ថ្ងៃទី ១០ ខែឧសភា ពិធីប្រគល់និងទទួលសម្ភារៈសម្រាប់ប្រយុទ្ធប្រឆាំងនឹងជំងឺCOVID-19លើកទី ២ ដែលជាជំនួយប្រទេសចិនជូនដល់អេហ្ស៊ីបបានបើកធ្វើនៅក្រុងគែរ រដ្ឋធានីប្រទេសអេហ្ស៊ីប ។ សម្ភារៈទាំងនេះរួមមានម៉ាស់N95 សម្លៀកបំពាក់ការពារ និងថ្នាំធ្វើតេស្តរកវីរុសជាដើម ។
ថ្លែងក្នុងពិធីប្រគល់និងទទួលសម្ភារៈ លោកLiao Liqiang ឯកអគ្គរដ្ឋទូតចិនប្រចាំអេហ្ស៊ីបបានលើកឡើងថា ប្រទេសចិនបានគាំទ្រយ៉ាងមុតមាំជាប់រហូតដល់ការអភិវឌ្ឍសេដ្ឋកិច្ចនិងសង្គមកិច្ចរបស់អេហ្ស៊ីប ហើយជឿជាក់ថា ប្រទេសចិននិងអេហ្ស៊ីបអាចប្រកៀកស្មាធ្វើកិច្ចសហប្រតិបត្តិការជាមួយគ្នា និងពុះពារឧបសគ្គក្នុងគ្រាអាសន្ន ហើយមុខជាអាចយកជ័យជម្នះលើជំងឺឆ្លងលើកនេះជាក់ជាពុំខាន។
លោកវ៉ាអែល សាអែ ឧបការីរដ្ឋមន្រ្តីក្រសួងសុខាភិបាលអេហ្ស៊ីបបានថ្លែងថា ប្រទេសអេហ្ស៊ីបសូមថ្លែងអំណរគុណដល់ប្រទេសចិនដែលបានផ្តល់ជំនួយឧបត្ថម្ភដល់អេហ្ស៊ីប ព្រមនិងជឿជាក់ថា ក្រោយពីបញ្ចប់ការរីករាលដាលនៃជំងឺឆ្លងលើកនេះ កិច្ចសហប្រតិបត្តិការលើគ្រប់វិស័យរវាងប្រទេសទាំងពីរនឹងមានភាពកាន់តែស៊ីជម្រៅជាមិនខាន ៕