កាលពីថ្ងៃទី ៦ ខែឧសភា លោកស្រីHuaChunying អ្នកនាំពាក្យក្រសួងការបរទេសចិនបានថ្លែងនៅក្រុងប៉េកាំងថា ភាគីចិនរីករាយធ្វើកិច្ចសហប្រតិបត្តិការកាន់តែស៊ីជម្រៅជាមួយចលនាមិនចូលបក្សសម្ព័ន្ធ ដើម្បីរួមគ្នាទប់ទល់នឹងជំងឺកូវីដ១៩ គាំពារផលប្រយោជន៍រួមនៃប្រទេសកំពុងអភិវឌ្ឍន៍ និងជំរុញការកសាងសហគមន៍រួមវាសនានៃមនុស្សជាតិ ។
ពេលកន្លងទៅថ្មីៗនេះ ចលនាមិនចូលបក្សសម្ព័ន្ធបានធ្វើសន្និសីទកំពូលស្តីពីការទប់ទល់ជំងឺកូវីដ១៩តាមប្រព័ន្ធវីដេអូ និងបានអនុម័តលើសេចក្តីប្រកាសនយោបាយ ដោយបានរំលឹកឡើងវិញនូវការគាំទ្រពហុភាគីនិយម គាំទ្រតួនាទីដឹកនាំរបស់អង្គការសុខភាពពិភពលោកក្នុងការប្រយុទ្ធប្រឆាំងនឹងជំងឺកូវីដ១៩នៅទូទាំងពិភពលោក ហើយអំពាវនាវបណ្តាប្រទេសនានាឱ្យបង្កើនសាមគ្គីភាពនិងកិច្ចសហប្រតិបត្តិការដើម្បីទប់ទល់នឹងជំងឺឆ្លងដោយមានប្រសិទ្ធភាព ។ សេចក្តីប្រកាសក៏បានថ្កោលទោសចំពោះការចាត់វិធានការបង្ខិតបង្ខំដោយឯកតោភាគីចំពោះប្រទេសជាសមាជិកនៃចលនាមិនចូលបក្សសម្ព័ន្ធផងដែរ ៕