តាមទិន្នន័យស្ថិតិកាលពីថ្ងៃទី៦ខែឧសភានៃអង្គការសុខភាពពិភពលោកឱ្យដឹងថា បច្ចុប្បន្ននេះ ករណីឆ្លងជំងឺកូវីដ១៩នៅទូទាំងពិភពលោកបានឡើងដល់៣លាន៥សែន២ម៉ឺនករណី ករណីស្លាប់គឺ២សែន៤ម៉ឺន៣៥៤០នាក់ ។ ប៉ុន្មានថ្ងៃកន្លងទៅនេះ មានការស្រាវជ្រាវជាច្រើនបង្ហាញថា ពេលវេលាដែលរកឃើញអ្នកឆ្លងជំងឺកូវីដ១៩នៅប្រទេសជាច្រើនគឺមុនការរាយការណ៍ជាផ្លូវការទៅទៀត អង្គការសុខភាពពិភពលោកអំពាវនាវឱ្យប្រទេសនានាពិនិត្យអង្កេតរកករណីឆ្លងដំបូងបង្អស់ ។
តាមការផ្សាយដំណឹងនៃ CNN កាលពីថ្ងៃទី៥ខែឧសភាឱ្យដឹងថា អត្ថបទសិក្សាស្រាវជ្រាវនៃមន្ទីរពេទ្យមួយនៃក្រុងប៉ារីសប្រទេសបារាំងបានបញ្ជាក់ថា កាលពីខែធ្នូឆ្នាំ២០១៩ បារាំងក៏បានរកឃើញវីរុសជំងឺកូវីដ១៩ហើយ ។ ពេលថ្មីៗកន្លងទៅនេះ អ្នកស្រាវជ្រាវរបស់អង់គ្លេសក៏បានបញ្ជាក់ថា វីរុសកូវីដ១៩បានចាប់ផ្តើមរាលដាលក្នុងក្របខ័ណ្ឌពិភពលោកពីចុងឆ្នាំ២០១៩ ។ អភិបាលក្រុង Belleville នៃរដ្ឋញូវជឺស៊ីរបស់សហរដ្ឋអាមេរិកបានថ្លែងថា លោកបានឆ្លងជំងឺកូវីដ១៩កាលពីខែវិចិ្ឆកាឆ្នាំ២០១៩ ។
កាលពីថ្ងៃទី៥ខែឧសភា លោក Christian Lindmeier អ្នកនាំពាក្យនៃអង្គការសុខភាពពិភពលោកបានថ្លែងនៅក្រុងហ្សឺណែវថា ការផ្សាយដំណឹងរបស់បារាំងបានកែប្រែរយៈពេលនៃការកើតមានជំងឺឆ្លង ។ លោកអំពាវនាវប្រទេសផ្សេងទៀតឱ្យពិនិត្យអង្កេតរកករណីជំងឺរលាកសួតដែលមិនដឹងមូលហេតុដែលកើតឡើងនៅចុងឆ្នាំ២០១៩ ។
