ថ្ងៃទី១១ខែឧសភា លោក ចៅ លីជាន អ្នកនាំពាក្យក្រសួងការបរទេសចិន បានសម្តែងការមិនពេញចិត្តយ៉ាងខ្លាំងនិងការប្រឆាំងយ៉ាងដាច់ខាត់ចំពោះទង្វើខុសឆ្គងរបស់អាមេរិកក្នុងពេលថ្មីៗនេះដែលសហរដ្ឋអាមេរិកគ្រោងកំណត់រយៈពេលស្នាក់នៅនៃទិដ្ឋាការសម្រាប់អ្នកសារព័ត៌មានរបស់ប្រទេសចិនប្រចាំនៅសហរដ្ឋអាមរិក ហើយទាមទារឱ្យសហរដ្ឋអាមេរិកកែតម្រូវកំហុសភ្លាម បើមិនដូច្នោះទេ ប្រទេសចិននឹងចាត់វិធានការតបតវិញចំពោះសហរដ្ឋអាមេរិក។
តាមការផ្សាយដំណឹងបានឱ្យដឹងថា ក្រសួងសន្តិសុខជាតិសហរដ្ឋអាមេរិកបានចេញសេចក្តីថ្លែងការណ៍នៃសេចក្តីព្រាងច្បាប់កាលពីថ្ងៃទី៨ខែឧសភាថា រយៈពេលស្នាក់នៅនៃទិដ្ឋាការសម្រាប់អ្នកសារព័ត៌មានចិនប្រចាំនៅសហរដ្ឋអាមេរិកនឹងមិនលើសពី៩០ថ្ងៃនោះទេ ហើយបានថ្លែងថា វិធានការនេះគឺធ្វើឡើងក្នុងគោលបំណងពង្រឹងសមភាពរវាងសហរដ្ឋអាមេរិកនិងចិន ។ ទាកទិននឹងរឿងនេះ លោក ចៅ លីជាន បានថ្លែងក្នុងសន្និសីទសារព័ត៌មានជាប្រចាំនៃក្រសួងការបរទេសចិនថា សហរដ្ឋអាមេរិកយកអ្វីដែលហៅថា “ភាពស្មើគ្នា”ជាលេស បន្តដំឡើងកម្រិតគាបសង្កត់ខាងនយោបាយចំពោះប្រព័ន្ធសារព័ត៌មានចិន នឹងរំខានយ៉ាងធ្ងន់ធ្ងរដល់សកម្មភាពផ្សព្វផ្សាយប្រកបជាប្រក្រតីភាពរបស់ប្រព័ន្ធសារព័ត៌មានចិននៅសហរដ្ឋអាមេរិក៕
