ាងអ៊ីនឹងធ្វើកិច្ចពិគ្រោះពិភាក្សាយ៉ាងស៊ីជម្រៅជាមួយរដ្ឋមន្រ្តីការបរទេសនៃរដ្ឋសមាជិកនៃអង្គការសហប្រតិបត្តិការសៀងហៃជុំវិញបញ្ហាដូចជាកិច្ចសហប្រតិបត្តិការផ្នែកប្រយុទ្ធប្រឆាំងនឹងជំងឺCOVID-19 ស្ថានការណ៍អន្តរជាតិនិងក្នុងតំបន់ និងការអភិវឌ្ឍនៅជំហានក្រោយរបស់អង្គការសហប្រតិបត្តិការសៀងហៃ ។ លោកZhao Lijianបានថ្លែងថា ពេលប្រឈមនឹងការរីករាលដាលនៃជំងឺCOVID-19 រដ្ឋសមាជិកនៃអង្គការសហប្រតិបត្តិការសៀងហៃបានធ្វើកិច្ចសហប្រតិបត្តិការយ៉ាងសកម្មក្នុងការប្រយុទ្ធប្រឆាំងនឹងជំងឺឆ្លង បានអនុវត្តយ៉ាងប្រាកដប្រជានូវទស្សនៈអំពីសហគមន៍រួមវាសនារបស់មនុស្សជាតិ ។
លោក Zhao Lijian បានថ្លែងទៀតថា ជឿជាក់ថាបណ្តាភាគីនឹងចាត់ទុកកិច្ចប្រជុំលើកនេះជាឱកាសមួយសម្រាប់ជំរុញអង្គការសហប្រតិបត្តិការសៀងហៃឱ្យរួមចំណែករបស់ខ្លួនក្នុងការពង្រឹងនិងពង្រីកកិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងនឹងជំងឺឆ្លង ៕