កាលពីថ្ងៃទី៤ខែឧសភាតាមម៉ោងក្នុងតំបន់ វេបសាយ nature ដែលជាវេបសាយនៃទស្សនាវដ្តីវិទ្យាសាស្ត្រកំពូលលំដាប់អន្តរជាតិបានចេញផ្សាយលទ្ធផលស្រាវជ្រាវមួយនៃក្រុមការងារសិក្សាស្រាវជ្រាវវិទ្យាសាស្ត្ររបស់ប្រទេសជាច្រើនដូចជាអង់គ្លេស ចិននិងសហរដ្ឋអាមេរិកជាដើម ។ ការស្រាវជ្រាវបានរកឃើញថា ចិនបានចាត់វិធានការអន្តរាគមន៍មិនមែនប្រើថ្នាំព្យាបាលចំនួន៣ដែលមិនគ្រាន់តែបានទប់ស្កាត់ការរាលដាលនៃជំងឺកូវីដ១៩នៅប្រទេសចិនប៉ុណ្ណោះទេ ថែមទាំងបានផ្តល់ពេលវេលាជូនពិភពលោកទាំងមូលសម្រាប់បង្ការជំងឺឆ្លងទៀតផង ។
ការស្រាវជ្រាវនេះគឺធ្វើឡើងដោយក្រុមការងារសិក្សាស្រាវជ្រាវជាច្រើននៃសកលវិទ្យាល័យ Southampton របស់អង់គ្លេស សកលវិទ្យាល័យ Fudan ប្រទេសចិន មជ្ឈមណ្ឌលបង្ការនិងគ្រប់គ្រងជំងឺនៃក្រុងវូហាន សកលវិទ្យាល័យ Harvard និងសកលវិទ្យាល័យ Johns Hopkins របស់សហរដ្ឋអាមេរិកជាដើម ។ អត្ថបទបង្ហាញថា ចំពោះជំងឺឆ្លងមួយដែលទើបតែកើតមាន ចង់រកឃើញវិធានការអន្តរាគមន៍តាមរយៈការប្រើថ្នាំព្យាបាលដ៏មានប្រសិទ្ធភាពក្នុងរយៈពេលប៉ុន្មានខែគឺមិនអាចទៅរួចទេ ។ ធនធានវេជ្ជសាស្ត្រដ៏មានកម្រិតក្នុងពេលបច្ចុប្បន្ននេះក៏មិនអាចព្យាបាលអ្នកជំងឺទាំងអស់ដែរ ។ ដូច្នេះ វិធានការអន្តរាគមន៍មិនមែនប្រើថ្នាំព្យាបាលគឺជាចំណែកសំខាន់សម្រាប់ទប់ទល់នឹងជំងឺឆ្លង ។
ប្រសិនបើប្រទេសចិនចាត់វិធានការអន្តរាគមន៍មិនមែនប្រើថ្នាំព្យាបាលយឺតយ៉ាវតែមួយសប្តាហ៍ នោះ ករណីឆ្លងប្រហែលនឹងកើនឡើងចំនួន៣ដងបើប្រៀបធៀបនឹងបច្ចុប្បន្ននេះ ប្រសិនបើយឺតយ៉ាវ៣សប្តាហ៍ នោះប្រហែលនឹងកើនឡើង១៨ដងបើប្រៀបធៀបនឹងបច្ចុប្បន្ននេះ ។