លោកស្រី Hua Chunying អ្នកនាំពាក្យក្រសួងការបរទេសចិនបានថែ្លងនៅទីក្រុងប៉េកាំងកាលពីថ្ងៃទី ៦ ខែឧសភា ថា ប្រទេសចិននឹងចូលរួមគំនិតផ្តួចផ្តើមស្តីពីកិច្ចសហប្រតិបត្តិការអន្តរជាតិរបស់អង្គការសុខភាពពិភពលោក ក៏ដូចជារួមសហការជាមួយសហគមន៍អន្តរជាតិដើម្បីពន្លឿនការស្រាវជ្រាវនិងផលិតផលិតផលវេជ្ជសាស្ត្រសម្រាប់ទប់ទល់នឹងជំងឺកូវីដ ១៩ ព្រមទាំងជំរុញការបែងចែកផលិតផលពាក់ព័ន្ធប្រកបដោយយុត្តិធម៌និងខិតខំប្រឹងប្រែងដើម្បីធានាសន្តិសុខសុខាភិបាលនិងការប្រយុទ្ធប្រឆាំងនឹងការរាតត្បាតនៃជំងឺឆ្លងនៅទូទាំងពិភពលោក។
លោកស្រី Hua Chunying បានថែ្លងបន្តថា ប្រទេសចិនគាំទ្រយ៉ាងមុតមាំចំពោះតួនាទីជាអ្នកដឹកនាំរបស់អង្គការសុខភាពពិភពលោកក្នុងកិច្ចសហប្រតិបត្តិការប្រយុទ្ធប្រឆាំងនឹងការរាតត្បាតនៃជំងឺឆ្លងនៅទូទាំងពិភពលោក។បន្ទាប់ពីការផ្ទុះរីករាលដាលនៃជំងឺកូវីដ ១៩ ប្រទេសចិនបានចែករំលែកយ៉ាងឆាប់រហ័សនូវព័ត៌មាននៃហ្សែនវីរុសកូវីដ ១៩ ក៏ដូចជាបង្កើតវេទិកាមួយសម្រាប់ចែករំលែកនូវទិន្នន័យនិងលទ្ធផលស្រាវជ្រាវផែ្នកវិទ្យាសាស្ត្រនិងបានអនុវត្តយ៉ាងសកម្មនូវកិច្ចសហប្រតិបត្តិការអន្តរជាតិក្នុងការស្រាវជ្រាវនិងផលិតថ្នាំព្យាបាលនិងវ៉ាក់សាំងជាមួយបណ្តាប្រទេសនានាលើពិភពលោកដែលបានចូលរួមចំណែកយ៉ាងសំខាន់ក្នុងការស្រាវជ្រាវនិងផលិតថ្នាំព្យាបាលនិងវ៉ាក់សាំងនៅក្នុងបណ្តាប្រទេសផ្សេងៗ៕