លោកស្រី Hua Chunying អ្នកនាំពាក្យក្រសួងការបរទេសចិនបានថែ្លងនៅក្នុងសន្និសីទសារព័ត៌មានជាប្រចាំនៅទីក្រុងប៉េកាំងកាលពីថ្ងៃទី ៧ ខែឧសភា ថា ប្រទេសចិនរីករាយក្នុងការដើរតួនាទីនៃឧត្តមភាពរបស់ខ្លួនលើវិស័យសមត្ថភាពផលិតកម្ម ឃ្លាំងស្តុកទំនិញ ចរាចរណ៍ទំនិញជាដើមឱ្យកាន់តែប្រសើរដើម្បីផ្តល់នូវសេវាកម្មប្រកបដោយប្រសិទ្ធភាពខ្ពស់និងគុណភាពល្អដល់អង្គការសុខភាពពិភពលោកនិងចូលរួមចំណែករបស់ខ្លួនក្នុងកិច្ចសហប្រតិបត្តិការអន្តរជាតិស្តីពីការប្រយុទ្ធប្រឆាំងនឹងការរីករាលដាលនៃជំងឺឆ្លង។
លោកស្រី Hua Chunying បានថែ្លងថា រដ្ឋាភិបាលចិនគាំទ្រយ៉ាងមុតមាំជានិច្ចដល់អង្គការសុខភាពពិភពលោកក្នុងការដើរតួនាទីដឹកនាំក្នុងកិច្ចសហប្រតិបត្តិប្រយុទ្ធប្រឆាំងនឹងការរាតត្បាតនៃជំងឺកូវីដ ១៩ នៅទូទាំងពិភពលោក ហើយសហគ្រាសចិនក៏បានចូលរួមយ៉ាងសកម្មក្នុងកិច្ចសហប្រតិបត្តិការជាក់ស្តែងជាមួយអង្គការសុខភាពពិភពលោកផងដែរ។នៅដំណាក់កាលមុន ក្រុមហ៊ុនឧស្សាហកម្មឱសថនិងសុខភាពចិនបានជួយសហការជាមួយអង្គការសុខភាពពិភពលោកក្នុងការទិញសម្ភារៈបរិក្ខារវេជ្ជសាស្ត្រនៅប្រទេសចិន។ ក្រុមហ៊ុនឧស្សាហកម្មឱសថនិងសុខភាពចិននឹងបន្តជួយអង្គការសុខភាពពិភពលោកក្នុងការទិញឧបករណ៍សម្រាប់ការពារខ្លួនពីប្រទេសចិនទៀត៕
